މިއަހަރަކީ ރާއްޖޭގެ ނޫސްވެރިކަމުގައި އައު ހަރުފަތްތަކެއް ގިރާކޮށް އިންޤިލާބީ ބަދަލެއް ގެނުވި އަހަރެއްކަމަށް މީޑިއާ ކައުންސިލުން ބުނެފިއެވެ.
ދުނިޔޭގެ ނޫސްވެރިކަމުގެ މިނިވަންކަމުގެ ދުވަހުގެ މުނާސަބަތުގައި މޯލްޑިވްސް މީޑިއާ ކައުންސިލްގެ ރައީސް ޞަހުބާން ފަހުމީ ފޮނުުއްވި ޚިތާބުގައި ވިދާޅުވީ، ނޫސްވެރިކަމުގެ މިނިވަންކަން ދަރަޖަކުރާ ޕްރެސް ފްރީޑަމް އިންޑެކްސްގައި މި އަހަރު ދިވެހިރާއްޖެއިން އިތުރު 7 ދަރަޖައިގެ ކުރިއެރުމެއް ހޯދައި އެ އިންޑެކްސްގެ 72 ވަނައަށް އަރާފައިވާކަމަށެވެ. އަދި މިއީ ދެކުނު އޭޝިޢާ ސަރަހައްދުން މިއަހަރުވެސް ފާހަގަކޮށްލެވޭ ކާމިޔާބެއްކަމަށްވާތީއާއި ވޭތުވެދިޔަ 3 އަހަރުވެސް ނޫސްވެރިކަމުގެ މިނިވަންކަމުގައި، ދިވެހިރާއްޖެއިން އެއް އަހަރަށްވުރެ އަނެއް އަހަރު ކުރިއެރުން ހޯދަމުން ގެންދިއުން ފާހަގަކޮށް އެމްއެމްސީން ވަނީ ރާއްޖޭގެ އެންމެހާ ނޫސްވެރިންނާއި މީޑިއާތަކަށް މަރުހަބާ ދަންނަވާފައެވެ.
މިއަހަރުގެ ނޫސްވެރިކަމުގެ މިނިވަންކަމުގެ ދުވަހުގެ ޝިއާރުކަމުގައިވާ "މައުލޫމާތު ރައްޔިތުންގެ ޙައްޤެއްގެ ގޮތުގައި"، މި ޝިއާރުން ހާމަވަނީ ތެދު މައުލޫމާތު ހާމަކަން ބޮޑުގޮތެއްގައި ފޯރުކޮށްދިނުމަކީ ރައްޔިތުންނަނަށް ލިބިގެންވާ ޙައްޤެއްގެ ގޮތުގައިކަމާއި ރާއްޖޭގެ ނޫސްވެރިން މިފަދައިން ޚަބަރުތައް ފޯރުކޮށްދެމުންދާކަމީއެކަމާއި އުފާކޮށް ތައުރީފު ޙައްޤު މަސައްކަތެއްކަމަށް ޞަހުބާން ވިދާޅުވިއެވެ.
ޢަދި ހަމައެއާއެކު ނޫސްވެރިންނަކީ މުޖުތަމައަށް ނަމޫނާ ދައްކަންޖެހޭ ބަޔަކަށް ވާއިރު އެންމެހާ ނޫސްވެރިންނާއި މީޑިއާތަކުން، އިސްލާމީ ރިވެތި އަޚްލާޤާއި ބައިނަލްއަޤްވާމީ ގޮތުން ބަލައިގަނެފައިވާ ނޫސްވެރިކަމުގެ އަޚްލާޤީ މިންގަނޑުގެ ތެރެއިން މަސައްކަތްކުރެއްވުމަށް މޯލްޑިވްސް މީޑިއާ ކައުންސިލުގެ ރައީސްގެ ހިތާބުގައިި ގޮވާލެއްވިއެވެ.