އެމްއެމްޕީއާރުސީ ބޮޑު ޚިޔާނާތުގެ ފައިސާ ލިބުނު މީހުންގެ ތެރެއިން ދައުލަތުގެ އެކި މަޤާމުތަކުގައި ތިއްބެވި މީހުން މަޤާމުތަކުން ވަކިކުރުމަށް ރައްޔިތުންގެ މަޖިލީހުން ފާސްކޮށްފިއެވެ.
މަޖިލީހުން މިގޮތަށް ފާސްކުރެއްވީ ވޯޓްގައި ބައިވެރިވެވަޑައިގެންނެވި 45 މެންބަރުންގެ އިއްތިފާގުންނެވެ.
އެމްއެމްޕީއާރުސީގެ ބޮޑު ޚިޔާނާތުގެ ފައިސާގައި ލިބުނުކަމަށް ތުހުމަތުކުރާ މީހުންގެ ލިސްޓު ރައްޔިތުންގެ މަޖިލީހުގެ އެދިވަޑައިގަތުމަށް ތަހުގީގީ އިދާރާތަކުން ވަނީ ފޮނުވާފައެވެ. އަދި މަޖިލީހުގެ ސަލާމަތީ ޚިދުމަތްތަކާއި ބެހޭ ކޮމިޓީއާއި، ޖުޑީޝަރީ ކޮމިޓީ ގުޅިގެން އުފައްދާފައިވާ ކޮމިޓީން ވަނީ މި މައްސަލަ ދިރާސާކޮށްފައެވެ. އަދި ކޮމިޓީން ވަނީ އެމް.އެމް.ޕީ.އާރްސީގެ މާލީ މަންފާ ލިބިފައިވާކަމަށް ތުހުމަތުކުރެވޭ ފަރާތްތަކުގެ ލިސްޓް ޢާންމުކޮށްފައެވެ.
މަޖިލީހުން މިއަދު ފާސްކުރެއްވި ރިޕޯޓްގައި އެމްއެމް.ޕީ.އާރް.ސީގެ ވައްްކަމާއި ޚިޔާނާތުގެ މައްސަލައިގެ ތަޙްޤީޤު ލަސްވެފައިވާކަމާއި، ރިޕޯޓްގައި ހިމަނާފައިވާ ދައުލަތުގެ މުވައްޒަފުންގެ ގޮތުގައި މަސައްކަތްކޮށްފައިވާ ނުވަތަ މިހާރު މަސައްކަތްކުރަމުންދާ ފަރާތްތަކަކީ ދައުލަތުގެ އޮނިގަނޑުގެ ތެރެއިން މައުލޫމާތު ލިބޭނެ އަދި ނުފޫޒު ފޯރުވުމުގެ ފުރުޞަތު އޮންނާނޭ ފަރާތްތަކެއްކަމަށްވާތީ، މި މައްސަލައިގެ ތަޙްޤީޤު އަވަސްކުރުމަށް އެންޑް އެސެޓް ރިކަވަރީ ކޮމިޝަންގައި ދެންނެވުމަށް ފެންނަކަމަށް ހިމަނާފައިވެއެވެ. އަދި ރިޝްވަތު ދިނުމާއި ރިޝްވަތު ހިފުން ހުއްޓުވުމާއި، މަޤާމުގެ ނުފޫޒު ބޭނުންކޮށްގެން ނާޖާއިޒު ފައިދާ ހޯދުމާއި ހޯދައިދިނުން ހުއްޓުވުމާއި، މިފަދަ ކޮރަޕްޝަންގެ މައްސަލަތައް ތަޙްޤީޤުކުރުމުގެ އެންމެ އިސް ދައުރު އަދާކުރުމުގެ މަސްއޫލިއްޔަތު އަދާކަންކުރަންޖެހޭ އެއް ފަރާތަކީ އެންޓި-ކޮރަޕްޝަން ކޮމިޝަންކަމަށްވާއިރު، މިފަދަ ޖޮއިންޓް އިންވެސްޓިގޭޝަނެއްގެ ތަޙްޤީޤަށް އޭސީސީގެ މުވައްޒަފުންނާއި ފަންނީ ވަސީލަތްތައް އެންމެ ފުރިހަމަ ގޮތުގައި ބޭނުންކުރުމުގެ އިންތިޒާމްތައް ހަމަޖައްސައި ދިނުމަށް އެންޓި -ކޮރަޕްޝަން ކޮމިޝަނުގައިދެންނެވުމަށް ފެންނަކަމަށްވެސް މަޖިލީހުން ފާސްކުރި ރިޕޯޓްގައިވެއެވެ.
މީގެ އިތުރުން އެމް.އެމް.ޕީ.އާރް.ސީގެ ވައްކަމާއި ޚިޔާނާތުގެ މައްސަލައިގައި ފައިސާ ލިބިފައިވާ ފަރާތްތަކުގެ ތެރެއިން، މިހާތަނަށް ތަޙްޤީޤު ނިމިފައިވާ ފަރާތްތަކުގެ އަތުން އެފައިސާ އަނބުރާ ހޯދުމުގެ މަސައްކަތް ކުރިއަށް ގެންދިއުމަށް ދައުލަތުގެ ކަމާގުޅުންހުރި އިދާރާގައި ދެންނެވުމަށް ފެންނަކަމަށާއި، އެ މަސައްކަތް ކުރިއަށް ގެންދާގޮތް ރައްޔިތުންގެ މަޖިލީހުން ބަލަމުން ގެންދިއުމަށް ފެންނަކަމަށްވެސް ރިޕޯޓްގައި ބަޔާންކޮށްފައިވެއެވެ. އަދި މި މައްސަލައިގައި ތުހުމަތުކުރެވޭ ފަރާތްތަކުގެ މައްސަލަތައް ތަޙްޤީޤުކުރާއިރު، އެފަރާތްތަކާމެދު އެވަގުތަކު އެޅެންހުރި މުހިއްމު ފިޔަވަޅުތައް އެޅުމަށް ފެންނަކަމަށާއި، އެގޮތުން ތުހުމަތުކުރެވޭ ފަރާތްތަކުގެ ތެރެއިން ދައުލަތުގެ މަޤާމުތަކުގެ ތެރެއިން ވަކިކުރެވޭނެ ފަރާތްތައް އެވަގުތަކު ހުރި މަޤާމަކުން ވަކިކުރުމަށް ފެންނަކަމަށްވެސް މަޖިލީހުން ފާސްކުރެއްވި ރިޕޯޓްގައި ހިމަނާފައިވެއެވެ.
އިންތިޚާބީ މަޤާމުތަކުގައި ތިބި ފަރާތްތައް މަޤާމުން ވަކި ކުރެވޭނީ އެ ފަރާތެއް އަމިއްލައަށް އެ މަޤާމުން އިސްތިއުފާދިނުމުން ނުވަތަ ޝަރުޢީ ޙުކުމަކުންކަމަށްވާތީ، މި މައްސަލައިގައި ތުހުމަތުކުރެވޭ ފަރާތްތަކުގެ
ތަޙްޤީޤު އަވަސްކުރުމަށް އެސެޓް ރިކަވަރީގައި ކޮމިޝަންގައި ދެންނެވުމަށް ފެންނަކަމަށްވެސް ރިޕޯޓްގައިވެއެވެ. އަދި ދިވެހިރާއްޖޭގައި ފައިނޭންޝަލް ކްރައިމްސް ގިނަވަމުންދާކަން ފާހަގަވާތީ، ފައިނޭންޝަލް އިންވެސްޓިގޭޝަންގެ ދާއިރާއިން މީހުން ތަމްރީނުކުރުމަށް އިސްކަން ދިނުމަށް ފެންނަކަމަށާއި، މިފަދަ ތަޙްޤީޤުތައް ކުރާ ފަރާތްތަކަށް އެކަށީގެންވާ ވަޞީލަތްތައް ފޯރުކޮށްދީ، އެފަދަ މައްސަލަތައް ތަޙްޤީޤުކުރާ އިދާރާތައް ހަރުދަނާކުރުމަށް އަޅަންޖެހޭ ފިޔަވަޅުތައް އެޅުމަށް ދައުލަތުގެ ކަމާގުޅޭ އިދާރާތަކުގައި ދެންނެވުމަށް ފެންނަކަމަށްވެސް މަޖިލީހުން ފާސްކޮށްފައިވާ ރިޕޯޓްގައިވެއެވެ.
ޚިޔާނާތުގެ ފައިސާ ލިބުނު މީހުން ސަރުކާރުގެ މަޤާމުތަކުން ދުރުކުރުމަށް މަޖިލީހުން ފާސްކޮށްފައިވާއިރު، ސަރުކާރުގެ ވަޒީފާތަކުގައި ތިބި މީހުންނަށް ފިޔަވަޅު އެޅުމާ މެދު ގޮތެއް ނިންމާނީ ތަހުގީގަށް ފަހުގައި ކަމަށް ރައީސް އޮފީހުން ވަނީ ވިދާޅުވެފައެވެ.
އެމް.އެމް.ޕީ.އާރު.ސީ މެދުވެރިކޮށް ހިންގާފައިވާ ވައްކަމާއި ޚިޔާނާތުގެ މައްސަލައިގައި ބައިވެރިވިކަމަށް ނުވަތަ މަންފާ ލިބުނުކަމަށް ތުހުމަތުކުރެވޭ 281 ފަރާތެއްގެ ނަން މިލިސްޓުގައި ހިމެނޭއިރު، ދަޢުލަތުގެ އެކިއެކި މަޤާމުގައި ތިބި 119 މީހަކު ހިމެނެއެވެ.