ފްރާންސްގައި ރާއްޖެ އިޝްތިހާރުކުރުމަށް ވިޒިޓް މޯލްޑިވްސްއިން ކެމްޕެއިނެއް ފަށައިފިއެވެ. މި ކެމްޕެއިން ކުރިއަށްގެންދަނީ ފްރާންސްގެ ޓުއަރ އޮޕަރޭޓަރެއްކަމަށްވާ "އަމްޕްލިޓުޑެސް" އާއި ގުޅިގެންނެވެ.
ފްރާންސްގައި ރާއްޖެ އިޝްތިހާރުކުރުމަށް ވިޒިޓް މޯލްޑިވްސްއިން މި ކެމްޕެއިން ފަށާފައިވަނީ މިމަހުއެވެ. ވިޒިޓް މޯލްޑިވްސްއިން ބުނީ މިއީ ސޯޝަލް އެންޑް ޑިޖިޓަލް މީޑިއާ ކެމްޕެއިނެއްކަމަށެވެ. ފްރާންސްގެ ޓުއަރ އޮޕަރޭޓަރެއްކަމަށްވާ "އަމްޕްލިޓުޑެސް" އާއި ގުޅިގެން ކުރިއަށް ގެންދާ މި ކެމްޕެއިންގައި، 1 މަހަށްވުރެ ގިނަ ދުވަހު ފްރާންސްގައި ރާއްޖެ އިޝްތިހާރުކުރާނެއެވެ.
"އަމްޕްލިޓުޑެސް" އަކީ ފްރާންސްގައި ކުރިއަރާފައިވާ ޓްރެވެލް އޮޕަރޭޓަރެކެވެ. އެމީހުންގެ ވެބްސައިޓަށް މަހެއްގެ މައްޗަށް 60،000 މީހުން ޒިޔާރަތްކުރެއެވެ. އަދި އެމީހުންގެ ނިއުސްލެޓަރ މަހެއްގެ މައްޗަށް 200،000 މީހުން ކިޔައެވެ.
މި ކެމްޕެއިންގެ މަޤްސަދަކީ ރާއްޖެއަކީ ރައްކާތެރި މަންޒިލެއްކަން ބުނެދީ ފްރާންސް ފަތުރުވެރިންގެ މެދުގައި ރާއްޖޭގެ މަޤްބޫލުކަން އިތުރުކުރުމެވެ. އެމީހުންގެ ވެބްސައިޓުގައި މިހާރުވެސް ވަނީ ރާއްޖެއާއި ބެހޭ މައުލޫމާތު ޝާޢިއުކޮށްފައެވެ. އެގޮތުން ރާއްޖޭގެ ބައެއް ރިސޯޓްތަކުގެ މައުލޫމާތާއި ރާއްޖެއިން ފަތުރުވެރިންނަށް ކުރެވެންހުރި ތަފާތު ތަޖުރިބާތަކުގެ ވާހަކަ ވަނީ ހިމަނާފައެވެ.
ވިޒިޓް މޯލްޑިވްސްއިން "އަމްޕްލިޓުޑެސް" އާއިއެކު ވެފައިވާ އެއްބަސްވުމުގެ ދަށުން "ލެރޫޓް ސްކިން" ވެބްސައިޓްގައިވެސް ރާއްޖެއާއިބެހޭ މައުލޫމާތު ހިމަނާނެއެވެ. މި ވެބްސައިޓަށް މަހެއްގެ މައްޗަށް ވަންނަ މީހުންގެ އަދަދު އުޅެނީ 6 މިލިއަނުން މަތީގައެވެ.
މިއަހަރުގެ މިހާތަނަށް ފްރާންސް ހިމެނެނީ ރާއްޖެއަށް 10 ވަނައަށް އެންމެ ގިނަ ފަތުރުވެރިން އައި ޤައުމުގެ ގޮތުގައެވެ. ކޯވިޑުގެ ކުރިން ފްރާންސަކީ ރާއްޖެއަށް 7 ވަނަ އަށް އެންމެ ގިނަ ފަތުރުވެރިން އަންނަ ޤައުމެވެ.