ހިޔާ ފްލެޓަށް ބޭނުންވާ ތަކެތި ގަތުމަށް އެމްއައިބީން ފަސޭހަ ގޮތްތަކެއް

ހިޔާ ފްލެޓް ލިބިލެއްވި ފަރާތްތަކުގެ ތެރެއިން މޯލްޑިވްސް އިސްލާމިކް ބޭންކްގެ "އުޖާލާ ދިރިއުޅުން" ނަންގަވާ ފަރާތްތަަކަށް ފްލެޓް ނިންމަން ބޭނުންވާ ތަކެތި ފަސޭހަކަމާއެކު ލިބޭނެ އިންތިޒާމްތަކެއް ހަމަޖައްސައިދީފައިވާކަމަށް އެ ބޭންކުން ބުނެފިއެވެ.

މި ފެސިލިޓީއަކީ މަހުންމަހުން ބަހާލައިގެން ފައިސާ ދައްކާގޮތަށް އިސްލާމީ ޝަރީޢާގެ ހަމަތަކުގެ މަތިން ދެވޭ ފެސިލިޓީއެކެވެ.

އެމްއައިބީން ބުނީ މި ސްކީމްގެ ދަށުން ހިޔާ ފްލެޓްގެ ފިނިޝިންގއަށް ބޭނުންވާ ތަކެތި ގަނެ އެތަނަށް ވަނުމަށްފަހު، ތަނަށް ބޭނުންވާ ފަރުނީޗަރުވެސް ލިމިޓްގެ ދަށުން އެއްވެސް ޑޮކިއުމަންޓަކާއި ނުލައި ގަނެވޭނެކަމަށެވެ. އަދި ލިމިޓް އެޕްރޫވްވުމުން ކޯޓޭޝަން ގެނައުމުން ލިމިޓްއަށް ވާވަރަށް 6 މަސްދުވަހުގެ ތެރޭގައި ތަކެތި ގަނެވޭނެކަމަށް އެމްއައިބީން ބުނެއެވެ.

މި ސްކީމްގެ ދަށުން އެމްއައިބީން ޤަބޫލުކުރާ ކޮންމެ ފިހާރައަކުންވެސް ތަކެތި ގަނެވޭނެއެވެ. އަދި 1 ފިހަރައަށްވުރެ ގިނަ ފިހާރައިންވެސް ތަކެތި ގަނެވޭނެ އިންތިޒާމް ވަނީ ހަމަޖައްސާފައެވެ. ހިޔާ ފްލެޓް ލިބިލެއްވި ފަރާތްތަކަށް އެމްއައިބީ އުޖާލާގެ ދަށުން ތަން ނިންމުމުގެ މަސައްކަތާއިއެކު ކޯޓޭޝަން ނަންގަވާނަމަ ބޭންކަށް ފައިސާ ދައްކަންޖެހޭނީ މަސައްކަތް ނިމުމުންނެވެ. އެމްއައިބީން ބުނީ ހިޔާ ފްލެޓް ލިބުނު ފަރާތް ފިޔަވައި އެހެން ފަރާތަކަށްވެސް ފައިނޭންސްއަށް އެދި ހުށައެޅޭނެއެވެ.

މި ފެސިލިޓީގެ ދަށުން 50،000 އިން ފެށިގެން 400،000 ރުފިޔާއާއި ހަމައަށް ފައިނޭންސް ނެގޭނެއެވެ. މި ފެސިލިޓީއަށް އުމުރުން 18 އަހަރުގެ ވަޒީފާ އަދާކުރާ ނުވަތަ ކުލި ލިބޭ ކޮންމެ މީހަކަށްވެސް ހުށައެޅޭނެއެވެ. އެގޮތުން މުސާރައިގެން ގޮތުގައި މަދުވެގެން 4000 ރުފިޔާ ލިބޭ ކޮންމެ މީހަކަށްވެސް ފެސިލިޓީއަށް އެދި ހުށައެޅޭނެއެވެ. އަދި ފައިސާ އަނބުރާ ދައްކަން 18 މަހާއި 48 މަހުގެ މުއްދަތެއް ލިބިގެންދާނެއެވެ.

މި ފެސިލިޓީގެ ދަށުން ފައިނޭންސް ލިބޭނެ އަދަދު:
މުސާރަ 4،000 ރުފިޔާ : ފައިނޭންސްގެ ގޮތުގައި 50،000 ރުފިޔާ
މުސާރަ 7،000 ރުފިޔާ : ފައިނޭންސްގެ ގޮތުގައި 100،000 ރުފިޔާ
މުސާރަ 10،000 ރުފިޔާ : ފައިނޭންސްގެ ގޮތުގައި 150،000 ރުފިޔާ
މުސާރަ 12،400 ރުފިޔާ : ފައިނޭންސްގެ ގޮތުގައި 200،000 ރުފިޔާ
މުސާރަ 15،500 ރުފިޔާ : ފައިނޭންސްގެ ގޮތުގައި 250،000 ރުފިޔާ
މުސާރަ 18،600 ރުފިޔާ : ފައިނޭންސްގެ ގޮތުގައި 300،000 ރުފިޔާ
މުސާރަ 20،000 ރުފިޔާ : ފައިނޭންސްގެ ގޮތުގައި 350،000 ރުފިޔާ
މުސާރަ 22،300 ރުފިޔާ : ފައިނޭންސްގެ ގޮތުގައި 400،000 ރުފިޔާ

މި ފެސިލިޓީ ނަގާ ފަރާތްތަކުގެ ކުލި ނުވަތަ މުސާރަ އެމްއައިބީގެ އަކައުންޓަކަށް ޖަމާކުރާނަމަ މަހެއްގެ މައްޗަށް ދައްކަންޖެހޭ އަދަދުން ޑިސްކައުންޓްވެސް ލިބިގެންދާނެއެވެ. މި ސްކީމްގެ ދަށުން ހިޔާ ފްލެޓް ނިންމުމަށް ބޭނުންވާ ހުރިހާ ސާމާނަކާއިއެކު މަސައްކަތަށްވެސް ފައިސާ ދެއްކެވޭނެއެވެ. އަދި ފްލެޓް މަސައްކަތް ނިމުމުން އެތަނަށް ބޭނުންވާ ފަރުނީޗަރު އަދި ހިފާ ގެންގުޅޭސާމާނުވެސް ގަނެވޭނެއެވެ.