މޯލްޑިވްސް އިސްލާމިކް ބޭންކުގެ 2020 ވަނަ އަހަރުގެ ފައިދާއިން ހިއްސާއަކަށް 1.2 ރުފިޔާ ބަހަން ނިންމައިފިއެވެ.
ހިއްސާއަކަށް 1.2 ރުފިޔާ ބަހަން ފާސްކޮށްފައިވަނީ މިމަހުގެ 25 ވަނަ ދުވަހު ބޭއްވި އެމްއައިބީގެ ޑިރެކްޓަރުންގެ ބޯޑު ބައްދަލުވުމުގައެވެ.
އެމްއައިބީގެ ޑިރެކްޓަރުންގެ ބޯޑުން ނިންމާފައިވަނީ 2020 ވަނަ އަހަރު ކުންފުނީގެ ފައިދާގެ ތެރެއިން 27.5 މިލިއަން ރުފިޔާ ހިއްސާދާރުންގެ މެދުގައި ބެހުމަށެވެ. މިދިޔަ އަހަރު ކުންފުނީގެ ފައިދާ އެހެން އަހަރުތަކާއި އަޅާބަލާއިރު ވަނީ ދަށްވެފައެވެ. ސަބަބަކީ ކޯވިޑް19 އާއި ގުޅިގެން އިޤްތިޞާދަށް އައި ހީނަރުކަމުގެ ސަބަބުންނެވެ.
2019 ވަނަ އަހަރުގެ ހިއްސާގެ ފައިދާ ބަހަންވެސް އެމްއައިބީއަށް މިއަހަރު ވަނީ ހުއްދަ ލިބިފައެވެ. އެމްއައިބީން 2019 ވަނަ އަހަރުގެ ހިއްސާގެ ފައިދާ ބެހުން ލަސްކޮށްފައި ވަނީ އެމްއެމްއޭގެ ހުއްދަ ނުލިބުމުގެ ސަބަބުންނެވެ.
2019 ވަނަ އަހަރުގެ ކުންފުނީގެ ފައިދާއިން ހިއްސާއަކަށް ބެހުމަށް ފާސްކޮށްފައިވަނީ 1.58 ރުފިޔާއެވެ.
2019 ވަނަ އަހަރުގެ ފައިދާއިން ހިއްސާދާރުންނަށް ބަހަނީ 35.4 މިލިއަން ރުފިޔާކަމަށް އެމްއައިބީން ބުނެއެވެ.