ރާއްޖޭގައި ފްލައިން ސްކޫލް ހިންގުމަށް 13 ފަރާތަކުން ޝައުގުވެރިކަން ފާޅުކޮށްފައިވާކަމަށް އައިލެންޑް އޭވިއޭޝަނުން ބުނެފިއެވެ.
ޤައުމީ އެއަރލައިން މޯލްޑިވިއަން ހިންގާ އައިލެންޑް އޭވިއޭޝަނުން ފްލައިން ސްކޫލެއް ހިންގުމަށް ފުރުސަތު ހުޅުވާލައިފައި ވަނީ ޖޫންމަހުގެ 1 ވަނަ ދުވަހުއެވެ.
އައިލެންޑް އޭވިއޭޝަނުން ވިދާޅުވީ ރާއްޖޭގައި ފްލައިން ސްކޫލެއް ހިންގުމަށް ޝައުގުވެރިކަން ފާޅުކޮށްފައިވަނީ މިހާރުވެސް ފްލައިން ސްކޫލުތައް ހިންގައި ފަރާތްތަކަކުންކަމަށެވެ. އޭގެ ތެރޭގައި އެމެރިކާއާއި، މެދު އިރުމައްޗާ، ޔޫރަޕްގެ ޤައުމުތަކުގެ އިތުރުން ރާއްޖޭގެ ކުންފުންޏެއްވެސް ހިމެނެއެވެ. އަދި އައިލެންޑް އޭވިއޭޝަނުން ވިދާޅުވީ އެ 13 ކުންފުނި އިވެލުއޭޓް ކުރަމުންދާ ކަމަށެވެ.
އައިލެންޑް އޭވިއޭޝަނުން ބުނީ ރާއްޖޭގެ އެއާޕޯޓެއްގައި ފްލައިން ސްކޫލު ހިންގާނީ އެކަމަށް ހާއްސަ ކޮށްށްގެން އުފައްދާ ސަބްސިޑަރީ ކުންފުންޏަކުންކަމަށާއި، އެތަން ހިންގާނީ މިނިވަންކަމާއެކުކަމަށެވެ.
ރާއްޖޭގައި މިހާރުވެސް ފްލައިންގ ސްކޫލެއް އަންނަނީ ހިންގަމުންނެވެ. ނަމަވެސް އޭޝިއަން އެކަޑަމީ އޮފް އެއިރޯނޯޓިކްސްގެ ދަށުން އައްޑޫ ސިޓީގައި ހިންގާ ފްލައިން ސުކޫލްގެ ގިނަ މައްސަލަތަކެއް ވަނީ ފެންމަތިވެފައެވެ. އައްޑޫ ފްލައިން ސްކޫލުގެ ދަރިވަރުންގެ ކިޔެވުމާމެދު ހުރި ގިނަ ޝަކުވާތަކެއް މީގެކުރިން އެކުދިން ވަނީ ކަމާބެހޭ ފަރާތްތަކަށްވެސް އެކި ފަހަރުމަތިން ހުށައަޅާފައެވެ. މީގެތެރޭގައި އެތަނުގައި ކިޔަވައިދެމުން އަންނަ 170 އަށްވުރެ ގިނަ ދަރިވަރުންނަށް ބޭނުންވާވަރަށް މުދައްރިސުން ނެތުމާއި ފްލައިންގެ ގަޑި ހަމަކުރުމަށާއި ކިޔެވުމުގައި ބޭނުންކުރާނެ ބޯޓު ނެތުމުގެ މައްސަލަތައް ހިމެނެއެވެ.
އައްޑޫ ފްލައިން ސްކޫލުގެ މައްސަލައިގައި ޓްރާސްޕޯޓް މިނިސްޓަރ ނަހުލާ މަޖިލީހުގައި މީގެކުރިން ވިދާޅުވެފައިވަނީ އައްޑޫ ފްލައިން ސްކޫލުގެ މައްސަލައަށް އޮތް ހައްލަކީ އެހެން ސްކޫލެއް ޤާއިމްކުރުންކަމަށެވެ.