ކޯވިޑަށްފަހު ރާއްޖޭގެ ފަތުރުވެރިކަން މިހާރު ރަނގަޅުވަމުން އަންނައިރު، މިއަހަރު ރާއްޖެއަށް 1.1 މިލިއަން ފަތުރުވެރިން އަންނާނެކަމަށް ލަފާކުރެވޭކަމަށް މޯލްޑިވްސް މަނިޓަރީ އޮޓޯރިޓީ އެމްއެމްއޭ، ގަވަރުނަރު އަލީ ހާޝިމް ވިދާޅުވެއްޖެއެވެ.
އެމްއެމްއޭއިން ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ގަވަރުނަރު އަލީ ހާޝިމް ވިދާޅުވީ، ކޯވިޑްގެ ސަބަބުން އިޤްތިސާދަށް އެންމެ ބޮޑަށް އަސަރުކުރި ޤައުމުތަކުގެ ތެރޭގައި ރާއްޖެ ހިމެނޭކަމަށެވެ. އަދި އިޤްތިޞާދުގައި ހިމެނޭ މައިގަނޑު ސިނާއަތްތަކުން މިހާރު ކުރިއެރުން ހޯދަމުން އަންނަކަމަށް ގަވަރުނަރު ވިދާޅުވިއެވެ.
ގަވަރނަރ ވިދާޅުވީ ކުރިއަރަމުން އަންނަ ސިނާއަތްތަކުގެ ތެރޭގައި ފަތުރުވެރިކަން ހިމެނޭއިރު މިދިޔަ ޖުލައިމަހަކީ ކޯވިޑަށްފަހު ރާއްޖޭގެ ބޯޑަރު ހުޅުވާލިފަހުން ފަތުރުވެރިންގެ ނަންބަރުތަކުން އެންމެ ރަނގަޅު ނަތީޖާ ހާސިލްކުރި މަސްކަމަށް ގަވަރުނަރ ފާހަގަކުރެއްވިއެވެ.
މި އޮގަސްޓް މަހުވެސް ފަތުރުވެރިންގެ ނަންބަރުތަކުން ރަނގަޅު ކާމިޔާބީއެއް ހާސިލްކުރަމުން އަންނަކަމަށް ޤަވަރުނަރ ފާހަގަކުރެއްވިއެވެ. އަދި ކުރިއަށްއޮތީ ފަތުރުވެރިކަމުގެ ޕީކް ސީޒަންކަމުން ރާއްޖެ އަންނަ ފަތުރުވެރިންގެ އަދަދުތައް އިތުރުވެގެންދާނެކަމަށާއި،އަހަރު ނިމޭއިރު ރާއްޖެއަށް 1.1 މިލިއަން ފަތުރުވެރިން އަންނާނެކަމަށް ލަފާކުރެވޭކަމަށް ގަވަރުނަރ ވިދާޅުވިއެވެ.