މެންބަރު ޢީޞަ ހައްޔަރުކުރަން އަމުރު ނެރެނުދިން މައްސަލަ އިސްތިއުނާފު ނުކުރަން ޕީޖީން ނިންމައިފި
ރައްޔިތުންގެ މަޖިލީހުގެ ކެނދިކުޅުދޫ ދާއިރާގެ މެންބަރު އަޙްމަދު އީޞާ ހައްޔަރުކުރުމުގެ އަމުރެއް ނެރެދެވެން ނެތްކަމަށް ކްރިމިނަލް ކޯޓުން ނިންމި ނިންމުން އިސްތިއުނާފު ނުކުރަން ޕީޖީ އޮފީހުން ނިންމައިފިއެވެ.
ޕީޖީ އޮފީހުން ވިދާޅުވީ ކެނދިކުޅުދޫ ދާއިރާގެ މެންބަރު އަޙްމަދު އީސާގެ މައްޗަށް ތުހުމަތު ކުރެވި، ތަޙުޤީޤު ކުރަމުންދާ މައްސަލައަކާ ގުޅިގެން، އޭނާ ހައްޔަރު ކުރުމުގެ އަމުރަކަށް އެ އޮފީހުން ކްރިމިނަލް ކޯޓަށް ހުށަހެޅުމުން، އެފަދަ އަމުރެއް ނެރެދެވޭނެ ތަނެއް ނެތްކަމަށް ކްރިމިނަލް ކޯޓުން ނިންމި ނިންމުން އިސްތިއުނާފު ނުކުރުމަށް ނިންމާފައިވާކަމަށެވެ.
އެގޮތަށް ނިންމާފައިވަނީ މައިގަނޑު 4 ކަމެއްގެ މައްޗަށްް ބިނާކޮށްގެންކަމަށާއި، އެ މައްސަލައިގެ ތަޙުޤީޤުގެ މައިގަނޑު މަސައްކަތްތައް މިހާރު ނިމި، ޕީޖީ އޮފީހަށް ހުށަހެޅުމުގެ މަރުޙަލާގައި އޮތުމުން، ދަޢުވާ ކުރުމާމެދު ވަރަށް އަވަހަށް ގޮތެއް ނިންމޭނެ މައްސަލައެއް ކަމަށްވުން ހިމެނޭކަމަށް ޕީޖީ އޮފީހުން ވިދާޅުވިއެވެ.
މީގެ އިތުރުން ތަޙުޤީޤަށް ހެކީގެ ގޮތުގައި ނަގަންޖެހޭ ބަޔާންތައް ނަގައި ނިމިފައިވާތީ، ހެއްކަށް ނުފޫޒު ފޯރުވުމަށް އޮތް ފުރުޞަތު ކުޑަކަމަށާއި، އަނިޔާލިބުނު ފަރާތުގެ ރައްކާތެރިކަން ކަށަވަރުކުރެވިފައިވާކަންވެސް ޕީޖީ އޮފީހުން ފާހަގަކުރެއްވިއެވެ.
އަދި މިއަމުރަށް އެދި ހުށަހެޅިއިރުގެ ޙާލަތާއި، މިހާރުގެ ޙާލަތު ބަދަލުވެފައިވާކަމަށް ޕީޖީ އޮފީހުން ވިދާޅުވިއެވެ.
މިއީ މެންބަރު ޢީޞަގެ މައްޗަށް ގެވެށި އަނިޔާއެއް ހުށައެޅިފައިވާއިރު، މިމައްސަލައިގައި އޭނާ ހައްޔަރުކުރުމުގެ ޢަމުރަކަށް ޕީޖީން ކްރިމިނަލް ކޯޓުގައި އެދުމުން އެ ކޯޓުން ނިންމީ ޢީޞައަށް ގެވެށި އަނިޔާގެ ތުހުމަތު ކުރެވޭ ފަދަ ސަބަބުތަކެއް ހުރިނަމަވެސް ޢަމުރު ނެރެދެވޭނެ ގާނޫނީ ބިނާއެއް ނެތް ކަމަށެވެ.
މައުލޫމާތު ލިބިފައިވާގޮތުން ރައްޔިތުންގެ މަޖިލީހުގެ ކެނދިކުޅުދޫ ދާއިރާގެ މެމްބަރު އަޙްމަދު ޢީޞާއާ ދެކޮޅަށް ހުށަހަޅައި ތަހުގީގު ކުރަމުން އަންނަ ގެވެށި އަނިޔާގެ މައްސަލަ ކުރިއަށް ނުގެންދަން އޭނާގެ ކުރީގެ އަނބިކަނބަލުން ނަސްރާ ނަސީމްވަނީ މިއަދު ފުލުހުންގެ ޢިދާރާގައި އެދިވަޑައިގެންފައެވެ.