އިސްލާމް ދީނަށް ފުރައްސާރަކުރުން ހުއްޓުވުމަށް ޤާނޫނުލް އުޤޫބާތަށް ހުށައެޅުއްވި އިޞްލާހަކީ، ދީނުގެ އަސާސްތައް ނަގަހައްޓައި، ދީނީ އެއްބައިވަންތަކަން ދެމެހެއްޓުމަށް މުހިންމު ބިލެއްކަމަށް އެ ބިލު ހުށައެޅުއްވި ތުޅާދޫ ދާއިރާގެ މެންބަރު ޙިސާން ޙުސައިން ވިދާޅުވެއްޖެއެވެ.
ޤާނޫނުލް އުޤޫބާތަށް ޙިސާން ހުށައެޅުވި އިޞްލާހުގެ ބަހުސް މިއަދު މަޖިލީހުގައި ވަނީ ފައްޓަވާފައެވެ.
ރައްޔިތުންގެ މަޖިލީހުގެ މިއަދުގެ ޖަލްސާއަށް ބިލު ހުށައަޅުއްވަމުން ތުޅާދޫ ދާއިރާގެ މެންބަރު ޙިސާން ޙުސައިން ވިދާޅުވީ، ދިވެހިރާއްޖެއަކީ އިސްލާމީ ގައުމެއްކަމަށާއި، ރާއްޖޭގެ މުޅި ދައުލަތް ތަރުތީބުވެ ބައްޓަންކުރަންވާނީ އިސްލާމީ އުސޫލުތަކުގެ މައްޗަށްކަމަށެވެ. އަދި އެކަން ޤާނޫނުއަސާސީގައި ވަރަށް ސާފުކޮށް ބަޔަންކޮށްފައިވާކަން ފާހަގަކުރައްވަމުން ޙިސާން ވިދާޅުވީ، އިސްލާމީ ޝަރީޢަތުގައި ނުވަތަ ޤާނޫނުގައި ކަނޑައެޅިގެން މަނާކޮށްފައިނުވާ ކޮންމެ ކަމެއްކުރުމުގެ މިނިވަންކަން ކޮންމެ ރައްޔިތަކަށްމެ ލިބިގެންވާކަމަށެވެ.
ޙިސާން ވިދާޅުވީ ޤާނޫނުލް އުގޫބާތަށް ހުށައެޅުއްވި އިޞްލާހަކީ، މިހާރު ދިވެހިރާއްޖެއަށް ވަރަށް މުހިންމުވެފައިވާ ބިލެއްކަމަށް ދެކެވަޑައިގަންނަވާކަމަށެވެ. ދިވެހިރާއްޖޭގެ އިސްލާމީ ވެށި ހިމާޔަތްކުރުމާއި އިސްލާމީ އަގުކުރުންތައް މަތިވެރިކުރުމަށްޓަކައި އެބިލު މުހިންމު ދައުރެއް އަދާކުރާކަމަށާއި، މަދުން ނަމަވެސް، އިސްލާމްދީނަށް ކުޑައިމީސް ވާގޮތަށް ވާހަކަދެއްކުމާއި، ދީނީ ޝިއާރުތަކާއި ބައެއް ކަހަލަ ތަސައްވުރުތަކަށް އިހާނެތިކޮށް ވާހަކަދެއްކުމަކީ މުޖްތަމައިން ފެންނަމުންދާ ކަމެއްކަމަށް ޙިސާން ވިދާޅުވިއެވެ. މިކަމަކީ ޤާނޫނުއަސާސީ ތަންދޭކަމެއް ނޫންކަމަށްވެސް ޙިސާން ވިދާޅުވިއެވެ.
"ވަކި މީހަކީ ކާފަރެއް ކަމުގައި ލޭބަލްކޮށް، އޭނާގެ ފުރާނަ ނުރައްކަލަށް ހުށަހެޅިދާނޭ ފަދަ ވާހަކަ ދެއްކުން ކުށަކަށް ހެދުމަށްޓަކައި މި މަޖިލީހަށް ސަރުކާރުން ބިލެއް ހުށަހަޅާފައިވޭ. އޭގެ ބޭނުމަކީ އެފަދަ ކަންކަމުން އުފެދޭ ފިތުނަތަކުން ދުރުވުން. އަޅުގަނޑުމެންގެ ދީނީ އެއްބައިވަންތަކަމަށް ލޮޅުން އެރިޔަ ނުދިނުން. އެ ބިލުގެ މަގުސަދާއި، މި ބިލުގެ މަގުސަދަކީވެސް، އިސްލާމް ދީނުގައި، އެފަދަ ކަންކަމުގައި ކަނޑައަޅާފައި ހުރި ހަރުދަނާ އުސޫލުތައް ނެގެހެއްޓުން." ހިސާން ވިދާޅުވިއެވެ.
މި ބިލަށް ވާހަކަދައްވަމުން ދާންދޫ ދާއިރާގެ މެންބަރު ޔަޢުޤޫބު ޢަބްދުﷲ ވިދާޅުވީ، މިސަރުކާރުން ހަރުކަށި ފިކުރާއި އިސްލާމްދީނަށް ފުރައްސާރަކުރުންފަދަ ދީނުގެ އަސްލަކަށް ގެއްލުންވާފަދަ އެއްވެސްކަމަކަށް ޖާގަ ނުދޭކަން ފެނިގެންދާކަމަށެވެ. އަދި އިސްލާމް ދީނާއި ޚިލާފް އެއްވެސްކަމަށް ސަރުކާރުން ޖާގަ ނުދޭނެކަމުގެ ޔަޤީންކަން އެބައޮތްކަމަށްވެސް ޔަޢުޤޫބު ވިދާޅުވިއެވެ.
"އެއްވެސް ބިލެއްގައި ދީނާއި ޚިލާފް ނުަވަތަ ދީނީ ކަންކަމާއި ފުށުއަރާކަމެއް އޮވެއްޖެކަމަށްވާނަމަ އަޅުގަނޑު އެކަމާއި ދެކޮޅަށް ހުންނާނެވާހަކަ ދަންނަވަން. އަޅުގަނޑަށް ފެންނަ ގޮތުގައި މިރާއްޖޭގައި މަލްޓިޕާޓީ ޑިމޮކްރަސީ ފެށުނުފަހުން އިސްލާމްދީނުގެ އުސޫލްތައް ހިފެހެއްޓުމާއި އިސްލާމް ދީން ނެގެހެއްޓުމަށްޓަކައި މިސަރުކާރުން ކުރިވަރުގެ މަސައްކަތްކުރި އެއްވެސް ސަރުކާރެއް މިވީހާތަނަށް ފެނިފައެއް ނެތް. އަޅުގަނޑުމެންނަށް ފެނުނު ފާއިތުވެގެންދިޔަ ސަރުކާރުގަ ރައިސް ޔާމީންގެ ސަރުކާރުގަ ހަރުކަށި ފިކުރުގެ އެއްވެސް ފަރާތަކާމެދު އެއްވެސް ފިޔަވަޅެއް އެޅިތަނެއް އަޅުގަނޑުމެންނަށް ފެނިފައެއް ނެތް. އޭގެ ބަދަލުގައި އަޅުގަނޑުމެންނަށް ފެނިގެން ދިޔައީ ހަރުކަށި ފިކުރުގެ މީހުންނަށް ފުރުޞަތު ދީގެން އެމީހުން ބޭނުންވާގޮތަށް މާހައުލު ތަނަވަސްކޮށްދީގެން ވެރިކަމުގެ ނިޒާމް ހިންގަމުންދިޔަ ސަރުކާރެއް."
މި ބިލަށް ބަހުސްކުރެއްވި ގިނަ މެންބަރުން ވަނީ، އިސްލާމް ދީން ޕްރޮމޯޓްކޮށް، އެނޫން ދީނެއް ނޯންނާނެކަން ރައީސުލްޖުމްހޫރިއްޔާ އެތައް ފޯރަމެއްގައި ވިދާޅުވެފައިވާކަން ފާހަގަކުރައްވާފައެވެ. އަދި އެނޫން ފިކުރެއް ފަތުރަން ރާއްޖެއިން ޖާގަ ނުދޭނެކަމަށްވެސް މެންބަރުން ވިދާޅުވިއެވެ.
ޤާނޫނުލްއުޤޫބާތަށް ޙިސާން ހުށައެޅުއްވި އިޞްލާހުގައި ވަނީ، މުއާޞަލާތީ ވަސީލަތެއް ބޭނުންކޮށްގެން ނުވަތަ އެނޫންވެސް ގޮތަކަށް ޢާންމުންގެ ކުރިމަތީގައި، އިސްލާމްދީނަށް ތައުރީނުކުރުމުގެ ނިޔަތުގައި ބަހުން ނުވަތަ އިސްލާމްދީނަށް ފުރައްސާރަކުރުމަކީ ކުށެއްކަމަށް ކަނޑައެޅުމަށެވެ.