ހުޅުމާލޭގައި ހުންނަ މުހައްމަދު ގާސިމް ޕްރީ ސްކޫލް މަރާމާތުކޮށް 45 ދުވަހުގެ ތެރޭގައި ނިންމަން ބަޔަކާއި ހަވާލުކޮށްފިއެވެ. މި މަސައްކަތް ހަވާލުކޮށްފައިވަނީ އޭއާރު ބިޒްނަސް މޯލްޑިވްސް ކުންފުންޏާއެވެ.
މި އެއްބަސްވުމުގައި އެޑިއުކޭޝަން މިނިސްޓްޜިން ސޮއިކުރެއްވީ އެ މިނިސްޓްރީގެ ސްޓޭޓް މިނިސްޓަރު އަހުމަދު ރިޔާޒުއެވެ. އަދި އޭއާރު ބިޒްނަސް މޯލްޑިވްސް އިން ސޮއިކުރީ އެ ކުންފުނީގެ މެނޭޖިން ޑިރެކްޓަރު އަލީ ރަޝީދުއެވެ. 1.9 މިލިއަން ރުފިޔާގެ މި މަސައްކަތް ނިންމާ ސްކޫލް އަންނަ އޮކްޓޫބަރުމަހުގެ ތެރޭގައި އެޑިއުކޭޝަން މިނިސްޓްރީއާއި ހަވާލުކުރަންޖެހެއެވެ.
މި ޕްރީ ސްކޫލް ހިންގުމަށް ހައުސިން ޑިވެލޮޕްމަންޓް ކޯޕަރޭޝަނުން އެޑިއުކޭޝަން މިނިސްޓްރީއާ އެ ތަން ހަވާލުކުރީ 2019 ވަނަ އަހަރުގެ ޖެނުއަރީ މަހުގައެވެ. އެތަން ހިންގާނެ ބަޔަކު ހޯދަން އެޑިއުކޭޝަން މިނިސްޓްރީން ހަތަރެއްގެ ފަހަރެއްގެ މަތިން އިއުލާންކުރުމަށްފަހު އެންމެ ފަހުން ނިންމީ ސީދާ މިނިސްޓްރީން އެތަން ހިންގުމަށެވެ.
އޯޓިޒަމް ސެންޓަރު ކައިރީގައި ހުންނަ 10 ކްލާސްރޫމުގެ ޕްރީ ސްކޫލުގައި މިއަހަރުގެ ދިރާސީ އަހަރު ފެށި އިރު ކިޔަވައިދޭން މަސައްކަތް ކުރިއެވެ. ނަމަވެސް ކޯވިޑާއި ގުޅިގެން ފްލޫ ކްލިނިކެއްގެ ގޮތުގައި ޕްރީ ސްކޫލު އިމާރާތް ބޭނުންކުރުމުން އެކަން ލަސްވެގެން ދިޔައީއެވެ.
ކޮމްޕިއުޓަރ ރޫމަކާއި ހޯލަކާއި ސްޓާފް ރޫމެއްވެސް ހިމެނޭ ގޮތަށް ހެދި ޕްރީ ސްކޫލް ކުރީގެ ރައީސް އަބްދުﷲ ޔާމީންގެ ސަރުކާރުގައި ބޭނުންކުރީ ކެމްޕެއިން ޖަގަހައެއްގެ ގޮތުގައެވެ.