ރާއްޖޭގަ އާބާދީ ބޮޑު 6 ސަރަޙައްދެއްގައި 11 މެގަވޮޓްގެ ސޯލަރ ހަކަތައިގެ ނިޒާމު ޤާއިމުކުރުމަށް ހުޅުވާލުމުން 61 ކުންފުންޏަކުން ޝައުގުވެރިކަން ފާޅުކޮށްފައި ވާކަމަށް މިނިސްޓްރީ އޮފް އެންވަޔަރަމަންޓް ކްލައިމެޓް ޗޭންޖް އެންޑް ޓެކްނޮލޮޖީން ވިދާޅުވެއްޖެއެވެ. މި މަޝްރޫޢުގެ ޢަމަލީ މަސައްކަތް ރަށްރަށުގަ ފަށާނީ އަންނަ އަހަރުގެ ކުރީކޮޅުއެވެ.
ހަކަތައިގެ މި މަޝްރޫޢަކީ ވޯލްޑް ބޭންކާ ގުޅިގެން ހިންގާ "އެކްސެލެރޭޓިންގް ސަސްޓެއިނަބަލް ޕްރައިވެޓް އިންވެސްޓްމަންޓް އިން ރިނިއުބަލް އެނަރޖީ" އެސްޕަޔަރ ޕްރޮޖެކްޓްގެ ދަށުން ކުރިއަށްގެންދާ މަސައްކަތެކެވެ. މިނިސްޓްރީ އޮފް އެންވަޔަރަމަންޓް ކްލައިމެޓް ޗޭންޖް އެންޑް ޓެކްނޮލޮޖީ ވިދާޅުވީ މަޝްރޫޢުގެ މަސައްކަތަށް ޝަޢުގުވެރިކަން ފާޅުކުރި 61 ކުންފުނީގެ ތެރެއިން 34 ކުންފުންޏަކުން ޕްރީ ކޮލިފިކޭޝަން ހުށައަޅާފައިވާކަމަށެވެ.
ޕްރީކޮލިފިކޭޝަންތައް އިވަލުއޭޓްކޮށް، މި ކުންފުނިތަކުން މަސައްކަތް ކުރިއަށްގެންދިއުމުންގެ ފަންނީ އަދި މާލީ ޤާބިލުކަން ދެނެގަނެ ޝަރުޠު ހަމަވި ކުންފުނިތަކަށް މިހާރުވަނީ ބީލަން ހުށައެޅުމުގެ ފުރުޞަތު ހުޅުވާލާފައެވެ. މިނިސްޓްރީއިން ވިދާޅުވީ ބަލަންޖެހޭ މިންގަނޑުތަކަށް ބެލުމަށްފަހު 12 ކުންފުންޏަކަށް ބިޑް ހުށައެޅުމަށް ފުރުޞަތު ދީފައިވާކަމަށެވެ.
ރާއްޖޭގެ 6 ސަރަޙައްދަކުން ހޮވާލުވެނު ރަށްތަކުގައި މި މަޝްރޫޢުގެދަށުން 11މެގަވޮޓްގެ، އަވިން ހަކަތަ އުފައްދާ ނިޒާމު ޤާއިމުކުރާނެއެވެ.
އަވިން ހަކަތަ އުފައްދާ ނިޒާމު ޤާއިމުކުރާ ރަށްތައް
- އައްޑޫ ސިޓީ ހުޅުދޫ އަދި މީދޫ
- ފުވައްމުލައް ސިޓީ
- ކުޅުދުއްފުށި ސިޓީ
- ގދ.ތިނަދޫ
- ބ.އޭދަފުށި
- ޅ.ހިންނަވަރު
މަސައްކަތް ކުރިއަށްގެންދިއުމަށް ޝަރުޠު ހަމަވި ކުންފުނިތަކުން އޮކްޓޯބަރުމަހުގެ 14ގެ ކުރިން ބީލަން ހުށައަޅަން ޖެހޭނެއެވެ. އެންވަޔަރަމަންޓް މިނިސްޓްރީއިން ވިދާޅުވީ މި މަޝްރޫޢުގެ ޢަމަލީ މަސައްކަތް ފެށުމަށް ހަމަޖެހިފަވަނީ އަންނަ އަ އަހަރުގެ ކުރީކޮޅުކަމަށެވެ.
ތިމާވެއްޓާ ރަށްޓެހި ގޮތްތަކަށް ހަކަތަ އުފެއްދުމަށް ސަރުކާރުން ކުރާ މަސައްކަތުގެދަށުން، އަވިން ހަކަތަ އުފައްދާ ނިޒާމު ޤާއިމުކުރުމުގެ ގިނަ މަޝްރޫޢުތަކެއް މިހާރުވެސް ކުރިއަށްދެއެވެ. އެގޮތުން ވޯލްޑް ބޭންކްގެ އެހީގައި ކުރިއަށްގެންދާ އެރައިސް ޕްރޮޖެކްޓްގައިވެސް 14ރަށެއްގައި އަވިން ހަކަތަ އުފައްދާ ނިޒާމު ޤާއިމުކުރުމުގެ މަސައްކަތް ފެށުމަށް ދަނީ ތައްޔާރުވަމުންނެވެ. މި މަޝްރޫޢުގެދަށުން ރަށްރަކުގައި ޖުމްލަ 11މެގަވޮޓް އާއި 14މެގަވޮޓްއާ ދެމެދުގެ ސޯލާ ހަކަތަ ނިޒާމު ޤާއިމުކުރާނެއެވެ. މި މަސައްކަތްތައް ކުރިއަށްގެންދާނެ ބަޔަކު ހޯދުމަށްވެސްވަނީ ހުޅުވާލާފައެވެ.
އެސްޕަޔަރ އަދި އެރައިސް މަޝްރޫޢުގެ ދަށުން ސޯލަރ ޕީވީގެ ނިޒާމް ޤާއިމްކުރުމަށް ހަމަޖެހިފައިވާ ސަރަހައްދުތަކުގައި 40 މެގަވޮޓް އަވަރގެ ބެޓަރީ އެނަރޖީ ސްޓޯރޭޖް ސިސްޓަމް ޤާއިމުކުރާނެއެވެ. މި ބެޓަރީ އެނަރޖީ ސްޓޯރޭޖް ސިސްޓަމް ޤާއިމުކުރުމުގެ ސަބަބުން ސޯލާ ހަކަތައިން އުފައްދާ ކަރަންޓުން އެވަގުތެއްގައި ބޭނުންކޮށް އިތުރުވާ ކަރަންޓު މި ނިޒާމުގައި ރައްކާކުރެވޭނެއެވެ.