މިދިޔަ އަހަރު ސްޓޭޓް ޓްރޭޑިން އޮގަނައިޒޭޝަން، އެސްޓީއޯއަށް ލިބުނު ފައިދާއިން ހިއްސާދާރުންނަށް 60 ރުފިޔާ ބަހަން އެ ކުންފުނީގެ ބޯޑުން ފާސްކޮށްފިއެވެ. މި ނިންމުން ތަންފީޒުވާނީ އަހަރީ އާއްމު ޖަލްސާގައި ހިއްސާދާރުން ރުހުން ދިނުމުންނެވެ.
ހިއްސާއަކަށް 60 ރުފިޔާ ބަހަން ހުށައެޅުމަށް ކުންފުނީގެ ބޯޑުން ފާސްކޮށްފިއެވެ. ހިއްސާއަކަށް 60 ރުފިޔާ ބަހަން ފާސްކޮށްފައިވަނީ މިމަހުގެ 11 ވަނަ ދުވަހު ބޭއްވި އެ ކުންފުނީގެ ޑިރެކްޓަރުންގެ ބޯޑުންނެވެ.
އެސްޓީއޯގެ ޑިރެކްޓަރުންގެ ބޯޑުން ހިއްސާއަކަށް 60 ރުފިޔާ ބަހަން ނިންމީ އެ ބޯޑުން މިމަހުގެ 11 ވަނަ ދުވަހުގެރޭ ބޭއްވި ބައްދަލުވުމުގައެވެ. މިދިޔަ އަހަރުގެ ފައިދާއިން ހިއްސާއަކަށް 60 ރުފިޔާ ބެހުމަށް އަހަރީ އާންމު ޖަލްސާއަށް ހުށައެޅުމަށް ފާސްކޮށްފައިވާއިރު މިއީ 2019 ވަނަ އަހަރު ހިއްސާގެ ފައިދާގެ ގޮތުގައި ބެހި އަދަދަށްވުރެ 2 ރުފިޔާ އިތުރު އަދަދެކެވެ. 2019 ވަނަ އަހަރުގެ ފައިދާއިން ހިއްސާއަކަށް އެސްޓީއޯއިން ބަހާފައިވަނީ 58 ރުފިޔާއެވެ.
2019 ވަނަ އަހަރުވެސް އެސްޓީއޯއަށް އޭގެ ކުރީ އަހަރަށްވުރެ ލިބުނު ފައިދާ އިތުރެވެ. މިގޮތުން އެއަހަރުގެ ފައިދާ 95 އިން ސައްތަ އިތުރުވެ އަހަރު ނިމުނު އިރު ފައިދާގެ އަދަދު ހުރީ 383 މިލިއަންގައެވެ.
އެސްޓީއޯއަށް މިދިޔަ އަހަރު އާމްދަނީގެ ގޮތުގައި ލިބިފައިވަނީ 7.2 ބިލިއަން ރުފިޔާއެވެ. މީގެތެރެއިން ސާފު ފައިދާގެ ގޮތުގައި ލިބިފައިވަނީ 409 މިލިއަން ރުފިޔާއެވެ. ވަކި ވަކި ކުއާޓަރުތަކަށް ބަލާލާއިރު، ހުރިހާ ކުއަޓަރތައް ނިންމާލާފައިވަނީވެސް ފައިދާއާއި އެކުއެވެ.
މިިދޔަ އަހަރުގެ ފުރަތަމަ ކުއާޓަރުގައި އެސްޓީއޯއަށް ސާފު ފައިދާގެ ގޮތުގައި ލިބިފައިވަނީ 114 މިލިއަން ރުފިޔާއެވެ. 2 ވަނަ ކުއާޓަރުގައި 104 މިލިއަން ރުފިޔާ، 3 ވަނަ ކުއާޓަރުގައި 100 މިލިއަން ރުފިޔާ އަދި 4 ވަނަ ކުއާޓަރުގައި 91 މިލިއަން ރުފިޔާ ސާފު ފައިދާގެ އެކުންފުންޏަށްވަނީ ލިބިފައެވެ.