ހަފްތާރޭސް ޕްރޮގްރާމްގެ ތެރެއިން ދ. އަތޮޅަށް ނިސްބަތްވާ ކައުންސިލްތަކާއި އަންހެނުންގެ ތަރައްޤީއަށް މަސައްކަތްކުރާ ކޮމެޓީތަކުގެ އިސްވެރިންނަށް އަމާޒުކޮށްގެން "އަމާން ވިލުންވެރި މުޖްތަމައުއެއް ބިނާކުރުމުގައި ލޯކަލް ލީޑަރުންގެ ދައުރު" މިނަގުމައި ދ.ކުޑަހުވަދޫގައި ޙާއްސަ ވޯކްޝޮޕެއް ބާއްވައިފިއެވެ. މިއީ ޒުވާނުންނަށް އަމާޒުކޮށްގެން ޔޫތު މިނިސްޓްރީއާއި ނޭޝަނަލް ކައުންޓަރ ޓެރަރިޒަމް ސެންޓަރ (އެންސީޓީސީ) ގުޅިގެން ބާއްވާ ހަރަކާތެކެވެ.
މި ސެމިނަރ ޝަރަފްވެރިކޮށްދެއްވީ ދ.އަތޮޅު ފެމިލީ އެންޑް ޗިލްޑްރަން ސަރވިސަސްގެ އެގްޒެކްޓިވް ޑިރެކްޓަރ އަލީ ސައުދުއެވެ. މި ރަސްމިއްޔާތުގައި ވާހަކަދައްކަވަމުން ސައުދު ދެއްކެވި ވާހަކަފުޅުގައި މިފަދަ ޕްރޮގްރާމްތަކުގެ މުހިންމު ކަމުގެ މައްޗަށް އަލިއަޅުވާލެއްވިއެވެ.
"ތިމާވަންތަކަށް އިސްކޮށް އަނެކާވަންތަކަން އަނެކާވަންތަކަން ނެތިގެންދާ މަންޒަރު އަޅުގަނޑުމެންގެ ތެރޭގައި އެބަފެނޭ. ތިމާއަށް ލިބޭ އެއްޗަކީ ނުވަތަ ތިމާއަށް ލިބޭ މަންފާއަކީ އަނެކާއަށްލިބޭ ނިކަމެތިކަމަކަށްވާ ފަހަރު އަޅުގަނޑުމެންގެ ތެރޭގައި އެބައާދޭ. އެކަމުގެ އިހްސާސް އަހްސާސް އަޅުގަނޑުމެންނަށް ވަރަށް ބޮޑަށް އެބަކުރެވޭ. އަޅުގަނޑުމެން ވާންވީ ތިމާވަންތަކަށް ދޫކޮށް އަނެކާ ވަންތަކަން އިސްކުރާ ބަޔަކަށް. މި މުޖްތަމައުއަކީ އަޅުގަނޑުމެންގެ ދަރިންނާއި ދަރިންގެ ދަރިން އުޅެންއޮތް މުޖްތަމަޢެއް. އެހެންކަމުން ރީތި އަޚްލާގް އުފެއްދުމަކީ މިއަދު އަހަރެމެން ކޮންމެ މީހެއްގެ ބޮލުގައި އެޅިފައިވާ ޒިންމާއެއް." ސައުދު ވިދާޅުވިއެވެ.
މި ވޯކްޝޮޕުގައި ދ.އަތޮޅުގެ ރަށު ކައުންސިލްތަކާއި އަންހެނުންގެ ތަރައްޤީއަށް މަސައްކަތްކުރާ ކޮމެޓީކަކުގެ 24 ބޭފުޅުން ވަނީ ބައިވެރިވެފައެވެ. ވޯކްޝޮޕުގައި ބައިވެރިވި ބައެއް ބައިވެރިން ޕީއެސްއެމް ނިއުސްއަށް މައުލޫމާތު ދެއްވަމުން ވިދާޅުވީ، މި ސެމިނަރއަކީ ވަރަށް ކާމިޔާބު ސެމިނަރއެއްކަމަށާއި ސެމިނަރގެ ތެރެއިން އެ ބައިވެރިންނަށް ގިނަ ކަންކަން ދަސްވެގެންދިޔަކަމަށެވެ. އެގޮތުން ކައުންސިލްތަކުގެ އެކްޝަން ޕްލޭން ތައްޔާރުކުރުމަށް މި ސެމިނަރގެ ސަބަބުން ވަރަށް ބޮޑު ފަސޭހައެއް ލިބިގެންދިޔަކަމަށް ބައިވެރިން ވިދާޅުވެފައިވެއެވެ.
މި ވޯކްޝޮޕުގައި ސަރުކާރުގެ އެކިއެކު މުއައްސަސާތަކުން ވަނީ މައުލޫމާތު ދެއްވަފައެވެ.
މި ވޯކްޝޮޕަކީ ދިވެހިރާއްޖޭގައި ހަރުކަށި ފިކުރު ފެތުރުން ހުއްޓުމުގެ ގޮތުން އެކުލަވާލާފައިވާ "ނޭޝަނަލް އެކްޝަން ޕްލޭން އޮން ޕްރިވެންޓިންގ އެންޑް ކައުންޓަރިންގ ވައިލެންޓް އެކްސްޓްރިމިޒަމް" އިން ކަނޑައަޅާފައިވާ ދާއިރާތަކަށް އަމާޒުކޮށްގެން ހިންގި ވޯކްޝޮޕެކެވެ. މި ވޯކްޝޮޕުގެ ސަބަބުން އިޖްތިމާއީ ދުޅަހެޔޮކަން އާލާވެ އަދި ބަދަހި ވިލުންވެރި މުޖްތަމައުއެއް ބިނާވުމަށް އެހީތެރިވެގެންދާނެކަމަށް އެން.ސީ.ޓީ.ސީން މައުލޫމާތުދެއެވެ.