ރޯދަމަހަށް ޚާއްސަކޮށްގެން އެންޒީއިން މުޅިން އައު 4 ވައްތަރެއްގެ މަސްދަޅު ބާޒާރަށް ނެރެފިއެވެ. މިއީ މި ރޯދަމަހު އެންޒީން ކުރިއަށްގެންދާ "ތިބޭފުޅުންގެ އަރިހުގައި އެންޒީ ރޯދަމަސް" ޕްރޮމޯޝަންގެ ތެރެއިން ތަޢާރަފްކުރި އުފެއްދުންތަކެކެވެ.
އެންޒީއިން އަލަށް ބާޒާރަށް ނެރެފައިވާ 4 ވައްތަރުގެ މަސްދަޅަކީ ވަޅޯމަސް ތެލުގައި، ޓޫނާ ސްޓޭކް ތެލުގައި، ކަންނެލި ބަނޑައިދޫ ތެލުގައި، ޓޫނާ ގިތެޔޮ މިރުސް ސޯސްގައި ތައްޔާރުކޮށްފައިވާ މަސްދަޅެވެ. އެންޒީން ވަނީ އެ ކުންފުނީގެ ފިހާރަތަކުގައި އާންމުންނަށް މި މަސްދަޅު ރަހަބަލާލުމުގެ ފުރުސަތުވެސް ދީފައެވެ.
އެންޒީން ބުނީ އަލަށް ތައާރަފްކުރި 4 ބާވަތުގެ މަސްދަޅު ތައާރަފްކޮށްފައިވަނީ މިހާރު ދިވެހިންގެ މެދުގައި އެންމެ ކަމުދާނެ ބާވަތްތަކަށް ވިސްނައިގެން ހުރިހައި އުމުރެއްގެ މީހުންނަށްވެސް އެންމެ ކަމުދާނެ ކަހަލަ ގޮތަކަށްކަމަށެވެ.
މި މަސްދަޅުތަކުގެ އަގުތައް އުޅެނީ 12 ރުފިޔާއާއި 16 ރުފިޔާއާއި ދެމެދުގައެވެ. އެންޒީގެ މި އައު އުފެއްދުންތައް އެންޒީގެ ހުރިހައި ފިހާރައަކުން އަދި އެންޒީ.އެމްވީ އިން ލިބެން ހުންނާނެކަމަށް އެ ކުންފުނިން ބުނެއެވެ.