އޭސީ މިލާނުގައި ހަ މަސް ހޭދަކުރުމަށްފަހު ކްރޮއޭޝިއާ ފޯވާޑް މާރިއޯ މަންޒުކިޗް އެ ޓީމު ދޫކޮށްލައިފިއެވެ. މަންޒުކިޗް ވަނީ މިލާނުގެ އެއްބަސްވުން އާނުކޮށް، އެ ޓީމު ދޫކޮށްލަން ނިންމާ އެކަން އިއުލާންކޮށް މަންޒުކިޗް ބުނީ މިލާނަށް ކުޅުމުގެ ފުރުސަތު ލިބުމަކީ ލިބުނު ފަޚުރެއް ކަމަށެވެ. އަދި އޭނާއަށް މި ފުރުސަތު ދިނީތީ މިލާނުގެ މެނޭޖުމަންޓަށް މަންޒުކިޗް ވަނީ ޝުކުރުއަދާކޮށްފައެވެ.
މަންޒުކިޗް މިލާނާ ގުޅުނީ ހިލޭ ޓްރާންސްފާއެއްގެ ދަށުން މި އަހަރުގެ ޖެނުއަރީ މަހުގެ ތެރޭގައެވެ. އަދި މި ސީޒަނުގެ ނިޔަލަށް އެއްބަސްވުން ހަދައި މިލާނަށް ކުޅެން މަންޒުކިޗް ނިންމި ނަމަވެސް، އަނިޔާގެ ސަބަބުން އޭނާއަށް ގިނަ މެޗުތަކެއް ގެއްލުނެވެ. މަންޒުކިޗް މިލާން ދޫކޮށްލިއިރު، މީގެ ކުރިން އޭނާ ކުޅެފައިވަނީ ގަތަރުގެ އަލް-ދުހައިލްއަށެވެ. ގަތަރު ލީގަށް 2019 ވަނަ އަހަރުގެ ޑިސެމްބަރު މަހު މަންޒުކިޗް ބަދަލުވި ނަމަވެސް، ހަ މަސް ފަހުން ދުހައިލާއެކު ހަދާފައިވާ އެއްބަސްވުން މަންޒުކިޗް އުވާލީ ދެ ފަރާތް އެއްބަސްވެގެންނެވެ. މީގެ ކުރިން ކްރޮއޭޝިއާގެ ޑީނަމޯ ޒެގްރެބާއި، ޖަރުމަނުގެ ވުލްފްސްބާގާއި، ބަޔާން މިއުނިކް އަދި ސްޕެއިނުގެ އެތުލެޓިކޯ މެޑްރިޑަށްވެސް ކުޅުނު މަންޒުކިޗް ވަނީ އިޓަލީގެ ޔުވެންޓަސްއަށްވެސް ކުޅެފައެވެ.