ކޮންމެ 3 މަހަކުން 1 ފަހަރު ބޭންކް އޮފް މޯލްޑިވްސްގެ މުވައްޒަފުން ލޭހަދިޔާކުރުމުގެ ކޭމްޕްތައް ބާއްވާނެކަމަށް އެ ބޭންކުން ބުނެފިއެވެ.
ބީއެމްއެލްއިން މިހެން ބުނީ މިއަދު ފާހަގަކުރަމުންދާ ދުނިޔޭގެ ލޭ ހަދިޔާކުރާ މީހުންގެ ދުވަހާއި ގުޅިގެން އެ ބޭންކުގެ މުވައްޒަފުން ބޭއްވި ލޭ ހަދިޔާ ކުރުމުގެ ކޭމްޕްގައެވެ. ދުނިޔޭގެ ލޭހަދިޔާ ކުރާ މީހުންގެ ދުވަހާއި ގުޅުވައިގެން ބީއެމްއެލްގެ މުވައްޒަފުން ވަނީ މާލެ، ކުޅުދުއްފުށި އަދި މަނަދޫގައި ލޭހަދިޔާކުރުމުގެ ހަރަކާތްތައް މިއަދު ބާއްވާފައެވެ.
މި ހަރަކާތުގައި އެ ރަށްރަށުގެ ބީއެމްއެލް ބްރާންޗްގައި މަސައްކަތްކުރާ މުވައްޒަފުންނާއި އެމީހުންގެ އާއިލާއިން ވަނީ ލޭ ހަދިޔާކޮށްފައެވެ. ބީއެމްއެލްއިން ބުނީ 3 މަހުން 1 މަހުން ލޭހަދިޔާކުރުމުގެ ކޭމްޕްތައް ބާއްވަން ނިންމީ ތެލެސީމިއާ ކުދިންނަށް ލޭ ބޭނުންވާ މިންވަރަށް ބަލައި، ދެމެހެއްޓެނިވި ގޮތެއްގައި ލޭ ހަދިޔާކުރުމުގެ މުހިންމުކަން އެނގޭތީކަމަށެވެ.
މި ހަރާކާތް މާލޭގައި ކުރިޔަށް ގެންދަނީ މޯލްޑިވްސް ބްލަޑް ސަރވިސަސްއާ ގުޅިގެންނެވެ. އަދި އަތޮޅުތަކުގައި ކޭމްޕް ބާއްވަނީ ރީޖަނަލް ހޮސްޕިޓަލް މެދުވެރިކޮށެވެ. ދެ ދުވަހަށް ކުރިޔަށް ދާ މި ކޭމްޕް މެދުވެރިކޮށް 70 އަށްވުރެ ގިނަ މުވައްޒަފުން ވަނީ ލޭ ހަދިޔާ ކުރުމަށް ރަޖިސްޓްރީކޮށްފައިކަމަށް ބީއެމްއެލްއިން ބުނެއެވެ.
މި ކޭމްޕްގެ ކުރިން ލޭ ހަދިޔާ ކުރުމުގެ މުހިންމުކަމާއި އާންމު ގޮތެއްގައި ލޭ ހަދިޔާ ކުރުމާ ގުޅޭ މުހިންމު މައުލޫމާތުތަކަށް އަލިއަޅުވާލައި ބީއެމްއެލް އިން ވަނީ މުވައްޒަފުން ހޭލުންތެރިކުރުމަށް މޯލްޑިވްސް ބްލަޑް ސަރިވިސް އާ ގުޅިގެން ހާއްސަ ސެޝަނެއް ކުރިޔަށް ގެންގޮސްފައެވެ.
ބީއެމްއެލްއިން ބުނީ އެ ބޭންކުގެ އަމާޒަކީ މުވައްޒަފުން އިޖްތިމާއީ ކަންކަމަށް ހޭލުންތެރި ކުރުމާއި މުޖުތަމައަށް ފައިދާ ކުރަނިވި ހަރާކާތްތަކުގައި ބައިވެރިވުން އިތުރުކުރުންކަމަށެވެ.