ޤާނޫނު އަސާސީއިން ސިފައިންނަށް މަތިކޮށްފައިވާ އެންމެހާ ކަންކަމަށް ސިފައިން އިޚްލާޞްތެރިކަމާއިއެކު ސާބިތުކަންމަތީ ދެމިތިބުމަށާ، ސިޔާސީ އެންމެހާ ކަންކަމުން ސިފައިން އެއްކިބާވެ ތިބުމަށް ޑިފެންސް މިނިސްޓަރ ގޮވާލައްވައިފިއެވެ.ސިފައިންނާ ބައްދަލުކުރައްވާ، މިނިސްޓަރ އޮފް ޑިފެންސް އެންޑް ނޭޝަނަލް ސެކިއުރިޓީ އާދަމް ޝަރީފް ޢުމަރު ވަނީ، ސިފައިންގެ ބަދަހި ސަފުތައް ޤައުމީ ކަންކަމުގައި ވަމުންދާ ޤުރުބާނީގައި ދެމިތިބުމަށާއި ދިވެހި ސިފައިންގެ ބަދަހި ލަޝްކަރު އިޚްލާޞްތެރިކަމާއިއެކު ސާބިތުކަންމަތީ ދެމިތިބުމަށް ގޮވާލައްވާފައެވެ. އަދި ސިފައިންގެ މަތިވެރި ޤައުމީ ވާޖިބުގެ މަތިން ހަނދާން އާކޮށްދެއްވާ، އެވާޖިބު އަދާކުރުންމަތީ ދެމިތިބުމަށް އެންމެހާ ސިފައިންނަށް މިނިސްޓަރ ނަސޭހަތްތެރިވެލެއްވިއެވެ.ސިފައިންނަކީ ޤައުމާއި، ރައްޔިތުންނަށްޓަކައި ބޮޑެތި ޤުރުބާނީތަކެއް ވަމުންދާ ބައެއްކަން ފާހަގަކުރައްވާ، ހަރުދަނާ އަސާސްތަކެއްގެ މަތީގައި ދިވެހި ސިފައިންގެ ކޯޑް އޮފް އެތިކްސްގެ މަތީގައި ދެމިތިބެ ޤައުމަށް އިޚްލާޞްތެރި މަސައްކަތްތަކެއް ކޮށްދެއްވަމުން ގެންދަވާ ވަރުގަދަ ލަޝްކަރެއް ކަމުގައި މިނިސްޓަރ ފާހަގަކުރެއްވިއެެވެ.އެމަނިކުފާނުގެ ވާހަކަފުޅުގައި ދިވެހި ތާރީޚުގެ މައްޗަށް ބައްލަވާލައްވާ ދިވެހި ސިފައިންނަށް ކުރިމަތިވި ތަފާތު ގޮންޖެހުމުގެ މައްޗަށްވެސް އަލިއަޅުއްވާލައްވާ ވާހަކަފުޅު ދެއްކެވިއެވެ.ޑިފެންސް މިނިސްޓަރ ސިފައިންނާ ބައްދަލުކުރެއްވުމަށް ބޭއްވި ރަސްމިއްޔާތުގައި ވައިސް ޗީފް އޮފް ޑިފެންސް ފޯސް ބްރިގޭޑިއަރ ޖެނެރަލް އަޙްމަދު ޝާހިދާއި ޖެނެރަލް އޮފިސަރުންނާއި ސީނިއަރ އޮފިސަރުންނާއި އެހެނިހެން ރޭންކުތަކުގެ ގިނަ އަދަދެއްގެ ސިފައިން ބައިވެރިވިއެވެ.