ރައްޔިތުންގެ މަޖިލީހުގެ ކެނދިކުޅުދޫ ދާއިރާގެ މެމްބަރު އަޙްމަދު ޢީސާގެ މައްޗަށް ތުހުމަތު ކުރެވިފައިވާ ގެވެށިއަނިޔާގެ މައްސަލާގައި އިންސާފުވެރި ފުރިހަމަ ޖިނާޢީ ތަޙްޤީޤެއް ހިންގައިދިނުމަށް އޭނާ ނިސްބަތްވާ އެމްޑީޕީން ގޮވާލައިފިއެވެ.
ވެރިކަން ކުރާ މައިޕާޓީ އެމްޑީޕީން ނެރުނު ބަޔާނެއްގައިވަނީ ރައްޔިތުންގެ މަޖިލީހުގައި އެޕާޓީ ތަމްސީލުކުރާ އަޙްމަދު ޢީސާގެ މައްޗަށް ގެވެށިއަނިޔާގެ ކުށްތަކެއްގެ ސީރިއަސް ތުހުމަތުތަކެއް ކުރެވިފައިވާތީ، އޭނާގެ މައްޗަށް ތުހުމަތުކުރެވޭ އެ ޢަމަލާ މެދު ކަންބޮޑުވާކަމަށާއި، އެކަން ހަރުއަޑުން ކުށްވެރިކުރާކަމަށެވެ.
އަދި މި މައްސަލައިގައި އިންސާފުވެރި ފުރިހަމަ ޖިނާޢީ ތަޙްޤީޤެއް އަވަހަށް ހިންގަވައިދެއްވުމަށް އެޕާޓީން އެދޭކަމަށް އެމްޑީޕީގެ ބަޔާނުގައިވަނީ ފާހަގަކޮށްފައެވެ.
ގެވެށިއަނިޔާއާއި ނުވަތަ އެއްވެސް ބާވަތެއްގެ ލާއިންސާނީ އަނިޔާއާއި، އިންސާނީ ކަރާމަތަށް އުނިކަން އަންނަ ދަށުދަރަޖައިގެ ޢަމަލުތަކަކީ އެމްޑީޕީން އެއްގޮތަކަށް ވެސް ބަލައިގަންނަ ޢަމަލުތަކެއް ނޫންކަމަށެވެ.
އަޙްމަދު ޢީސާގެ މައްޗަށް ތުހުމަތުކުރެވޭ މައްސަލާއާއި ގުޅިގެން އެކަމުގެ ޖިނާޢީ ތަޙްޤީޤު ނިމެންދެން، ޕާޓީގެ ޤައުމީ މަޖިލީހުންނާއި، ޕާރޓީގެ އެތެރޭގެ ކޮމެޓީތަކުން އޭނާ އެކަހެރިކުރުމަށް އެމްޑީޕީގެ ގެ ފިޔަވަޅުއަޅާ ކޮމެޓީންވަނީ ނިންމާފައެވެ. އަދި ރައްޔިތުންގެ މަޖިލީހުގައި އަޙްމަދު ޢީސާ ތަމްސީލުކުރައްވާ ކޮމެޓީތަކުގެ މުޤައްރިރުކަމުން އޭނާ އެކަހެރިކުރުމަށް އެމް.ޑީ.ޕީ ޕާރލަމެންޓްރީ ގްރޫޕުގައި އިލްތިމާސްކުރުމަށް ނިންމިކަމަށްވެސް އެމްޑީޕީން ބުނެއެވެ.
އަޙްމަދު ޢީސާގެ މައްޗަށް ތުޙުމަތުކުރެވޭ މައްސަލައާ ގުޅިގެން، ވަގުތުން އެޅެންހުރި ފިޔަވަޅުތަކާ މެދުގައާއި އަދި ޖިނާޢީ ތަޙްޤީޤު ހިނގާގޮތް ގާތުން ބެލުމުގެ މަސައްކަތް އެމް.ޑީ.ޕީ.ގެ މެޖޯރިޓީ އޮންނަ ރައްޔިތުންގެ މަޖިލީހުގެ ކަމާ ގުޅުންހުރި ކޮމެޓީތަކުން މިހާރު ފަށާފައިވާކަން އެޕާޓީން ފާހަގަކުރިއެވެ.
އެމްޑީޕީން މިގޮތަށް ނިންމާފައިމިވަނީ މެންބަރު އަޙްމަދު ޢީސާގެ އަނބިކަނބަލުން އަސްރާ ނަސީމްއަށް އަނިޔާކުރި މައްސަލަ ފުލުހުންނަށް ހުށަހަޅާފައިވަނިކޮށެވެ. މިމައްސަލައާ ގުޅިގެން އަސްރާ ނަސީމްވަނީ ފުލުހުންގެ ފެމިލީ އެންޑް ޗައިލްޑް ޕްރޮޓެކްޝަން ޑިޕާޓްމަންޓަށް އިއްޔެ ހަވީރު ވަޑައިގެންފައެވެ.
އަސްރާ މިއަދު ފޭސްބުކްގައި ހިއްސާކުރެއްވި ޕޯސްޓެއްްގައި ވިދާޅުވެފައިވަނީ މިއީ އޭނާއާއި އޭނާގެ ތުއްތު ދަރިފުޅަށް އުނދަގޫ އިޙްސާސްތަކެއް ކުރަންޖެހު ވަގުތެއްކަމަށެވެ. އަދި އެއީ ކުރިމަތިވާނެ ކަމަށް ދުވަކުވެސް އޭނާ ހީކޮށްފައިނުވާ ކަންތައްތަކެއްނަމަވެސް މިހާރު އެދެމައިންގެ ޙާލުވެސް ރަގަނޅުކަމަށެވެ.
މިކަމާއި ގުޅިގެން އެތައްބަޔަކުދަނީ މެންބަރު ޢީސައަށް ފާޑުކިއުންތައް އަމާޒުކޮށް، މެންބަރުކަމުން އިސްތިއުފާދެއްވުމަށްވެސް ގޮވާލަމުންނެވެ.
މެންބަރު ޢީސައާ ގުޅޭ ގޮތުން ހުށަހަޅާފައިވާ ގެވެށި އަނިޔާގެ މައްސަލަ ކަމާ ގުޅުންހުރި މުއައްސަސާތަކުން ތަޙުޤީޤު ކުރަމުންދާގޮތް މޮނިޓަރކުރަމުންދާކަމަށް ހިއުމަންރައިސްޓް ކޮމިޝަނުންވެސް ވަނީ ވިދާޅުވެފައެވެ.
އެކޮމިޝަނުން ވިދާޅުވީ އަންހެނުންނާއި ކުޑަކުދިންނަށް ކުރާ އަނިޔާ ހަރުކަށި އިބާރާތުން ކުށްވެރިކުރާކަމަށާ، އެފަދަ އަނިޔާތައް ތަހައްމަލް ކުރާ ފަރާތަކުން ލަސްނުކޮށް ކަމާ ގުޅުންހުރި އިދާރާތަކަށް އެކަން ހުށަހަޅައި އެހީތެރިކަން ހޯއްދަންވާނެކަމަށެވެ.
މިމައްސަލާގައި މެންބަރު ޢީސަ މިއަދު ވިދާޅުވީ އޭނާގެ މައްޗަށް ތުހުމަތުކުރެވިފައިވާ ގެވެށި އަނިޔާގެ މައްސަލައިގެ ތަހުޤީގު ކުރެވެމުންދާތީ ދަޢުލަތުގެ ކަމާއިބެހޭ އެންމެހައި މުއައްސަސާތަކަށް އެއްބާރުލުން ދިނުމުގެ ގޮތުން މިއަދުން ފެށިގެން މަޖިލީހުގެ އިޖްތިމާޢީ ކޮމިޓީގެ މުޤައްރިރުކަމުން އިސްތިއުފާ ދެއްވާފައިވާކަމަށެވެ.
އަދި ރާއްޖޭގެ ޤާނޫނުތަކާއި ޤަވާޢިދުތަކާ ޚިލާފު އެއްވެސް ޢަމަލެއް ހިންގަވާފައިނުވާނެކަމަށް ވިދާޅުވެ ކުރެވިފައިވާ ތުހުމަތުތައް އޭނާ ދޮގުކުރެއްވިއެވެ. އަދި މިމައްސަލައިގެ ތަޙްޤީޤަށް އެއްބާރުލުން ދެއްވާނެކަމަށްވެސް ޢީސަ ވިދާޅުވިއެވެ.
ގެވެށި އަނިޔާގެ ތުހުމަތު ކުރެވިފައިވާ މެމްބަރު ޢީސަ ހައްޔަރުކުރުމުގެ އަމުރެއް ހޯދުމަށް ޕީޖީ އޮފީހުގައި ފުލުހުން އެދިފައިވާކަމަށް ޕީޖީ އޮފީހުންވަނީ ކަށަވަރުކޮށްދެއްވާފައެވެ. މައުލޫމާތު ލިބިފައިވާގޮތުން އެ އަމުރު ހޯދަން ކްރިމިނަލް ކޯޓަށް މިހާރުވަނީ ހުށަހަޅާފައެވެ.