މިއަހަރުގެ މިހާތަނަށް ރާއްޖެއަށް 8 ލައްކައަށްވުރެ ގިނަ ފަތުރުވެރިން ޒިޔާރަތްކޮށްފިއެވެ. މިއީ މިދިޔަ އަހަރުގެ މި މުއްދަތާއި އަޅާބަލާއިރު %104.4 އިތުރުވުމެކެވެ.
ޓޫރިޒަމް މިނިސްޓްރީގެ ތަފާސް ހިސާބުތައް ދައްކާގޮތުން ޖަނަވަރީ މަހުގެ 1 ވަނަ ދުވަހުން މިމަހުގެ 13 ވަނަ ދުވަހާއި ހަމައަށް ރާއްޖެ އައިސްފައިވަނީ 809،764 ފަތުރުވެރިންނެވެ. މިދިޔަ އަހަރުގެ މި މުއްދަތުގައި ރާއްޖެ އައިސްފައިވަނީ 396،129 ފަތުރުވެރިންނެވެ.
ވަކިވަކި މަސްމަހަށް ބަލާއިރު ރާއްޖެއައި ފަތުރުވެރިންގެ އަދަދު އުޅެނީ:
- ޖަނަވަރީ 92،103 ފަތުރުވެރިން
- ފެބްރުއަރީ 96،882 ފަތުރުވެރިން
- މާރޗް 109،585 ފަތުރުވެރިން
- އޭޕްރީލް 91،200 ފަތުރުވެރިން
- މޭއި 64،613 ފަތުރުވެރިން
- ޖޫން 56،166 ފަތުރުވެރިން
- ޖުލައި 101،818 ފަތުރުވެރިން
- އޮގަސްޓް 143،599 ފަތުރުވެރިން
- ސެޕްޓެމްބަރ މަހުގެ 13ގެ ނިއލަށް 53،798 ފަތުރުވެރިން
ޓޫރިޒަމް މިނިސްޓްރީގެ ތަފާސް ހިސާބުތައް ދައްކާގޮތުން މިމަހުގެ މިހާތަނަށް އެއްދުވަހެއްގެ ތެރޭގައި ރާއްޖެއަށް އެންމެ ގިނަ ފަތުރުވެރިން އައިސްފައިވަނީ މިމަހުގެ 12 ވަނަ ދުވަހުއެވެ. އެދުވަހު ރާއްޖެއަށް 4862 ފަތުރުވެރިން ވަނީ އައިސްފައެވެ. ރާއްޖެއަންނަ ފަތުރުވެރިންގެ އަދަދު މިހާރު އިތުރުވަމުން އަންނައިރު އެވްރެޖްކޮށް ދުވާލެއްގެ މައްޗަށް ރާއްޖެ އަންނަ ފަތުރުވެރިންގެ އަދަދު އުޅެނީ 4000 އިން މަތީގައެވެ.
ރާއްޖެއަށް މިހާރު އެންމެ ގިނައިން ފަތުރުވެރިން އަންނަނީ އިންޑިއާއިންނެވެ. އެގޮތުން އަހަރުގެ މިހާތަނަށް ރާއްޖެއައި ފަތުރުވެރިންގެ %22.4 އަކީ އިންޑިއާ ފަތުރުވެރިންނެވެ. 2 ވަނައަށް އެންމެ ގިނައިން ފަތުރުވެރިން އައިސްފައިވަނީ ރަޝިއާއިންނެވެ. ރަޝިޔާއިން %20.4 ފަތުރުވެރިން އައިސްފައިވާ ކަމަށް ޓޫރިޒަމް މިނިސްޓްރީގެ ތަފާސް ހިސާބުތައް ދައްކައެވެ.