ރަށު ކައުންސިލްތަކާއި ސިޓީ ކައުންސިލްތަކުން ހަދަންޖެހޭ ރަށު ތަރައްޤީގެ ޕްލޭން އެކުލަވާލަންޖެހޭ އެންމެ ފަހު ތާރީޚަކީ ނޮވެންބަރު މަސްކަމަށް ލޯކަލް ގަވަރމަންޓް އޮތޯރިޓީ (އެލްޖީއޭ)އިން ކަނޑައަޅައިފިއެވެ.
ދިވެހިރާއްޖޭގެ އިދާރީ ދާއިރާތައް ހިންގުމުގެ ޤާނޫނު ބަޔާންކުރާގޮތުން އަލަށް އެކުލަވާލެވޭ ކައުންސިލްތަކުގެ އިންތިޚާބަށްފަހު، އިންތިޚާބުކުރެވޭ މެންބަރުން މަޤާމާ ޙަވާލުވާތާ 3 މަސްދުވަހުގެ ތެރޭގައި، އެ ރަށެއްގެ ތަރައްޤީގެ ޕްލޭން އެކުލަވާލަންޖެހެއެވެ. އަދި އެ ޤާނޫނުގައިވާ ގޮތުން ތަރައްޤީގެ ޕްލޭން އެކުލަވާލަންޖެހެނީ ރަށުގެ ރައްޔިތުންނާއި ކަމާގުޅޭ އެންމެހާ ފަރާތްތަކުގެ މަޝްވަރާއާ އެކު އެފަރާތްތަކުގެ ޚިޔާލު ހިމެނޭގޮތަށެވެ. ނަމަވެސް ކޯވިޑް-19އާއި ގުޅިގެން ގިނަ ރަށްތަކެއް މޮނިޓަރިންއަށް ލުމުން، ރައްޔިތުންނާއި ބައްދަލު ނުކުރެވުމުގެ ސަބަބުން ތަރައްޤީގެ ޕްލޭން ހެދުމަށް ވަނީ ދަތިތަކެއް ދިމާވެފައެވެ.
މިކަމާއި ގުޅިގެން ކައުންސިލްތަކުގެ ބެލެނިވެރި ފަރާތްކަމަށްވާ އެލްޖީއޭއިން ސިޓީ ކައުންސިލްތަކުގެ މޭޔަރުންނަށާއި، އަތޮޅު އަދި ރަށު ކައުންސިލްތަކުގެ ރައީސުންނަށް އިއްޔެ ފޮނުވި ސިޓީގައި ވިދާޅުވެފައިވަނީ، ކޯވިޑްގެ ހާލަތާ ގުޅިގެން ރާއްޖޭގައި ސިއްހީ ކުއްލި ނުރައްކަލުގެ ހާލަތު އިއުލާނުކޮށް ލޮކްޑައުންކުރުމާއި، އަތޮޅު ތެރެއިންވެސް މިބަލި ފެނި ގިނަ ރަށްތަކެއް މޮނިޓަރިންގއަށް ލާފައިވުމާ ގުޅިގެން ގިނަ ބަޔަކު އެއްވެ މިފަދަ ބައްދަލުވުންތައް ބޭއްވޭފަދަ މާހައުލެއް ގިނަ ރަށްރަށުގައި ނެތުމުން، ޤާނޫނުގައި ކަނޑައަޅާފައިވާ މުއްދަތަށް ޕްލޭން ނިންމުމުގައި ކައުންސިލްތަކަށް ދަތިތަކެއް ހުރިކަން އެއޮތޯރިޓީއަށް ފާހަގަކުރެވިފައިވާކަމަށެވެ.
ނަމަވެސް ތަރައްޤީގެ ޕްލޭން އެކުލަވާލުމަށް ޤާނޫނުގައި ބުނެފައިވާ މުއްދަތު ހަމަވަމުންދާތީ ރައްޔިތުންގެ މަޖިލީހުގެ ލާމަރުކަޒީ ކޮމެޓީއާއި، ލޯކަލް ގަވަރމަންޓް އޮތޯރިޓީގެ މަޝްވަރާގެ މަތިން ގާނޫނުގައި ކައުންސިލުތަކުން ނިންމުމަށް ކަނޑައަޅާފައިވާ ޓައިމްލައިންތަކަށް އިތުރު މުއްދަތު ދިނުމަށް ކަނޑައެޅުމަށް ނިންމާފައިވާކަމަށް އެލްޖީއޭއިން ހާމަކުރައްވައެވެ. އެހެންކަމުން ކައުންސިލްތަކުގެ މަސައްކަތް މިންކޮށް ރޭންކުރުމަށް އެލްޖީއޭއިން އެކުލަވާލާ ޕާރފޯމަންސް އިންޑެކްސްއަށް މައުލޫމާތު އެއްކުރުމުގައި، ޕްލޭން ތައްޔާރުކޮށް ހުށަހަޅަންޖެހޭ ތާރީޚުކަމުގައި ބަލާނީ ނޮވެންބަރު 30 ކަމުގައި ކައުންސިލްތަކަށް އަންގާކަމަށްވެސް އެލްޖީއޭގެ ސީއީއޯ ފާޠިމަތު އަފްޝަން ލަޠީފް ސޮއިކުރައްވާ ކައުންސިލްތަކަށް ފޮނުއްވި ސިޓީގައި ވިދާޅުވެފައިވެއެވެ.
ލާމަރުކަޒީ ޤާނޫނުގައި ބުނާގޮތުން މިމަހުގެ 17 ވަނަ ދުވަހުގެ ކުރިން ރަށްރަށުގެ ލޭންޑް ޔޫސް ޕްލޭނާއި ތަރައްޤީގެ ޕްލޭން އެކުލަވާލައި، ލޯކަލް ގަވަރމަންޓް އޮތޯރިޓީއަށް ހުށަހަޅަންޖެހެއެވެ. ނަމަވެސް ކޯވިޑް-19ގައި ގިނަ ރަށްތަކެއް މޮނިޓަރިންގައި އޮތުމުން މިމަސައްކަތް ވަނީ އެންމެ އެކަށީގެންވާ ގޮތަށް ނުކުރެވިފައެވެ.