ރާއްޖޭގެ އިގްތިޞާދު މިހާރު އޮތީ ކޯވިޑްގެ ކުރިން އިޤްތިޞާދު އޮތް ހާލަތަށް ދިއުމުގެ މަގުމަތީގައިކަމަށް ވޯލްޑް ބޭންކުން ރާއްޖެ އާއި ނޭޕާލާއި ލަންކާއަށް ކަނޑައަޅާފައިވާ ކަންޓްރީ ޑިރެކްޓަރު ފާރިސް ހަދާދު ޒާވޮސް ވިދާޅުވެއްޖެއެވެ.
ވޯލްޑް ބޭންކުގެ ކަންޓްރީ ޑައިރެކްޓަރ ފާރިސް ހަދާދު ޒާވޮސް މިހެން ވިދާޅުވީ، ދާދިފަހުން އޭނާ ރާއްޖެއަށް ކުރެއްވި ދަތުރުފުޅަކަށްފަހުއެވެ.
ވޯލްޑް ބޭންކުގެ ކަންޓްރީ ޑައިރެކްޓަރ ފާރިސް ހަދާދު ޒާވޮސް ވިދާޅުވީ، މާލީ ޙާލަތާއި ދަރަނި ބެލެހެއްޓުން މެނޭޖުކޮށްގެން، އިޤްތިޞާދީ ކުރިއެރުމާއި ތަރައްޤީ ރާއްޖެއަށް ހާޞިލްކުރެވިދާނެކަމަށެވެ. އަދި ރާއްޖޭގެ އިގްތިޞާދު މިހާރު އޮތީ ކުރީގެ ހާލަތައް ދިއުމުގެ މަގުމަތީގައިކަމަށް އޭނާ ވިދާޅުވިއެވެ. އިޤްތިޞާދު އަލުން އޮތް ހާލަތަށް ދާން ފަށާފައިވަނީ ރާއްޖެއިން އެޅި ހަރުދަނާ ފިޔަވަޅުތަކުގެ ސަބަބުންކަމަށްވެސް އޭނާ ވިދާޅުވިއެވެ.
"އެކަށޭނަ ފިޔަވަޅުތަކާއި އެ ކަންކަމަށް ތަބާވުމުގެ ނަތީޖާއެއްގެ ގޮތުން، މިދިޔަ އަހަރުގެ ފަހުކޮޅުން ފެށިގެން ރާއްޖޭގެ ފަތުރުވެރިކަމުގެ ސިނާޢަތް ވަނީ ވަރަށް ބާރަށް ކުރިއަރަން ފަށާފައި. އެއާއެކު، ރާއްޖޭގެ އިޤްތިޞާދު ވެސް މިހާރު އޮތީ ކުރީގެ ހާލަތަށް ދިއުމުގެ މަގުމަތީގައި، އިޤްތިޞާދީ ކުރިއެރުން ލަފާކުރެވޭ ގޮތުގެ މައްޗަށް ބިނާކޮށް، މާލީ ޙާލަތާއި ދަރަނި ބެލެހެއްޓުން މެނޭޖުކޮށްގެން، ކުރިއަށް ވުރެ ތިމާވެއްޓާ ރަށްޓެހި، ކުރިމަތިވެދާނެ ކާރިޡާތަކަށް ކުރިއަށް ވުރެ ބޮޑަށް ތައްޔާރުވެފައިވާ އަދި އެންމެހާ ދިވެހިންނަށް އޭގެ ފައިދާ ކުރާ އިޤްތިޞާދީ ކުރިއެރުމާއި ތަރައްޤީ ރާއްޖެ އަށް ހާޞިލްކުރެވިދާނެ." ފާރިސް ހަދާދު ޒާވޮސް ވިދާޅުވިއެވެ.
ފާރިސް ހަދާދު-ޒާވޮސް ދިވެހިރާއްޖެ އަށް ކުރެއްވި ދަތުރު ނިންމާލާފައިވަނީ އިއްޔެއެވެ. މިއީ، ކޮވިޑް-19 ގެ ސަބަބުން ކުރިމަތިވެފައިވާ ޞިއްޙީ އަދި އިޤްތިޞާދީ ކާރިޡާ އިން އަރައިގަނެ، ކުރިއަށް ވުރެ ރަނގަޅަށް އިޤްތިޞާދު ބިނާކުރުމުގައި އެހީތެރިވުމާ ގުޅޭ ގޮތުން ރާއްޖެއާއެކު ވާލްޑް ބޭންކުން ކުރިއަށްގެންދާ މަސައްކަތްތަކުގެ ދަށުން ކުރެއްވި ދަތުރުފުޅެކެވެ. ދެ ދުވަހުގެ މުއްދަތަކަށް ކުރެއްވި ދަތުރުފުޅުގައި، ވާލްޑް ބޭންކުގެ ކަންޓްރީ ޑިރެކްޓަރ ވަނީ ވާލްޑް ބޭންކުގެ އެހީގައި ހިންގޭ މުހިންމު މަޝްރޫޢުތައް ވިލަރެސްކުރައްވާ މިނިސްޓަރުންނާ ބައްދަލުކުރައްވާފައެވެ.
މި ބައްދަލުކުރެއްވުންތަކުގައި މައިގަނޑު ގޮތެއްގައި މަޝްވަރާކުރައްވާފައި ވަނީ، ދިވެހިރާއްޖޭގެ އިޤްތިޞާދީ ޙާލަތާއި ކޮވިޑް-19 ގެ ބަލިމަޑުކަމުގެ ސަބަބުން ދިވެހިރާއްޖޭގެ އިޤްތިޞާދަށް ކުރިމަތިވެފައިވާ ލޮޅުންތަކާ ގުޅޭ ގޮތުންނެވެ. ހަމަ އެއާއިއެކު، މި ކާރިޡާއިން އަރައިގަނެ، އެންމެންގެ ބައިވެރިވުން އޮންނަ އަދި ދެމެހެއްޓެނިވި ތަރައްޤީއަކަށް މަގުފަހިވާނެ ގޮތަށް ކުރިއަށްވުރެ ރަނގަޅަށް އިޤްތިޞާދު އާރާސްތުކުރުމުގައި ދިވެހިރާއްޖެއަށް އެހީތެރިވުމުގައި ވޯލްޑް ބޭންކުން ތައްޔާރަށް އޮތްކަން ވެސް ކަންޓްރީ ޑިރެކްޓަރ ވަނީ ހިއްޞާކުރައްވާފަ އެވެ.
މި މަހުގެ 15ވަނަ ދުވަހު ވޯލްޑް ބޭންކުން ވަނީ "ވޯލްޑް ބޭންކް މޯލްޑިވްސް ޑިވެލޮޕްމަންޓް އަޕްޑޭޓް: އަ ޑިޖިޓަލް ޑޯން ރިޕޯޓް" ވެސް ނެރެފައެވެ. މި ރިޕޯޓްގައި، ކޮވިޑް-19 ގެ ބަލިމަޑުކަމުގެ ސަބަބުން ދިވެހިރާއްޖޭގެ އިޤްތިޞާދަށް ކުރިމަތިވެފައިވާ ބޮޑެތި ނޭދެވޭ އަސަރުތަކުގެ މައްޗަށް އަލިއަޅުވާލާފައިވެ އެވެ. އެގޮތުން، އޭގެ ކުރީ އަހަރާ އަޅާބަލާއިރު މިދިޔަ އަހަރު ރާއްޖޭގެ އިޤްތިޞާދު ވަނީ ގާތްގަނޑަކަށް 30 އިންސައްތަ ދަށަށް ގޮސްފައެވެ.
އެހެންނަމަވެސް، ފަތުރުވެރިން ޒިޔާރަތްކުރާ މިންވަރު ބާރަށް ކުރިއަރަމުން ދިއުމާއި ފަތުރުވެރިކަމުގެ ދާއިރާގައި ކުރެވެމުން އަންނަ އިންވެސްޓްމަންޓްތަކުގެ ނަތީޖާއެއްގެ ގޮތުން، މި އަހަރު ރާއްޖޭގެ އިޤްތިޞާދު 17.1 އިންސައްތައިގައި ކުރިއަރާނެ ކަމަށް ވޯލްޑް ބޭންކުން ލަފާކުރެއެވެ. ހަމަ އެއާއެކު، ޑިޖިޓަލް ޓެކްނޮލޮޖީތައް މެދުވެރިކޮށް ރާއްޖޭގެ އިޤްތިޞާދީ ކުރިއެރުމާއި ތަރައްޤީގެ ދަތުރުގައި އިންގިލާބީ ބަދަލުތަކެއް ގެނެވިދާނެ ގޮތްތަކުގެ މައްޗަށްވެސް މި ރިޕޯޓުގައި އަލިއަޅުވާލާފައިވެއެވެ.
ޖުމްލަ 182 މިލިއަން ޑޮލަރުގެ އަގުހުރި 10 މަޝްރޫއެއް ވޯލްޑް ބޭންކުން މިވަގުތު ރާއްޖޭގައި ހިންގައެވެ. ކޯވިޑް-19 އިން ރައްކާތެރިވުމަށާއި، މި ބަލި ދެނެގަނެ، މި ބައްޔާއި ދެކޮޅަށް މަސައްކަތްކުރުމަށް ދިވެހިރާއްޖެއަށް އެހީތެރިވުމުގެ ގޮތުން 7.3 މިލިއަން ޑޮލަރުގެ އަވަސް އެހީގެ ޕެކޭޖެއް ވޯލްޑް ބޭންކުން ވަނީ މިދިޔަ އޭޕްރީލްމަހު ދިވެހިރާއްޖެއަށް ފޯރުކޮށްދީފައެވެ.