އެސްޓީއޯގެ އެގްރި ސެންޓަރުން ދަނޑުވެރިންނަށް ޚާއްސަ ސްކީމްތަކެއް ތަޢާރަފްކުރުމުގެ މަސައްކަތް ކުރަމުންދާކަމަށް އެކުންފުނިން ވިދާޅުވެއްޖެއެވެ. އެގްރި ސެންޓަރު އުފެއްދުމުގެ މައިގަނޑު ސަބަބަކީ ދެމެހެއްޓެނިވި ގޮތެއްގައި ދަނޑުވެރިކަންކޮށް، އެކަމުން ދަނޑުވެރިންނަށް ލިބެންޖެހޭ ނަފާ ފުރިހަމަ ގޮތުގައި ލިއްބައިދިނުމަށްކަމަށް އެ ކުންފުނިން ވިދާޅުވިއެވެ.
އެސްޓީއޯ އެގްރި ސެންޓަރު ހުޅުވާފައިވަނީ މިމަހުގެ 13ވަނަ ދުވަހުއެވެ. މިހާތަނަށް 300އަށްވުރެ ގިނަ ދަނޑުވެރިން ވަނީ އެގްރި ސެންޓަރުގައި ރަޖިސްޓްރީކޮށްފައެވެ.
ޕީއެސްއެމް ނިއުސްގެ ރާއްޖެ މިއަދު ޕްރޮގްރާމްގައި ވާހަކަދައްކަވަމުން އެސްޓީއޯގެ އެގްރި ސެންޓަރުގެ އޮޕަރޭޝަންސް މެނޭޖަރ މުޙައްމަދު ޝަހަދު ވިދާޅުވީ، ދަނޑުވެރިންނަށް ޙާއްސަކޮށްގެން ސްކީމްތައް ތައާރަފްކުރުމުގެ މަސައްކަތް ކުރަމުން އަންނަކަމަށެވެ. މި ސްކީމްގެ ދަށުން ދަނޑުވެރިކަން ކުރުމަށް ދަނޑުވެރިޔާއަށް އެހީތެރިކަން ފޯރުކޮށްދޭނެއެވެ. އެގްރި ސެންޓަރުގެ ވިސްނުން ހުރީ ހައިޑްރޯޕޮނިކްސް ސިސްޓަމްސްތަކާއި، ގްރީން ހައުސް ސިސްޓަމްވެސް ދަނޑުވެރިޔާއަށް މި ސްކީމްގެ ދަށުން ދޫކުރުންކަމަށް ޝަހަދު ވިދާޅުވިއެވެ.
"އަޅުގަނޑުމެންގެ ވިސްނުން އެބަހުރި ދަނޑުވެރިންނަށް ޚާއްސަކޮށްގެން ސްކީމްތައް ތަޢާރަފްކުރަން. މިސްކީމްތަކުގެ ތެރެއިން އަޅުގަނޑުމެން ދަނޑުވެރިޔާއަށް އަވެއަރނެސް ޕްރޮގްރާމްތައް ހިންގުމާއި، ކޮންސަލްޓޭޝަން ދިނުމާއި، ދެމެހެއްޓެނިވި ގޮތުގައި ދަނޑުވެރިކަން ކުރާނެގޮތް އެބޭފުޅުންނަށް ފަހިކޮށްދޭނެ. އެގޮތުގެ މަތިން އަޅުގަނޑުމެންގެ ވިސްނުން އެބަހުރި މި ސްކީމް ތައާރަފްކޮށްގެން މިސާލަކަށް ހައިޑްރޯޕޮނިކްސް ސިސްޓަމްސްތައް އެސްޓީއޯ މެދުވެރިކޮށް ދަނޑުވެރިޔާއަށް ދިނުމާއި، ގްރީން ހައުސް ސިސްޓަމްވެސް ދަނޑުވެރިޔާއަށް ދިނުން. މި ސްކީމްގައި ބައިވެރިވީމަ ދަނޑުވެރިޔާ އޮޓޮމެޓިކުން މިވަނީ އެސްޓީއޯގެ ދަނޑުވެރިއަކަށް." ޝަހަދު ވިދާޅުވިއެވެ.
މާލޭގައި ހުރި އެގްރި ސެންޓަރުގެ އިތުރުން "އެސްޓީއޯ އެގްރި ސެންޓަރ ތޮއްޑޫ" ގެ ނަމުގައި ތޮއްޑޫގައިވެސް ވަނީ ފެސިލިޓީއެއް ޤާއިމްކޮށްފައެވެ. މިތަން ވަރަށް އަވަހަށް ހުޅުވާނެކަމަށް އެގްރި ސެންޓަރުން ވިދާޅުވެއެވެ. ތޮއްޑޫ ފެސިލިޓީގެ މައިގަނޑު މަސައްކަތަކަށް ވާނީ އެސަރަހައްދުގައި ދަނޑުވެރިން ހައްދާ ތަކެތި ތޮއްޑޫ ފެސިލިޓީއަށް ގެންގޮސް އެތަކެތި ރިސޯޓްތަކަށް ސަޕްލައި ކުރުމާއި ހަމައެހެންމެ މާލޭގެ މާކެޓަށް އެތަކެތި ފޮނުވުންކަމަށް އެގްރި ސެންޓަރުން ވިދާޅުވެއެވެ.
އެގްރި ސެންޓަރުގެ މަސައްކަތް ފަށާއިރު އެ ސެންޓަރުން ގަންނަނީ 17 ބާވަތެކެވެ. އޭގެތެރޭގައި ހިމެނެނީ ކަރާ، ކެޕްސިކަމް، ޓޮމާޓޯ، ކައްޓަލަ، ދަނޑިއަލުވި، ކިޔުކަންބާ، މެލަން، ލެޓިއުސް، ޗައިނީޒް ކެބެޖް، ބީންސް، ބަށި، ބަރަބޯ، ބަޓާނަ، ފަތްކެޔޮ، ގިތެޔޮމިރުސް އަދި ތޮޅިމިރުހެވެ.
ބެއްޔާ
މީ ވަކި މީހަކާ ޖައްސާލައިގެންކުރަކމެއްތަ/އެގްރޯނެޓް ކޮބާ ؟ ސަރުކާރުން މިގޮތަށް މަސައްކަތްކުރުމަކީ ބަލއިގަނެވޭނެކަމެއްނޫން. ޒަހާ ހަމަ ފެއިލްވީ. އަވަހަށް ދުރުކުރޭ މާލަސްވެއްޖެ.