ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ކޮޅުމަޑުލަށް ކުރައްވަމުން ގެންދަވާ ދަތުރުފުޅުގެ ތެރެއިން ތިމަރަފުށި ކައުންސިލާއި، އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ މެންބަރުންނާއި ބައްދަލުކުރައްވާ، ރަށުގެ ކުރިއެރުމަށް ކުރެވޭ ކަންކަމާއި ގުޅޭގޮތުން މަޝްވަރާކުރައްވައިފިއެވެ.
ތިމަރަފުށި ކައުންސިލް އިދާރާގައި ބޭއްވެވި މިބައްދަލުކުރެއްވުމުގައި ވަނީ އެރަށަށް ދިމާވެފައިވާ ރަށްގިރުމުގެ މައްސަލައަށް އަވަސް ހައްލެއް ގެނައުމާއި، ޞިއްޙީ ޚިދުމަތް އިތުރަށް ތަރައްޤީކުރުމާއި، ފަތުރުވެރިކަމުގެ މަޝްރޫއުތަކާއި މަގުހެދުމުގެ މަޝްރޫއާއި، ބަނދަރު ބޮޑުކުރުމުގެ މަޝްރޫއުގެ އިތުރުން ރަށުގެ އިގުތިޞާދީ ތަރައްގީއާ ގުޅޭގޮތުން މަޝްވަރާކުރައްވާފައެވެ. ރައީސް ވަނީ ކައުންސިލްގެ ފަރާތުން ފާހަގަކުރި ކަންކަމަށް ހައްލު ހޯދައިދެއްވުމަށް އަންނަ އަހަރުގެ ބަޖެޓުގެ ތެރެއިން މަސައްކަތްކޮށްދެއްވާނެ ކަމަށް ވިދާޅުވެފައެވެ.
މި ބައްދަލުވުމުގައި ތިމަރަފުށީ ކައުންސިލްގެ ފަރާތުން ވަނީ ރައީސް އިބްރާހީމް މުޙައްމަދު ޞާލިޙް ކުރައްވަމުން ގެންދަވާ މަސައްކަތްތަކަށް އެކައުންސިލުން އަބަދުވެސް އެއްބާރުލުން ދެއްވަމުން ގެންދާނެކަމުގެ ޔަޤީންކަން ދެއްވާފައެވެ.
ރައީސް ވަނީ ތިމަރަފުށި ކައުންސިލްގެ އިތުރުން އެރަށު އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ މެންބަރުންނާއިވެސް ބައްދަލުކުރައްވާފައެވެ.
މި ބައްދަލުވުންތަކުގެ ކުރިން ރައީސް ވަނީ އެމަނިކުފާނުގެ ޝަރަފުގައި ތިމަރަފުށި ރައްޔިތުން ދެއްވި ޖާފަތެއްގައި ބައިވެރިވެވަޑައިގެންފައެވެ.
ރައީސުލްޖުމްހޫރިއްޔާ ކޮޅުމަޑުލަށް ކުރައްވަމުން ގެންދަވާ މިދަތުރުފުޅުގެ ތެރެއިން ތިމަރަފުށި ހިމެނޭހެން 7 ރަށަށް ވަޑައިގަތުމަށް ވަނީ ހަމަޖެހިފައެވެ. އެގޮތުން އެމަނިކުފާނު މާދަމާ އެއަތޮޅު ކިނބިދޫއަށާއި، އޮމަދޫއަށް އަދި ވޭމަންޑޫއަށް ވަޑައިގަންނަވާނެއެވެ. އަދި ބުރާސްފަތި ދުވަހު ކަނޑޫދޫ، ވަންދޫ އަދި ގާދިއްފުއްޓަށް ވަޑައިގަންނަވާނެއެވެ.
ރައީސްގެ މިދަތުރުފުޅުގެ ތެރެއިން އޮމަދޫގައި ސަރުކާރުން ތަރައްޤީކުރި ބަނދަރު އިފްތިތާޙްކޮށްދެއްވާނެއެވެ.