މޯލްޑިވްސް ބޯޑަރ މައިލްސްގެ އެންމެ މަތީ ދަރަޖަކަމަށްވާ "އަބާރަނަ"އަށް ވާސިލްވާ ފަތުރުވެރިންނަށް ވީއައިޕީގެ ޙިދުމަތް މުޅިން ހިލޭ ލިބޭގޮތަށް ހަމަޖައްސައިފިއެވެ.
މޯލްޑިވްސް ބޯޑަރ މައިލްސް ޕްރޮގްރާމަކީ ކޯވިޑް-19ގެ ބަލިމަޑުކަމާއެކު ދިވެހިރާއްޖޭގެ ބޯޑަރު ބަންދުކުރުމާއި ގުޅިގެން، ފަތުރުވެރިން ރާއްޖެއައުން ހުއްޓި، ޤައުމުގެ އިޤްތިޞާދަށް އައި ހީނަރުކަމުން އަރައިގަނެ، ރާއްޖޭގެ ފަތުރުވެރިކަން އާ ހަރުފަތަކަށް ގެންގޮސް، އިތުރަށް ކުރިއެރުވުމަށްޓަކައި މޯލްޑިވްސް އިމިގްރޭޝަންގެ އިސްނަގައިގެން ތައާރަފްކޮށްފައިވާ ޕްރޮގުރާމެކެވެ. މިއީ ދުނިޔޭގައި ވެސް މިފަދަ ޕްރޮގްރާމެއް ފެށި ފުރަތަމަ ފަހަރެވެ.
މި ޕްރޮގްރާމުގެ ބައިވެރިންނަށް ލިބޭ ޚާއްސަ ފައިދާތައް ބެހިގެންވަނީ 3 ދަރަޖައަކަށެވެ. ބްރޮންޒްއަށް ދީފައިވާ ނަމަކީ "އައިދަ"އެވެ. ސިލްވަރއަށް "އަންތަރަ" ކިޔާއިރު ގޯލްޑަށް ކިޔަނީ "އަބާރަނަ"އެވެ. މިއިން ކޮންމެ ދަރަޖައަކަށް ލިބޭ އިނާޔަތްތައްވެސް ތަފާތެވެ.
ބޯޑަރ މައިލްސްއަށް ފަތުރުވެރިން ޝައުޤުވެރިކުރުވުމަށްޓަކައި މޯލްޑިވްސް އިމިޤްރޭޝަނުން އަންނަނީ ޙާއްސަ އޮފަރތައް ތައާރަފްކުރަމުންނެވެ. އެގޮތުން ބޯޑަރ މައިލްސްގެ އެންމެ މަތީ ޖަރަޖައަށް ވާސިލްވުމުން މާމަހި އެގްޒެކިއުޓިވް ލައުންޖުން ވީއައިޕީގެ ޙިދުމަތް ހިލޭ ލިބޭނެ އިންތިޒާމް ވަނީ ހަމަޖައްސާފައެވެ.
ފަތުރުވެރިން ބޯޓުން ފައިބާ ހިސާބުން ފެށިގެން ކަސްޓަމަރ ސަރވިސް ޓީމުން ފަތުރުވެރިންގެ ހުރިހާ ކަމެއް ބަލަހައްޓާނެކަމަށް އިމިގްރޭޝަނުން ބުނެއެވެ. އޭގެތެރޭގައި ޕާސްޕޯޓާއި ލަގޭޖް ކްލިއަރެންސްގެ ކަންކަން ބަލަހައްޓަދޭނެއެވެ. މީގެއިތުރުން ފަތުރުވެރިން ދާންބޭނުންވާ މަންޒިލަށް ދިއުމާއި ހަމައަށް ބޭނުންވާ ކަންކަން އިންތިޒާމްކޮށްދޭނެއެވެ.
އަބާރަނައާއި ހަމައަށް ވާސިލްވުމަށް ފަތުރުވެރިން 4000 ޕޮއިންޓް ހޯދަންޖެހޭނެއެވެ. އަބާރަނައާއި ހަމައަށް ވާސިލްވެފައިވާ ފަތުރުވެރިން ދަތުރުކުރުމުގެ 48 ގަޑިއިރު ކުރިން ދަތުރުގެ ތަފްސީލް މޯލްޑިވްސް ބޯޑަރ މައިލްސްއާއި ހިއްސާކުރަންޖެހޭނެއެވެ.
މޯލްޑިވްސް ބޯޑަރ މައިލްސްގެ ބްރޭންޑް އެންބެސަޑަރަކަށް ދާދިފަހުން ވަނީ ޖޯސް އެންރިކް ހަމަޖައްސާފައެވެ. މީނާއަކީ ކުރިން ލިވަރޕޫލް އެފްސީ އަދި ނިއުކަރސަލް ޔުނައިޓެޑްގެ ޑިފެންޑަރެއްގެ މަޤާމު އަދާކޮށްފައިވާ ކުޅުންތެރިއެކެވެ. މީނާ މެދުވެރިކޮށް މުޅި ދުނިޔޭގައި މި ޕްރޮގްރާމް އިޝްތިހާރުކުރާނެއެވެ.
ބޯޑަރ މައިލްސް ޕްރޮގްރާމްގައި ބައިވެރިވުމަށް ފަތުރުވެރިން ރާއްޖޭގައި މަދުވެގެން 3 ދުވަސް މަޑުކުރަންޖެހެއެވެ. އަދި މަޑުކުރަންޖެހޭނީ ޓޫރިސްޓް ފެސިލިޓީއެއްގައެވެ.
މޯލްޑިވްސް އިމިގްރޭޝަނުން އިސްނަގައިގެން ޓޫރިޒަމް މިނިސްޓްރީއާއި ގުޅިގެން ތަޢާރަފުކުރި މި ޕްރޮގްރާމުގައި މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯރޕަރޭޝަން، (އެމްއެމްޕީއާރްސީ)އާއި މޯލްޑިވްސް އެއަރޕޯޓްސް ކޮމްޕެނީ ލިމިޓެޑް، އެމް.އޭ.ސީ.އެލް ވަނީ ޕާޓްނަރުންގެ ގޮތުގައި ބައިވެރިވެފައެވެ.