ކޯވިޑް-19އާއެކު އިޤްތިޞާދީ ހުރިހައި ސިނާއަތަކަށްވެސް ވަނީ ނޭދެވޭ އަސަރު ކޮށްފައެވެ. ޢިމާރާތްކުރުމުގެ ސިނާޢަތަކީ ރާއްޖޭގައި ހަލުވިކަމާއެކު ކުރިއަރަމުންއަންނަ އެއް ސިނާއަތެވެ. ނަމަވެސް ކޯވިޑާއެކު މި ސިނާޢަތައްވެސް ވަނީ އޭގެ އަސަރުކޮށްފައެވެ.
ކޯވިޑާއެކު، ޢިމާރާތްކުރުމުގެ ސިނާޢަތް ހުއްޓުނުނަމަވެސް މިހާރު މަޑުމަޑުން އަންނަނީ ކުރިއަރަމުންނެވެ. ކޯވިޑުގެ ޙާލަތާ ގުޅޭގޮތުން މޯލްޑިވްސް ނޭޝަނަލް އެސޯސިއޭޝަން އޮފް ކޮންސްޓްރަކްޝަން އިންޑަސްޓްރީ (މަސީ)އިން ކޮށްފައިވާ ދިރާސާ ރިޕޯޓްގައި ބުނެފައިވަނީ މި ސިނާޢަތަށް 600 މިލިއަން ރުފިޔާގެ ގެއްލުން ވެފައިވާކަމަށެވެ.
ޕީއެސްއެމް ނިއުސްގެ ރާއްޖެ މިއަދު ޕްރޮގްރާމްގައި ވާހަކަދައްކަވަމުން މަސީގެ ރައީސް މުޙައްމަދު ޢަލީ ޖަނާޙް ވިދާޅުވީ، ޢިމާރާތްކުރުމުގެ ސިނާއަތް، ކުރިން އޮތް ޙާލަތަށް ދާން އަދި ދެތިން އަހަރު ނަގާނެކަމަށެވެ. އެހެންނަމަވެސް ރާއްޖޭގެ ޢިމާރާތްކުރުމުގެ ސިނާޢަތުގައި ފެންނަމުންދަނީ ވަރަށް އުޖާލާ މަންޒަރެއްކަމަށް އޭނާ ވިދާޅުވިއެވެ. ސަބަބަކީ މަޝްރޫޢުތައް ހިނގަމުން ދިއުމާއި، އިތުރު މަޝްރޫޢުތައް ފެށުންކަމަށް އޭނާ ވިދާޅުވިއެވެ.
"ހާލަތު ނޯމަލައިޒް ވާނީ އަޅުގަނޑަށް ހީވަނީ ކުރިއަށްއޮތް ދެތިން އަހަރުގެ ތެރޭގައިހެން. އެހެންނަމަވެސް އެހެން ޤައުމުތަކާ އަޅާބަލާއިރު އަޅުގަނޑަށް ހީވަނީ ޕްރޮޖެކްޓްތައްވެސް ކުރިއަށް އެބަދޭހެން. މަސައްކަތްތައް އަލަށްވެސް އެބަ ނުކުމޭ. އިކޮނޮމީވެސް މަޑުމަޑުން ރަނގަޅުވޭ. އެހެންވީމަ މިހިރީ ޕޮޒިޓިވް ސައިންސް އިނގޭތޯ. އެހެން ދިމާވާންޖެހުނު ސަބަބަކީ އިންޑަސްޓްރީގެ އަޑުވެސް ސަރުކާރުންވެސް އަޑުއައްސަވާ." ޖަނާޙް ވިދާޅުވިއެވެ.
ކޯވިޑުގެ ޙާލަތު އެންމެ ގޯސްވިއިރު މަސީން ވަނީ މި ސިނާޢަތް އޮތް ޙާލަތު ދެނެގަތުމަށް ސަރވޭއެއް ހަދާފައެވެ. މަސީން ބުނީ މިހާރު އަނެއްކާވެސް އިތުރު ސަރވޭތައް ހަދަމުން ދާކަމަށެވެ. އައު ޢާއްމު ޙާލަތާ ގުޅިގެން މުޅި ޢިމާރާތްކުރުމުގެ ސިނާޢަތަށްވެސް ވަނީ ބޮޑެތި ބަދަލުތަކެއް އައިސްފައިކަމަށް މަސީން ބުނެއެވެ. އެގޮތުން އެންމެ ބޮޑު ގޮންޖެހުމަކީ ތަކެތި ސަޕްލައި ކުރުމުގައި މިހާރު ހުރި ދަތިތައްކަމަށް މަސީން ފާހަގަކުރެއެވެ.