ގެސްޓްހައުސް އެސޯސިއޭޝަން އޮފް މޯލްޑިވްސް (ގޭމް)ގެ ނަން، ނެޝަނަލް ހޮޓެލްސް އެންޑް ގެސްޓްހައުސް އެސޯސިއޭޝަން އޮފް މޯލްޑިވްސް (އެންއެޗްޖީއޭ)އަށް ބަދަލު ކުރަން ފާސްކޮށްފިއެވެ. މިގޮތައް ފާސްކޮށްފައިވަނީ އެ އެސޯސިއޭޝަނުން ބޭއްވި 2020ވަނަ އަހަރުގެ އަހަރީ އާންމު ޖަލްސާގައެވެ.
ގޭމްގެ އަހަރީ އާންމު ޖަލްސާ ބާއްވާފައިވަނީ މާފުށީގައެވެ. މެންބަރުންގެ ވޯޓާއިއެކު ގޭމްގެ ނަން ނެޝަނަލް ހޮޓެލްސް އެންޑް ގެސްޓްހައުސް އެސޯސިއޭޝަން އޮފް މޯލްޑިވްސްއަށް ބަދަލުކުރަން ނިންމާފައިވެއެވެ. މީގެ މައިގަނޑު ބޭނުމަކީ ހަމައެކަނި ގެސްޓްހައުސްތަކުގެ ނަމުގައި ވަކާލާތު ކުރަމުން ދިޔަ އެސޯސިއޭޝަން، ހޮޓާތަކުގެ ހައްގުގައިވެސް ވަކާލާތު ކުރެވޭ ޖަމްޢިއްއެއްގެ ގޮތުގައި ހެދުމަށެވެ.
އަހަރީ އާންމު ޖަލްސާގައިވަނީ އެސޯސިއޭޝަން ރީބްރޭންޑްކުރަން ބަޔަކާ ޙަވާލުކޮށްފައެވެ. އެ އެސޯސިއޭޝަނުން ބުނީ މި ހަފްތާ ތެރޭގައި ރީބްރޭންޑް ކުރުމުގެ ހުރިހައި މަސައްކަތެއް ނިންމާލެވޭނެކަމަށެވެ.
އެސޯސިއޭޝަންގެ ނަން ރީބްރޭންޑް ކުރުމާއެކު މިހާރަށްވުރެ ފުޅާކޮށް އެސޯސިއޭޝަންގެ މަސައްކަތްތައް ކުރެވިގެންދާނެކަމަށް އެ އެސޯސިއޭޝަނުން ބުނެއެވެ. އެގޮތުން މިހާރަށްވުރެ ގާތުން ގެސްޓްހައުސްތަކާއިއެކު މަސައްކަތްކުރެވި އަދި ކުދި ވިޔަފާރިތަކަށް އެހީތެރިކަން ފޯރުކޮށްދެވިގެންދާނެކަމަށްވެސް އެ އެސޯސިއޭޝަނުން ވަނީ ބުނެފައެވެ.
މީގެއިތުރުން އެ އެސޯސިއޭޝަނުން ކުރިއަށްއޮތް ތަނުގައި ގެސްޓްހައުސްތައް އިޝްތިހާރުކުރުމަށް ގިނަ މަސައްކަތްތަކެއް ކުރުމަށް ހަމަޖެހިފައިވާކަމަށް ވަނީ ބުނެފައެވެ. އެގޮތުން ގެސްޓްހައުސްތައް އިޝްތިހާރުކުރުމަށް ރާއްޖެއިން ބޭރުގައި ރޯޑްޝޯއެއް ބޭއްވުމާއި، އެވޯޑް ގައިޓެއް ބޭއްވުމަށް ހަމަޖެހިފައިވާކަމަސް އެ އެސޯސިއޭޝަނުން ބުނެއެވެ.