އިގްތިޞާދީ ބޭނުންތަކަށް ބިން ދޫކުރެއްވުމުގެ ސިޔާސަތުގެ ދަށުން ރާއްޖޭގެ ދިހަ ރަށަކުން ބިން ދޫކުރެއްވުމަށް ހައުސިން މިނިސްޓްރީން ނިންމަވައިފިއެވެ. އިގްތިޞާދީ ބޭނުންތަކަށް ބިން ދޫކުރެއްވުމުގެ ސިޔާސަތުގެ ދަށުން ފުރަތަމަ ފިޔަވަހީގެ ދަށުން ބިން ދޫކުރައްވަވާ ރަށްތަކަކީ، ހއ.ދިއްދޫ، ހދ.ހަނިމާދޫ، ހދ.ކުޅުދުއްފުށި، ނ.ވެލިދޫ، ބ.އޭދަފުށި، ބ.ތުޅާދޫ، ކ.ތުލުސްދޫ، ދ.މީދޫ، ޏ.ފުވައްމުލަކު އަދި އައްޑޫސިޓީ ހިތަދޫއެވެ. މި ރަށްތަކުން ބިން ދޫކުރެއްވުމުގެ އެންމެ ބޮޑު ބޭނުމަކީ ބިންތައް ކުއްޔަށް ދޫކުރައްވައިގެން ރަށްރަށުގައި އިގްތިޞާދީ ފުއްދުންތެރިކަން އިތުރުކުރެއްވުން ކަމަށް ހައުސިން މިނިސްޓްރީން މަޢުލޫމާތު ދެއްވައެވެ. އެގޮތުން މި ދިހަ ރަށުގެ ތެރެއިން ބައެއް ރަށްތަކުގައި ބިން ދޫކުރުމުގެ މަސައްކަތް ފެށިފައިވާ ކަމަށް ހައުސިން މިނިސްޓްރީގެ ސްޓޭޓް މިނިސްޓަރ މުޙައްމަދު ފާއިޒް ވިދާޅުވިއެވެ."މިހާރު އަޅުގަނޑުމެން ވަނީ މި ދިހަ ރަށުގެ ތެރެއިން ހަތަރު ރަށަކުން ބިން ދޫކުރުމުގެ މަސައްކަތްތައް ފަށާފަ. އެއީ ހދ.ހަނިމާދޫ، ނ.ވެލިދޫ، ބ.އޭދަފުށި އަދި ބ.ތުޅާދޫ. މި ރަށްތަކުގެ ބިމުގެ ބޮޑުމިނަން ބަލާ އެކަށީގެންވާ ބިންތަކެއް ދޫކުރެވޭނެ. " ފާއިޒް ވިދާޅުވިއެވެ.އަތޮޅުތެރޭގެ ރަށްތަކުން ކުލީ އުޞޫލުން ބިން ދޫކުރައްވަން ސަރުކާރުން ނިންމެވީ، ބިމާ ބެހޭ ޤާނޫނަށް ގެނެވުނު އިޞްލާހުގެ ދަށުންނެވެ. އެ އިޞްލާހްގެ ދަށުން ހައުސިން މިނިސްޓްރީން ވަނީ އެ މިނިސްޓްރީގެ ދަށުގައިހުރި ބިންތައް ވިޔަފާރި އުޞޫލުން މުޢާމަލާތް ކުރުމާބެހޭ ޤަވާއިދެއް އެކުލަވާލައްވާފައެވެ.