ބަންގްލަދޭޝްގެ "ޔޫއެސް ބަންގްލާ" އެއަރލައިންގެ ދަތުރުތައް ރާއްޖެއަށް ފެށުމަށް އެ އެއަރލައިނުން ނިންމައިފިއެވެ. މިއީ ބަންގްލަދޭޝްގެ އަމިއްލަ އެއަރލައިނެކެވެ.
ޔޫއެސް ބަންގަލާ އެއަރލައިނާ ޙަވާލާދީ އެޤައުމުގެ ރިޕޯޓްތަކުން ބުނެފައިވަނީ ސައުތު އޭޝިއާގެ އެންމެ މަޤްބޫލު މަންޒިލަށް ދަތުރުފެށުމަށް އެ އެއަރލައިނުން މިހާރު ތައްޔާރުވެފައިވާކަމަށެވެ. މި އެއަރލައިނުން ރާއްޖެއަށް ދަތުރުފަށާނީ ނޮވެމްބަރު މަހުގެ 3ވަނަ ހަފްތާއިން ފެށިގެންނެވެ.
މި އެއަރލައިނުން ރާއްޖެއަށް ދަތުރުކުރާނީ ބަންގްލަދޭޝްގެ ޑާކާއިން ރާއްޖެއަށެވެ. "ޔޫއެސް ބަންގްލާ" އިން ރާއްޖެއަށް ހަފްތާގެ 4ދުވަހު ދަތުރުކުރުމަށް ވަނީ ހަމަޖެހިފައެވެ. އެ އެއަރލައިނުން ރާއްޖެއަށް ދަތުރުފެށުމަށް ނިންމީ ބަންގްލަދޭޝްގެ ފަތުރުވެރިން ރާއްޖެ އަންނަން ބޭނުންވާތީކަމަށް ވަނީ ބުނެފައެވެ. އެހެންކަމުން ދަތުރުފެށުމުގެ ސަބަބުން ބަންގްލަދޭޝްގެ ފަތުރުވެރިންނަށް ހެޔޮއަގުގައި ފަސޭހަކަމާއިއެކު ރާއްޖެ އައުމުގެ ފުރުސަތު ފަހިކޮށްދިނުމަށްކަމަށް ވަނީ ބުނެފައެވެ. މީގެއިތުރުން މި ދަތުރުތަކުގެ ސަބަބުން ބަންގްލަދޭޝްގައި ދިރިއުޅޭ ދިވެހިންނަށްވެސް ފަސޭހަވެގެންދާނެއެވެ.
ނޮވެމްބަރ މަހުން ފެށިގެން އެ އެއަރލައިނުން ފަށާ މި ދަތުރުތަކުގައި ބޭނުންކުރާނީ 164 މީހުންގެ ޖާގައިގެ ބޯޓުތަކެކެވެ. އެއީ ބޮއިންގ 800-737 މަރުކާގެ ބޯޓުތަކެކެވެ. "ޔޫއެސް ބަންގްލާ" އެއަރލައިނުން މިހާރުވެސް އަންނަނީ ދުނިޔޭގެ ގިނަ މަންޒިލްތަކަކަށް ދަތުރުކުރަމުންނެވެ. އޭގެތެރޭގައި ދުބާއީ، މަސްކަޓް، ދޯހާ ފަދަ މަންޒިލްތައް ހިމެނެއެވެ.