މިއަހަރުގެ ފަހުކޮޅު ކޭ ޕާކް ރެސިޑެންސްގެ މަސައްކަތް ނިމޭނެކަމަށް އެ ޕްރޮޖެކްޓް ހިންގާ ކުންފުނިން ބުނެފިއެވެ.
ހުޅުމާލޭގެ ސެންޓްރަލް ޕާކު ސަރަހައްދުގައި އިމާރާތް ކުރާ ކޭ ޕާކް ރެސިޑެންސް އެޕާޓްމަންތަކަކީ އަމިއްލަ ފަރާތަކުން އިމާރާތްކުރާ ލަގްޒަކީ އެޕާޓްމަންޓްތަކެކެވެ.
ކޭ ޕާކް ރެސިޑެންސްގެ މަސައްކަތްތަކާއި ގުޅޭގޮތުން ނޫސްވެރިންނަށް މައުލޫމާތުދެއްވަމުން މި މަސައްކަތް ކުރިއަށްގެންދާ ކޮރެއާގެ ހަންބޯ ކުންފުނީގެ ޑިރެކްޓަރ ޖޮންކޮން ކިމް ވަނީ މި ޕްރޮޖެކްޓް ލަސްވުމުން އެކަމަށް ކަސްޓަމަރުންގެ ކިބައިން މައާފަށް އެދިފައެވެ. އޭނާ ވިދާޅުވީ، މަޝްރޫއު ލަސްވީ ކޯވިޑް19ގެ ސަބަބުން އެ ކުންފުންޏަށް ދިމާވި ދަތިތަކެއްގެ ސަބަބުންކަމަށެވެ. ނަމަވެސް މިއަހަރުގެ ފަހުކޮޅު ކޭޕާކް ރެސިޑެންސްގެ މަސައްކަތް ނިންމައި އެންމެ ލަސްވެގެން އަންނަ އަހަރުގެ ކުރީކޮޅު މިތަނުގައި މީހުންނަށް ދިރިއުޅެވޭނެކަމަށް އޭނާ ވިދާޅުވިއެވެ.
ކޭ ޕާކް ރެސިޑެންސްގެ މަސައްކަތްކުރާ ކުންފުނިން ބުނީ މި މަސައްކަތް ނިންމުމަށް ބޭނުންވާ ހުރިހާ ސާމާނު މިހާރު ސައިޓަށް ގެނެސްފައިވާކަމަށެވެ. އަދި އެޕާޓްމަންޓްތަކަށް ބޭނުންވާ ކަރަންޓުގެ އެކިއެކި ސާމާނު އަންނަ މަހު ސައިޓަށް ގެނެވޭނެކަމަށް އެ ކުންފުނިން ވިދާޅުވެއެވެ. މި މަސައްކަތް ނިންމުމަށް ކަނޑައަޅާފައިވާ ތާރީހަށް ނިންމުމަށްޓަކައި ހޮންގކޮން އަދި ޗައިނާއިން އިތުރު 25 މީހުން މަސައްކަތްކުރުމަށް ގެނެސްފައިވާކަމަށްވެސް އެ ކުންފުނިން ވަނީ ބުނެފައެވެ.
ކޭ ޕާކް ރެސިޑެންސްގެ ރަސްމީކޮށް ލޯންޗްކޮށްފައިވަނީ 2016 ވަނަ އަހަރުގެ ނޮވެމްބަރ މަހުގެ ތެރޭގައެވެ. ކޭ ޕާކް ރެޒިޑެންސަކީ ކޮރެއަން ސްޓައިލަށް ތަރައްގީކުރާ މިކްސް-ޔޫސް ރެސިޑެންޝަލް އެޕާޓުމަންޓުތަކެކެވެ. 14 ބުރީގެ މި އިމާރާތުގައި 110 އެޕާޓްމަންޓް ހުންނާނެއެވެ.