ރާއްޖެއަށް މިހާރު އެންމެ ގިނައިން ދަތުރުކުރަމުންދަނީ ޔޫރަޕް ސަރަހައްދުގެ އެއަރލައިންތައްކަމަށް ޓޫރިޒަމް މިނިސްޓްރީގެ ތަފާސް ހިސާބުތަކުން ދައްކައިފިއެވެ.
ކޯވިޑް19 އަށްފަހު ރާއްޖޭގެ ބޯޑަރު އަލުން ހުޅުވާލާފައިވަނީ މިދިޔަ އަހަރުގެ ޖުލައިމަހުގެ ތެރޭގައެވެ. މިއާއިއެކު ބައިނަލްއަޤްވާމީ ގިނަ އެއަރލައިންތަކަކުން މިހާރު ވަނީ ރާއްޖެއަށް އަލުން ދަތުރުތައް ފަށާފައެވެ.
ޓޫރިޒަމް މިނިސްޓްރީން އެންމެ ފަހުން އާންމުކޮށްފައިވާ "މޯލްޑިވްސް ޓޫރިޒަމް ބުލެޓިންގ" ގައި ވާގޮތުން މިހާރު ރާއްޖެއަށް 23 އެއަރލައިންއަކުން އަންނަނީ ޝެޑިއުލް ދަތުރުތައް ކުރަމުންނެވެ. އަދި 7 އެއަރލައިނަކުން އަންނަނީ ޗާޓަރ ދަތުރުތައް ކުރަމުންނެވެ.
އަލުން ދަތުރުފެށި އެއަރލައިންތަކުގެ ތެރޭގައި އެންމެ ގިނައިން ހިމެނެނީ ޔޫރަޕް ސަރަހައްދުގެ އެއަރލައިންތައްކަމަށް ޓޫރިޒަމް މިނިސްޓްރީގެ ތަފާސް ހިސާބުތަކުން ދައްކައެވެ. އެގޮތުން ޔޫރަޕް ސަރަހައްދުގެ 10 އެއަރލައިނަކުން މިހާރު ރާއްޖެއަށް އަންނަނީ ޝެޑިއުލް ދަތުރުތައް ކުރަމުންނެވެ. މެދު އިރުމަތީގެ 5 އެއަރލައިނަކާއި، އިންޑިއާގެ 3 އެއަރލައިނަކާއި އެހެން ސަހަރައްދުތަކުން 4 އެއަރލައިނަކުން މިހާރު ރާއްޖެއަށް އަންނަނީ ޝެޑިއުލް ދަތުރުތައް ކުރަމުންނެވެ.
ރާއްޖެއަށް ޗާޓަރ ދަތުރުތައް ކުރަމުން އަންނަ އެއަރލައިންތަކުގެ ތެރޭގައިވެސް ގިނަ އެއަރލައިންތަކަކީވެސް ޔޫރަޕްގެ އެއަރލައިންތަކެވެ. އެގޮތުން ޔޫރަޕް ސަރަހައްދުގެ 6 އެއަރލައިނަކުން އަންނަނީ ރާއްޖެއަށް ޗާޓަރ ދަތުރުތައް ކުރަމުންނެވެ.
ޔޫރަޕުން ރާއްޖެއަށް ދަތުރުކުރާ އެއަރލައިންތަކުގެ އަދަދު އިތުރުވެފައިވާއިރު، މިދިޔަ އަހަރާއި އަޅާބަލާއިރު މިއަހަރު ޔޫރަޕް މާކެޓުން ވަނީ ބޮޑު ކުރިއެރުމެއްވެސް ހޯދާފައެވެ. އެގޮތުން މިއަހަރުގެ މިހާތަނަށް ޔޫރަޕް ސަރަހައްދުން ރާއްޖެއަށް 256434 ފަތުރުވެރިން ވަނީ ރާއްޖެ އައިސްފައެވެ. މިއީ މިދިޔަ އަހަރާއި އަޅާބަލާއިރު %7.3 އިތުރުއަދަދެކެވެ. 2020 ވަނަ އަހަރު ޔޫރަޕް ސަރަހައްދުން ރާއްޖެ އައިސްފައިވަނީ 348349 ފަތުރުވެރިންނެވެ.
ޓޫރިޒަމް މިނިސްޓްރީގެ ތަފާސްހިސާބުތައް ދައްކާގޮތުން މިއަހަރުގެ މިހާތަނަށް ރާއްޖެއަށް 389770 ފަތުރުވެރިން ވަނީ އައިސްފައެވެ. މިއީ މިދިޔަ އަހަރުގެ މި މުއްދަތާއި އަޅާބަލާއިރު %1.8 އިތުރުވުމެކެވެ.