ރާއްޖޭގެ ވެކްސިނޭޝަން ޕްރޮގްރާމް ކުރިއަށްގެންދާގޮތަކަށް ފަތުރުވެރިކަމުގެ ސިނާއަތުގައި ގިނަ ދުވަސްތަކެއް މަސައްކަތްކޮށްފައިވާ އަދި މަޓީގެ ޗެއަރމަން ޞަލާހް ޝިހާބް ތައުރީފްކުރައްވައިފިއެވެ.
"އައިއޭމް ވެކްސިނޭޓެޑް" ކެމްޕެއިން ފެށުމުގެ ރަސްމިއްޔާތުގައި ވާހަކަދައްކަވަމުން މޯލްޑިވްސް އެސޯސިއޭޝަން އޮފް ޓޫރިޒަމް އިންޑަސްޓްރީގެ ވައިސް ޗެއަރމަން ސަލާހް ޝިހާބު ވިދާޅުވީ، އެންމެ އަވަހަށް ވެކްސިން ލިބުނު ޤައުމުތަކުގެ ތެރޭގައި ރާއްޖެ ހިމެނުމަކީ ލިބުނު ވަރަށް ބޮޑު ކާމިޔާބީއެއްކަމަށެވެ.
ދިވެހިންނާއި ރާއްޖޭގައި އުޅޭ ބިދޭސީންނާއި އެއްވެސް ތަފާތު ކުރުމެއްނެތި ވެކްސިން ޕްރޮގްރާމް ކުރިއަށްގެންދާތީ ސަލާހް ޝިހާބު ވަނީ އެކަމަށް ތައުރީފް ކުރައްވާފައެވެ. މިއީ ވަރަށް މަދު ޤައުމެއްގައި މެނުވީ ފަހިކޮށްދީފައިނުވާ ފުރުސަތެއްކަން އޭނާ ވަނީ ފާހަގަކުރައްވާފައެވެ.
"އަޅުގަނޑު ފާހަގަކޮށްލަން ބޭނުން އެއްވެސްކަހަލަ ޑިސްކްރިމިނޭޝަނެއް ނެތި ރާއްޖޭގައި ދިރިއުޅޭ އެންމެންނަށް މި ވެކްސިނޭޝަން ލިބެމުންދާކަން. އެއީ ވަރަށް މަދު ޤައުމެއްގައި މެނުވީ ނުވާކަމެއް. އަދި އަމިއްލަ ރައްޔިތުންނަށްވެސް ނުލިބޭ ފުރުސަތެއް. އެހެންވީމަ އަޅުގަނޑުމެންގެ ޤައުމެއް ނެތްކަމަށް ބުނާ މީހުންނަށް ދަންދެން އެ ސަފުގައި ޖެހިގެން އެ އުމުރަށް ފެތޭކަމަށްވަންޏާ އެމީހުންނަށް އެކަން ލިބެމުން އަންނަނީ. މީގައި އެންމެން އެކުގައި މަސައްކަތްކޮށްގެން މިކަން ކާމިޔާބުކުރެވެން އަންނަނީ" ސަލާހް ޝިހާބު ވިދާޅުވިއެވެ.
ސަލާހް ޝިހާބު ވަނީ މި ބަލި ކޮންޓްރޯލްކުރުމަށް ރާއްޖޭގެ ޕްރަންޓްލައިންގައި މަސައްކަތްކުރާ މުވައްޒަފުންގެ ބުރަ މަސައްކަތް ފާހަގަކުރައްވާފައެވެ. ދުނިޔޭގެ އެންމެ ކުރީގައި ވެކްސިނޭޓް ފުރިހަމަ ކުރެވޭ ޤައުމެއްގެ ތެރޭގައި ރާއްޖެ ހިމެނުމަކީ ވަރަށް އެކަށީގެންވާކަމެއްކަމަށް އޭނާ ވިދާޅުވިއެވެ.
"ދަރިން ދޫކޮށްފައި، މުސްކުޅި މައިންބަފައިން ދޫކޮށްފައި ރެއާއި ދުވާލު މަސައްކަތްކުރައްވާ ވަރަށް ގިނަ އަދަދެއްގެ ބޭފުޅުން ފްރަންޓްލައިންގައި މިއުޅުއްވަނީ. އެބޭފުޅުންގެ މަސައްކަތުންނާއި ސަރުކާރުގެ މަސައްކަތުންނާއި ހެލްތް، ސެކިއުރުޓީ ބޭފުޅުން ހިމެނޭގޮތައް އަޅުގަނޑުމެންނަށް މިއަދު މިފެންނަނީ ވަރަށް އުޖާލާ މުސްތަޤްބަލެއް. ދުނިޔޭގެ އެންމެ ކުރީގައި ވެކްސިނޭޓް ފުރިހަމަ ކުރެވޭ ޤައުމެއްގެ ތެރޭގައި ރާއްޖެ ހިމެނުމަކީ ވަރަށް އެކަށީގެންވާކަމެއް. އަޅުގަނޑު އެއްގޮތަކަށްވެސް އުންމީދެއް ނުކުރަން މިހާކުރިން އަޅުގަނޑަށް 2 ޑޯޒް ލިބޭނެކަމަކަށް. އެކަމަކު މިއަދު އިރާދަކުރެއްވިއްޔާ އަޅުގަނޑަށް 2 ޑޯޒް ލިބުނުތާ 3 ހަފްތާވެގެން ވަރަށް ބޮޑަށް އަޅުގަނޑުގެ އަމިއްލަ ހިތްހަމަޖެހުމުގައި މިހުރީ. އިރާދަކުރެއްވިއްޔާ މިބަލި އަދި ޖެހުނަސް އަޅުގަނޑަށް އޭގެ އެންމެ ސީރިއަސް ހިސާބަށް ނުގޮސް ރައްކާތެރިކަން ލިބޭނެކަމަށް." ޝިހާބު ވިދާޅުވިއެވެ.
"އައި އޭމް ވެކްސިނޭޑެޓް" ކެމްޕެއިންގެ މަޤްސަދަކީ ރާއްޖޭގެ ފަތުރުވެރިކަމުގެ ސިނާއަތުގައި މަސައްކަތްކުރާ ހުރިހާ ފަރާތަކަށް ވެކްސިން ޖަހައި މުޅި ދުނިޔެއިންވެސް އެންމެ ފުރަތަމަ "ފުލީ ވެކްސިނޭޓެޑް" ޓޫރިޒަމެއް ޤާއިމްކުރާ ޤައުމަށް ރާއްޖެ ހެދުމެވެ.