އަންހެން ސިފައިން ބައިވެރިކޮށްގެން ފުރަތަމަ ފަހަރަށް ބާއްވާ ކޯސްޓްގާޑު ބޭސިކް ޑައިވިންގ ކޯސް ފަށައިފިއެވެ.
މިއީ ރާއްޖެއިން ބޭރުގެ އަސްކަރިއްޔާތަކުން ބައިވެރިވެގެން ބައިނަލްއަޤްވާމީ މިންގަނޑުތަކާ އެއްގޮތަށް މޯލްޑިވްސް ނޭޝަނަލް ޑިފެންސް ފޯސްއިން ހިންގާ 9 ވަނަ ބޭސިކް ޑައިވިންގ ކޯހެވެ.
މިކޯސް ފެށުމުގެ ގޮތުން ބަންޑާރަކޮށީގައި މިއަދު ބޭއްވި ޚާއްޞަ ރަސްމިއްޔާތު ޝަރަފުވެރިކޮށްދެއްވީ ކޯސްޓްގާޑުގެ ކޮމަޑާންޓް ކާނަލް މުޙައްމަދު ސަލީމްއެވެ. މި ރަސްމިއްޔާތުގައި ކޯހުގެ މުދައްރިބުންގެ އިޤްރާރު ލައިދެއްވީ އެމްއެންޑީއެފް ކޯސްޓްގާޑު ސްކޫލްގެ ކޮމާންޑިންގ އޮފިސަރ، ލެފްޓިނެންޓް ކާނަލް މުޙައްމަދު ޖަމްޝާދުއެވެ. އަދި ދަރިވަރުންނަށް އިޤްރާރު ލައިދެއްވީ ކޯހުގެ ކޯސް އޮފިސަރ، ކެޕްޓަން މުޙައްމަދު ޝަފީޤެވެ.
ތިން މަސް ދުވަހުގެ މުއްދަތަށް ގިރިފުށީ ޓްރޭނިންގ ސެންޓަރުގައި ކުރިއަށްގެންދާ މި ކޯހުގައި ކިޔަވައިދިނުމަށް ހަމަޖެހިފައިވާ ބައިތަކުގެ ތެރޭގައި ޑައިވިންގގެ ތާރީޚާއި، ފިޒިކްސް އެންޑް ފިޒިއޮލޮޖީ އޮފް ޑައިވިންއާއި، ޑައިވިންގ އޮޕަރޭޝަންގައި ޑައިވް އިކްއިޕްމަންޓްސް އާއި އެކްސެސަރީސް ބޭނުންކުރާނެ ގޮތްހިމެނެއެެވެ. އަދި ޑައިވިންގ ކޮމިއުނިކޭޝަނާއި ޑައިވް ޓޭބަލްސްގެ ބޭނުމާއި، ޑައިވިންގ ސޭފްޓީ އަދި ޑައިވިންގ ސަރޗް ޕެޓާންސްއާއި، ފިޒިކަލް ޓްރޭނިންގ، ސްވިމިން، ޑައިވިންގ ސްކިލްސް، ޑައިވިންގ ފަސްޓްއެއިޑް، މިޝަން ޕްލޭނިންގގެ އިތުރުން ހާލުގައިޖެހޭ އުޅަނދުފަހަރު ސަލާމަތްކުރާނެ ތަމްރީނު ވެސް މިކޯހުގެ ބައިވެރިންނަށް ދިނުމަށްވަނީ ހަމަޖެހިފައެވެ.
އިނގިރޭސި މީޑިއަމަށް ހިންގާ މިކޯހުގައި ޖުމްލަ 29 ދަރިވަރުން ބައިވެރިވެފައިވެއެވެ. އޭގެ ތެރޭގައި ސްރީލަންކާއާއި ބަންގްލަދޭޝް އަދި ނޭޕާލްގެ އަސްކަރިއްޔާތަކުން ބައިވެރިވި 7 ސިފައިން ހިމެނެއެވެ. ދެން ހިމެނެނީ ކޯސްޓްގާޑާއި، އެމްއެންޑީއެފްގެ އެކި ޔުނިޓްތަކަށް ނިސްބަތްވާ ސިފައިންނެވެ.
މި ކޯސް ފެށުމުގެ ރަސްމިއްޔާތުގައި، ކޯސްޓްގާޑުގެ ކޮމަޑާންޓްގެ އިތުރުން، ކޯސްޓްގާޑުގެ ޕްރިންސިޕަލް ޑައިރެކްޓަރ ލެފްޓިނެންޓް ކާނަލް މުޙައްމަދު ރިޒްމީ ވަލީދާއި، ކޮމާންޑް ސާޖަންޓް މޭޖަރ އޮފް ކޯސްޓްގާޑް، ކޮމާންޑް ސާޖަންޓް މޭޖަރ އަޙްމަދު ޝަހީރާއި ކޯސްޓްގާޑުގެ އޮފިސަރުންނާއި ސީނިއަރ އެންލިސްޓެޑުންނާއި ކޯހުގެ ދަރިވަރުންނާއި މުދައްރިބުން ބައިވެރިވެވަޑައިގެންނެވިއެވެ.