މާލޭގައި ޒުވާނުންނަށް މުނިފޫހި ފިލުވުމަށް މަރުކަޒެއްހަދަން ހުށައެޅި ޤަރާރު މަޖިލީހުން ފާސްކޮށްފި
ޒުވާނުންގެ މިޔުޒިކު ހުނަރުތައް ތަރައްޤީކުރުމަށާއި، މުނިފޫހި ފިލުވައި، އިޖުތިމާއީ ގުޅުންތައް ދެެހެއްޓުމަށް އެހީވުމަށް ބޭނުންވާ ޖާގަ ތަނަވަސްކޮށްދިނުމަށް، މާލޭގައި މަރުކަޒެއް ޤާއިމުކުރުމަށް ސަރުކާރަށް ގޮވާލައި، ހުށައެޅި ޤަރާރު ރައްޔިތުންގެ މަޖިލީހުން ފާސްކޮށްފިއެވެ.
މި ޤާރާރު ފާސްވީ މަޖިލީހުގެ ޖަލްސާގައި ބައިވެރިވެވަޑައިގެން ވޯޓުދެއްވި 46 މެންބަރުންގެ ވޯޓުންނެވެ. އަދި މި ޤަރާރަށް ވޯޓުދޭން ނުފެންނަކަމަށް 5 މެންބަރުންވަނީ ވޯޓުދެއްވާފައެވެ.
މާލޭގައި ޒުވާނުންނަށް ފަސޭހަކަމާއެކު މިއުޒިކް އަޑުއަހާލައި، އެކުވެރީންނާ ބައްދަލުކޮށްލައި، ހާސްކަމުން ބޭރުގައި އުފާވެރި މާހައުލެއްގައި ހީނ ސަމާސާކޮށް މަޖާ ކޮށްލައި، އެއްވެ ތިބެވޭނޭ ފަދަ މަރުކަޒެއް ޤާއިމުކޮށްދިނުމަށް ސަރުކާރަށް ގޮވާލައި ހުށަހަޅުއްވާފައިވާ ޤަރާރު ހުށައަޅުއްވާފައިވަނީ ހެންވޭރު ހުޅަނގު ދާއިރާގެ މެންބަރު ޙަސަން ލަތީފްއެވެ.
މި ޤަރާރުގައި ހިމަނާފައިވާ ކަންކަމަށް ތާޢީދުކުރައްވާކަން ހެރިޓޭޖް މިނިސްޓަރ ޔުމްނާ މަޢުމޫނުވެސްވަނީ ހާމަަކޮށްފައެވެ.
މިއާއިއެކު ޒުވާނުންނަށް ރަޙުމަތްތެރިންނާއިއެކު އެއްވެ އުޅެވޭނެ ތަނަކާއި، މިއުޒިކް ރެކޯޑިންގް ސްޓޫޑިއޯ އާއި، ބޭންޑް ޕްރެކްޓިސް ރޫމާއި ހުނަރު ދަސްކޮށް އާލާކުރެވޭނެ ވަސީލަތްތައް ހުންނަ މަރުކަޒަކަށް މި މަރުކަޒު ވާންޖެހޭނެކަމަށް ޤަރާރުގައިވެއެވެ. ޒުވާނުންގެ ހުނަރުތައް ބޭނުންކުރެވޭނެ ފުރުސަތު ހޯދައިދިނުމަކީ ދަޢުލަތުގެ މަސްޢޫލިއްޔަތެއްކަމަށްވެސް ރައްޔިތުންގެ މަޖިލީހަށް ހުށައެޅި މި ޤަރާރުގައިވަނީ ބުނެފައެވެ.