5 ވަނަ ޖީލުގެ މަސްދޯނިފަހަރުގެ ސަބަބުން މަސްވެރިންނަށާއި ދައުލަތަށް ލިބޭ އާމްދަނީ އިތުރުވެގެންދާނެކަމަށް އިކޮނޮމިކް މިނިސްޓަރ ފައްޔާޒު އިސްމާއިލް ވިދާޅުވެއްޖެއެވެ.
މިނިސްޓަރ ފައްޔާޒު މިހެން ވިދާޅުވީ، 5 ވަނަ ޖީލުގެ މަސްދޯނިފަހަރު ފަރުމާކުރުމުގެ އެއްބަސްވުމުގައި ސޮއިކުރުމުގެ ރަސްމިއްޔާތުގައި ވާހަކަފުޅުދައްކަވަމުންނެވެ.
5 ވަނަ ޖީލުގެ މަސްދޯނިފަހަރު ފަރުމާކުރުމުގެ މަސައްކަތް ހަވާލުކޮށްފައިވަނީ ޕްރިސިޝަން މެރިން ޕްރައިވެޓް ލިމިޓެޑްއާއެވެ. މިއީ މިނިސްޓްރީ އޮފް އިކޮނޮމިކް ޑިވެލޮޕްމަންޓްގެ އިސްނެންގެވުމުގެ ދަށުން އެސްޑީއެފްސީއާއި މިނިސްޓްރީ އޮފް ފިޝަރީޒް މެރިން ރިސޯސަސް އެންޑް އެގްރިކަލްޗަރ ގުޅިގެން ކުރިއަށްގެންދާ މަޝްރޫއެކެވެ.
މި ރަސްމިއްޔާތުގައި ވާހަކަދައްކަވަމުން އިކޮނޮމިކް މިނިސްޓަރ ފައްޔާޒު އިސްމާއިލް ވިދާޅުވީ، މަސްވެރިންގެ ފަރާތުން ލިބޭ އެންމެ ބޮޑު ޝަކުވާއަކީ ބާނާމަސްކޮޅު ނުކިރުމާއި ހަމައަގު ނުލިބުންކަމަށެވެ. މިކަމަށް ހައްލު ހޯދުމަށް މިދާއިރާގެ ފަރާތްތަކާއި ވާހަކަދައްކައި ވަރަށް ގިނަ ހިޔާލު ހޯދާފައިވާކަމަށް މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ މަސްބޭނުމުގެ ހަރަދު ބޮޑުވުމާއި މަސް ބޭނުމުގެ ތެރޭގައި މަހުގެ ކޮލިޓީ ދަށްވުމުގެ ސަބަބުން މަހަށް އެންމެ ރަނގަޅު އަގު ނުލިބޭކަމަށެވެ. އަދި މިހާރު ފަރުމާކުރެވިގެންމިދާ 5 ވަނަ ޖީލުގެ މަސްދޯނިފަހަރުގެ ސަބަބުން މިހާރު މަސްބޭނުމުގައި ދިމާވާ ވަރަށް ގިނަ މައްސަލަތަކަކަށް ހައްލެއް ލިބިގެންދާނެކަމަށާއި މަސްވެރިންނަށް ލިބޭ ނަފާ އިތުރުވެ ރަނގަޅު ކޮލެޓީގެ މަސް އެކްސްޕޯޓްކުރުމުގެ ސަބަބުން ޤައުމަށްވެސް މީގެ ސަބަބުން ފައިދާތަކެއް ލިބިގެންދާނެކަމަށް މިނިސްޓަރ ވިދާޅުވިއެވެ.
"އެކިއެކި ފަރާތްތަކުގެ މަޝްވަރާގެ މަތިން އަޅުގަނޑުމެންނަށް ޤަބޫލުކުރެވުނީ މިހާރު މި މަސްބާނާގޮތް ބަދަލުކުރަންޖެހޭކަމަށް. މަސްބާނާ ގޮތޭ މިދެންނެވީ މަސްދޯނިފަހަރުގައި ހުންނަންޖެހޭ ވަސީލަތްތައް ބަދަލުވާންޖެހޭކަމަށް. އެގޮތުން އެންމެ މުހިންމު އެއްކަމަކަށް އަޅުގަނޑުމެންނަށް ޤަބޫލުކުރެވުނީ އައިސްގެ މައްސަލަ. އަޅުގަނޑުމެންނަށް ފެނުނީ އަލަށް ދޯންޏެއް ޑިޒައިން ކުރާއިރުގައި ރަނގަޅަށް ސްޓޯ ކުރެވި ރަނގަޅަށް ޕްރިޒަރ ކުރެވޭނެ ގޮތެއް ހޯދުން." މިނިސްޓަރ ވިދާޅުވިއެވެ.
މި ރަސްމިއްޔާތުގައި ވާހަކަދައްކަވަމުން ފިޝަރީޒް މިނިސްޓަރ ޑރ ހުސައިން ރަޝީދު ހަސަން ވިދާޅުވީ، މި ސަރުކާރުން މަސްވެރިކަމަށް ގެންނަ ހެޔޮ ބަދަލުގެ ދަށުން މަސްވެރިންނަށް ވަރަށް ބޮޑު ފަސޭހަތަކެއް ލިބިގެންދާނެކަމަށެވެ. އަދި އަލަށް ތަޢާރަފްކުރާ މަސްދޯނިތަކާއިއެކު މަސް ބޭނުމަށް މިހާރު ހިނގާ ހަރަދު ކުޑަވެގެންދާނޭކަން މިނިސްޓަރ ފާހަގަކުރެއްވިއެވެ.
"ރައީސް އިބްރާހިމް މުހައްމަދު ސާލިޙްގެ ސަރުކާރުން މިގެންނަ ހެޔޮ ބަދަލުތަކުގެ ސަބަބުން ނަތީޖާއަކަށްވާނީ މަސްބޭނުމަށްޓަކައި އަދި ކިރުމަށްޓަކައި މިޖަހަންޖެހޭ ރޭސް ޖަހަން ނުޖެހުން. އޭރުން މިހާރަށްވުރެ އަގުހެޔޮކޮށް އަޅުގަނޑުމެންނަށް މަސް ބޭނޭނެ. އަޅުގަނޑު އުންމީދުކުރަނީ 5 ވަނަ ޖީލުގެ މަސްދޯނި އަޅުގަނޑުމެންނަށް ތައާރަފްކުރެވުމުންވެސް މި ހެޔޮ ބަދަލު އަންނާނެ. އޭރުން ރޭސްނުޖަހައި އަޅުގަނޑުމެންނަށް މަސް ބާނައިގެން އައިސް މަސް ކިރޭނެ." މިނިސްޓަރ ޑރ. ހުސައިން ވިދާޅުވިއެވެ.
ދިވެހިރާއްޖޭގެ އިޤްތިޞާދު ކުރިއަރުވައި ތަރައްޤީކުރުމަށްޓަކައި ލޯނުއެހީ ފޯރުކޮށްދިނުމަށް އެސްޑީއެފްސީން އިސްކަންދޭ ދާއިރާތަކުގެ ތެރޭގައި މަސްވެރިކަން ހިމެނެއެވެ. އެސްޑީއެފްސީން މިހާތަނަށް މަސްވެރިކަމުގެ ދާއިރާއިން 215 މިލިއަން ރުފިޔާގެ ލޯނު ވަނީ ދޫކޮށްފައެވެ.