ރައީސުލްޖުމްހޫރިއްޔާ
ޢަބްދުﷲ ޔާމީންގެ ސަރުކާރުގެ ވޭތުވެދިޔަ ދެއަހަރު އެންމެ އިސްކަމެއް ދެއްވީ ބޭރުގެ
ނުފޫޒުތަކުން ރާއްޖެ ދިފާޢުކުރައްވައި،
ރާއްޖޭގެ ރީތި ނަމާއި،
ޤަދަރު ހިފެހެއްޓެވުމަށްކަމަށް ޚާރިޖީވަޒީރު ދުންޔާ މައުމޫން ވިދާޅުވެއްޖެއެވެ.
ޓީވީއެމްގެ ރާއްޖެ މިއަދު ޕްރޮގްރާމްގައި ވާހަކަފުޅު ދައްކަވަމުން ދުންޔާ ވިދާޅުވީ،
ޚާރިޖިއްޔާއަކީ ޤައުމުގެ ހަށިފާރަވެރިޔާ ކަމަށާއި، އެއީ ޤައުމުގެ މޫނުމަތިކަމަށެވެ.
މިނިސްޓަރގެ ވާހަކަފުޅުގައި އިދިކޮޅު ބައެއް ފަރާތްތަކުން އަބަދުވެސް ޙަޤީގަތާ ޚިލާފް ވާހަކަތައް ބޭރު
ދުނިޔޭގައި ދައްކައި، ރާއްޖޭގެ ކުރިއެރުންކަމަށްވާ ފަތުރުވެރިކަން ހަލާކުކުރުމަށް
މަސައްކަތްތަކެއް ކުރާ ކަމަށް ވިދާޅުވެ، މިކަމުގެ ސަބަބުން ވޭތުވެދިޔަ ދުވަސްތަކުގައި
ބޭރުގެ ބައެއް ނުފޫޒުތައް ޙަމަލާތަކެއްގެ ގޮތުގައި ރާއްޖެއަށް އަމާޒުވެގެން
ދިޔަކަން ފާހަގަކުރެއްވިއެވެ. އަދި މިއީ ދިވެހިން ބޭނުންވާނެކަމެއް ނޫންކަމަށް
ބަޔާންކުރައްވައި، ދިވެހި ޚާރިޖިއްޔާގެ އެންމެ
މުހިންމު މަސައްކަތަކަށްވީ މިކަންކަމުގެ ޙަޤީޤަތް ހާމަކޮށްދީ ޤައުމު ޙިމާޔަތްކުރެއްވުންކަމަށް މިނިސްޓަރ ވިދާޅުވިއެވެ. އަދި ސަރުކާރުން ކުރެއްވި މި މސައްކަތުގެ ނަތީޖާ ވަރަށް ބޮޑަށް ފެނިގެން ދިޔަކަންވެސް މިނިސްޓަރ ވަނީ ފާހަގަކުރައްވާފައެވެ.
2014 ވަނަ
އަހަރުގެ ޖެނުއަރީ މަހުގެ ތެރޭގައި ސަރުކާރުން ވަނީ ޚާރިޖީ ސިޔާސަތެއް އިޢުލާންކުރައްވާފައެވެ.
އެސިޔާސަތުގެ އެންމެ ބޮޑު ބޭނުމަކީ ދިވެހިންނަކީ ފުދުންތެރި، ފަޚްރުވެރި ބަޔަކަށް
ހަދައިދިނުމެވެ.
މިނިސްޓަރ ދުންޔާ ވިދާޅުވީ، މިސަރުކާރުގެ ޚާރިޖީ
ސިޔާސަތުގެ އެންމެ މުހިންމު އެއް ލަނޑުދަނޑިއަކީ ރާއްޖޭގެ އިސްލާމީ ވަޙްދަތު
ޙިމާޔަތްކުރައްވައި، ބޭރު ދުނިޔޭގައި ދިވެހި
ވަންތަ ސިފަތައް ދެމެހެއްޓެވުންކަމަށެވެ.
މި ސިޔާސަތުގެ ދަށުން،
ޢަރަބި އިސްލާމީ ޤައުމުތަކާ ގުޅުން ބަދަހިކުރެއްމަށް ރާއްޖެއިން އަދާކުރާ
އިސްދައުރުގެ ސަބަބުން އެންމެ ގާތްގުޅުންތައް
މިހާރު އޮންނަނީ އިސްލާމީ ޤައުމުތަކާ ކަންވެސް މިނިްޓަރ ދުންޔާ ފާހަގަކުރެއްވިއެވެ.
ރައީސް ޔާމީންގެ
ސަރުކާރުގައި ވަނީ ސަޢޫދި ޢަރަބިޔާއާ ގާތްގުޅުންތަކެއް ޤާއިމްކުރައްވާފައެވެ. އަދި
ފަލަސްޠީނުގެ ރައްޔިތުންގެ ދިފާޢުގައި ރާއްޖެއިން ވަނީ ފާޅުކަން ބޮޑު ގޮތެއްގައި އަޑުއުފުލާފައެވެ. ސަރުކާރުގެ މި ސިޔާސަތުގެ ސަބަބުން ލިބިގެންދިޔަ ފައިދާތަކުގެ މައްޗަށް އަލިއަޅުއްވާލައްވަވަމުން މިނިސްޓަރ ވިދާޅުވީ ރައީސް ޔާމީންގެ ޚާރިޖީ
ސިޔާސަތުގައި އުޞޫލުތައް
ހިފަހައްޓައި، ދިވެހިވަންތަކަމާއި
އަމިއްލަވަންތަކަމާއި މިނިވަންކަން ޙިމާޔަތްކުރެއްވުމަށް އިސްކަންދެއްވާކަމަށެވެ.
ރާއްޖެއަކީ
ބައިނަލްއަޤްވާމީ މައިދާނުގައި ހަރު އަޑުން ބަސް ބުނާ ޤައުމެއްކަމަށާއި، ޤައުމުތަކުގެ
ކަންކަން ރަނގަޅުކުރުމަށް ގޮވާލުމަށް ވެސް އަޑު އުފުލުމަށް ފުރުޞަތު
ލިބިގެންދިއުމަކީ، މި ޤައުމަކީ ބައިނަލްއަޤްވާމީ މައިދާނުގައި ފުންނާބު އުސް
ޤައުމެއްކަން ސާބިތުވިކަމެއްކަމަށް މިނިސްޓަރ ފާހަގަކުރެއްވިއެވެ.