ނާއިބު ރައީސްކަމުން ޑރ. ޖަމީލު ވަކިކުރި މައްސަލަ ފުރަތަމަ މަރުހަލާގައި ބެލޭނީ ސިވިލް ކޯޓަށް ކަމަށް ސުޕްރީމް ކޯޓުން ކަނޑައަޅައިފިއެވެ.
ސުޕްރީމް ކޯޓުން މިގޮތަށް ކަނޑައަޅާފައިވަނީ، ނާއިބް ރައީސްގެ މަޤާމުގައި ހުންނަވަނިކޮށް ޑރ. މުހައްމަދު ޖަމީލް އަޙްމަދު އެ މަޤާމުން ވަކިކުރީ ޤާނޫނު އަސާސީއާ ޚިލާފަށް ކަމަށް ކަނޑައަޅައިދިނުމަށް އެދި ސުޕްރީމް ކޯޓަށް ހުށައެޅި މައްސަލައިގަ މިއަދު އިއްވި ޙުކުމުގައެވެ.
އުއްތަމަ ފަނޑިޔާރު ހިމެނޭހެން ސުޕްރީމް ކޯޓުގެ ފަސް ފަނޑިޔާރުން ހިމެނޭ ބެންޗަކުން ބެއްލެވި މިމައްސަލައިގަ ހުރިހާ ފަނޑިޔާރުންވެސް އިއްތިފާޤުވެފައިވަނީ ފަނޑިޔާރު ޑޮކްޓަރ އަޒްމިރާލްދާ ޒާހިރުގެ ރަޢުޔަށެވެ.
މިމައްސަލައިގެ ޤަޟިއްޔާގައި ފާހަގަކޮށްފައިވާ ކަންކަމާއި، ކުރިން ސުޕްރީމް ކޯޓުން ބައްލަވާފައިވާ މިފަދަ މައްސަލަތަކާއި، ޤާނޫނު އަސާސީގެ މާއްދާތަކަށް އަލިއަޅުއްވާލައްވައި ޑޮކްޓަރ އަޒްމިރާލްދާ ޒާހިރު ނެރުއްއްވި ރަޢުޔުގައި ވިދާޅުވީ ޑރ. ޖަމީލްގެ ފަރާތުން ހުށައަޅުއްވާފައިވާ މައްސަލައަކީ ދިވެހިރާއްޖޭގެ ކޯޓުތަކުގެ ޤާނޫނުގެ 11 ވަނަ މާއްދާއަށް ފެތޭފަދަ މައްސަލައެއްކަމަށް ބެލެވެންނެތްކަމަށެވެ. އެގޮތުން ޑރ. ޖަމީލު ސުޕްރީމް ކޯޓަށް ހުށައެޅުއްވި އެ މައްސަލައަކީ ޤާނޫނު އަސާސީގައިބުނާ ދުސްތޫރީ މައްސަލަތަކުގެ ބާވަތްތަކުގެ ތެރެއިން ދަޢުލަތުގެ ޢިދާރާއަކުން ނެރޭ ޢަމުރަކާއި އަދި އެފަދަ ޢިދާރާއެއްގެ މުވައްޒަފަކު ކުރާކަމެއް ނުވަތަ ނިންމާފައިވާ ނިންމުމެއް ޤާނޫނު އަސާސީއާ ޚިލާފުކަމަށްބުނާ މައްސަލައެއްކަމަށްވާތީ، އެ މައްސަލަ ބެލުމުގެ އިޚްތިޞާސްއޮތީ ސިވިލް ކޯޓަށްކަމުގައި ދެކިވަޑައިގަންނަވާކަމަށް ޑރ. އަޒްމިރާލްދާގެ ރަޢުޔުގައި ފާހަގަކުރެއްވިއެވެ.
މިމައްސަލައިގެ ޙުކުމް އިއްވަވަމުން އުއްތަމަ ފަނޑިޔާރު އަލްއުސްތާޛު އަޙްމަދު މުޢުތަޞިމް ޢަދުނާން ވިދާޅުވީ ޑރ. ޖަމީލް ހުށައެޅުވި ޤަޒިއްޔާގައިވާ މައްސަލައަކީ ދިވެހިރާއްޖޭގެ ސުޕްރީމް ކޯޓުން ފުރަތަމަ މަރުހަލާގައި ބެލުމުގެ އިޚްތިސާސް ލިބިފައިވާ މައްސަލައެއްނޫންކަމަށް ކަނޑައަޅުއްވާކަމަށެވެ. އަދި މިމައްސަލަ ޑރ. ޖަމީލްގެ ފަރާތުން ސިވިލްކޯޓަށް ހުށައަޅައިފިނަމަ އެ ޤަޟިއްޔާގައި ފާހަގަކޮށްފައިވާ ކަންކަމުގެ އަލީގައި އެކޯޓަށް ބެލިދާނެ މައްސަލައެއްކަމަށް ސުޕްރީމް ކޯޓުގައި މި މައްސަލަ ބެއްލެވި ފަނޑިޔާރުންގެ އިއްތިފާޤުންވަނީ ޙުކުމްކޮށްފައެވެ.
ޖަމީލްގެ މައްޗަށް އިތުބާރު ނެތްކަމުގެ ވޯޓް ރައްޔިތުންގެ މަޖިލީހުގައި ނަގައި މަޤާމުން ދުރުކުރީ 21، ޖުލައި 2015 ގައެވެ. ޖަމީލް މަޤާމުން ވަކިކުރަން 78 މެންބަރުން ވޯޓް ދެއްވިއެވެ. ދެކޮޅަށްވޯޓް ދެއްވީ 2 މެންބަރުންނެވެ.
ޖަމީލް ނާއިބު ރައީސް ކަމުން ވަކި ކުރެއްވުމުގެ މަސައްކަތް އޭރުގެ ޕީޕީއެމްގެ މެމްބަރުން ކުރިއަށް ގެންދަނިކޮށް އޭނާ ބޭސްފަރުވާއަށް ރާއްޖެއިން ބޭރަށް ވަޑައިގަތުމަށް ފަހު އިނގިރޭސިވިލާތުގައި މަޑުކުރެއްވިއެވެ. ޖަމީލް އެނބުރި ރާއްޖެ ވަޑައިގެންފައިވަނީ ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު މަޤާމަށް އިންތިޚާބްވެ ވަޑައިގެންނެވި ފަހުންނެވެ.