މިދިޔަ އަހަރު އެމްޓީސީސީއަށް ލިބުނު ފައިދާ ބޮޑުތަނުން އިތުރު

2020 ވަނަ އަހަރު އެމްޓީސީސީއަށް ލިބުނު ފައިދާ 253 އިންސައްތައަށް އިތުރުވެއްޖެއެވެ.

އެ ކުންފުނިން ބުނީ މިއީ އެމްޓީސީސީގެ 40 އަހަރުގެ ދިގު ތާރީހުގައި ހޯދި އެންމެ ރަނގަޅު މާލީ ނަތީޖާކަމަށެވެ.

މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮންޕެނީ، އެމްޓީސީސީގެ މާލީ ނަތީޖާ ދައްކާގޮތުން 2020 ވަނަ އަހަރު ޓެކުހަށް ކެނޑުމުގެ ކުރިން ސާފު ފައިދާގެ ގޮތުގައި 224.72 މިލިއަން ރުފިޔާ ވަނީ ލިބިފައެވެ. މިއީ 2019 ވަނަ އަހަރުގެ މާލީ ނަތީޖާއާއި އަޅާބަލާއިރު %253 އިތުރު އަދަދެކެވެ. 2019 ވަނަ އަހަރު ކުންފުންޏަށް ސާފު ފައިދާގެ ގޮތުގައި ލިބިފައިވަނީ 63.65 މިލިއަން ރުފިޔާއެވެ.

އެމްޓީސީސީގެ 2020 ވަނަ އަހަރުގެ މާލީ ނަތީޖާއަށް ބަލާއިރު 2020 ވަނަ އަހަރު ޖުމުލަ 1.37 ބިލިއަން ރުފިޔާގެ ވިޔަފާރި ވަނީ ކޮށްފައެވެ. 2019 ވަނަ އަހަރު ކޮށްފައިވަނީ 1.15 ބިލިއަން ރުފިޔާގެ ވިޔަފާރިއެވެ.

2020 ވަނަ އަހަރު ކުންފުނިން ޙާޞިލްކޮށްފައިވާ ލަނޑުދަނޑިތަކަށް ބަލާއިރު، ޢުމްރާނީ ތަރައްޤީގެ ގިނަ މަޝްރޫޢުތަކެއް ކާމިޔަބުކަމާއިއެކު ވަނީ ހިންގާފައެވެ. އެގޮތުން 36 މަޝްރޫއެއްގެ މަސައްކަތްވަނީ ކަމިޔާބުކަމާއިއެކު ނިންމާލާފައެވެ.

ކުންފުނީގެ އާންމު ވިޔަފާރި ދާއިރާއާއި ކުންފުނީގެ އެހެނިހެން ވިޔަފާރި ދާއިރާތަކަށް އަމާޒުކޮށް ތަފާތު އެކި މާކެޓިން ހަރަކާތްތަކެއްވެސް 2020 ވަނަ އަހަރުގެ ތެރޭގައި ވަނީ ހިންގާފައެވެ. އަދި އާންމު ދަތުރުފަތުރުގެ ޚިދުމަތް މާލެ ސަރަހައްދުގައި އަދި އަތޮޅުތެރޭގެ ޒޯން 5،4،3،2،1 އަދި 6ގައި ވަނީ ކުރިއަށްގެންދެވި، 16 އަތޮޅެއް ވަނީ ގުޅުވައިދީފައެވެ.

އެމްޓީސީސީގެ ވިޔަފާރީގެ މައިގަނޑު ދާއިރާތަކުން ޙާޞިލްކުރަން ބޭނުންވާ ލަނޑުދަޑިތަކާއި މާލީ ނަތީޖާ ހޯދުމަށް ކެނޑިނޭޅި މަސައްކަތް ކުރަމުންދާކަމަށް އެ ކުންފުނިން ބުނެއެވެ.