އެގްރި ސެންޓަރު މެދުވެރިކޮށް ދަނޑުވެރިކަމުގެ ތަކެތި ގަތުމަށް މިހާރުވެސް 8 ރިސޯޓަކުން ޝައުޤުވެރިކަން ފާޅުކޮށްފައިވާ ކަމަށް އެ ކުންފުނިން ބުނެފިއެވެ. ދިވެހި ދަނޑުވެރިން ހައްދާ ތަކެތި ގަނެ، ދަނޑުވެރިންނަށް ހަމަ އަގު ހޯދައިދިނުމުގެ ބޭނުމުގައި އެސްޓީއޯއިން އެގްރި ސެންޓަރުގެ ނަމުގައި ސެންޓަރެއް ހުޅުވީ މިމަހުގެ 13 ވަނަ ދުވަހުއެވެ.
ޕީއެސްއެމް ނިއުސްގެ ރާއްޖެ މިއަދު ޕްރޮގްރާމްގައި ވާހަކަދައްކަވަމުން އެސްޓީއޯގެ އެގްރި ސެންޓަރުގެ އޮޕަރޭޝަންސް މެނޭޖަރ މުޙައްމަދު ޝަހަދު ވިދާޅުވީ، އާންމުގޮތެއްގައި ރާއްޖޭގެ ދަނޑުވެރިން ތަކެތި ހައްދަމުން އަންނަނީ ސީޒަނަލް އިވެންޓްތަކެއްގެ ގޮތުގައިކަމަށެވެ. އޭނާ ވިދާޅުވީ އެސްޓީއޯ އެގްރި ސެންޓަރ އުފެއްދި މައިގަނޑު ސަބަބަކީ ދެމެހެއްޓެނިވި ގޮތެއްގައި ދަނޑުވެރިކަންކޮށް، އެކަމުން ދަނޑުވެރިންނަށް ލިބެންޖެހޭ ނަފާ ފުރިހަމަ ގޮތުގައި ލިއްބައިދިނުމަށްކަމަށާއި އެގްރި ސެންޓަރުގެ މައިގަނޑު އެއް އަމާޒަކީ ރިސޯޓްތަކަށް ސަޕްލައި ކުރުންކަމަށެވެ.
"އަޅުގަނޑުމެން މިކުރާ ކަމަކީ އެބޭފުޅުންއަތުން ތަކެތިގަނެ ރާއްޖޭގެ މާކެޓްގައި ހެޔޮ އަގެއްގައި އެތަކެތި ފޯރުކޮށްދިނުން. އަދި އަޅުގަނޑުމެންގެ އެންމެ ބޮޑު އެއް އަމާޒަކީ މިކަހަލަ ހުރިހައި ބާވަތްތަކަކީ ވަރަށް ބޮޑަށް އިމްޕޯޓްސްއަށް ޑިޕެންޑްވާ ބާވަތްތަކެއް. ވީހާވެސް ބޮޑަކަށް އިމްޕޯޓްސް މަދުކޮށް ރާއްޖޭގައި ހައްދާ ތަކެތި ރާއްޖޭގައި ބޭނުންކޮށް އަދި އޭގެ އިތުރުން އަޅުގަނޑުމެންގެ މެއިން އެއް ޓާގެޓް ރިސޯޓް ސަޕްލައިއަކީ. ރިސޯޓްތަކުގައިވެސް އަޅުގަނޑުމެން ބޭނުންވަނީ ރާއްޖޭގެ ދަނޑުވެރިން ހައްދާ ތަކެތި ބޭނުންކުރަން." ޝަހަދު ވިދާޅުވިއެވެ.
ޝަހަދު ވިދާޅުވީ އެގްރި ސެންޓަރުން މިހާރު ރިސޯޓްތަކާއިއެކު މަޝްވަރާކުރަމުން އަންނަކަމަށެވެ. އެގޮތުން ދ. އަތޮޅުގެ 8 ރިސޯޓަކުންވެސް މިހާރު އެގްރި ސެންޓަރ މެދުވެރިކޮށް ތަކެތި ގަތުމުގެ ޝައުޤުވެރިކަން ފާޅުކޮށްފައިވާ ކަމަށް އޭނާ ވިދާޅުވިއެވެ.
"އަޅުގަނޑުމެން މިދަނީ ރިސޯޓްތަކާއިވެސް ވާހަކަދައްކަމުން. އެގޮތުން ދ. އަތޮޅުން ގާތްގަނޑަކަށް 8 ވަރަކަށް ރިސޯޓް އަޅުގަނޑުމެންނަށް ވަރަށް ފެހި ސިގްނަލްއެއް ދެއްވާފައި އިނީ. އެބޭފުޅުންނަށް ހަމަ ދާއިމީކޮށް އެތަކެތި ލިބޭނެކަމުގެ ޔަޤީންކަން އޮންނަކަމަށްވަނީވިއްޔާ އަޅުގަނޑުމެންނާއިއެކު މަސައްކަތްކުރަން ތައްޔާރަށް ތިބީ. އެންމެ ފުރަތަމަ އެޕްރޯޗް މި ކުރީވެސް ދ. އަތޮޅަށް. އަޅުގަނޑުމެން ހުރިހައި ރިސޯޓްތަކަށްވެސް އެފްރޯޗްކުރާނަން." ޝަހަދު ވިދާޅުވިއެވެ.
މާލޭގައި ހުރި އެގްރި ސެންޓަރުގެ އިތުރުން "އެސްޓީއޯ އެގްރި ސެންޓަރ ތޮއްޑޫ" ގެ ނަމުގައި ތޮއްޑޫގައިވެސް ވަނީ ފެސިލިޓީއެއް ޤާއިމްކޮށްފައެވެ. މިތަން ވަރަށް އަވަހަށް ހުޅުވާނެކަމަށް އެގްރި ސެންޓަރުން ބުނެއެވެ. ތޮއްޑޫ ފެސިލިޓީގެ މައިގަނޑު މަސައްކަތަކަށް ވާނީ އެ ސަރަހައްދުގައި ދަނޑުވެރިން ހައްދާ ތަކެތި ތޮއްޑޫ ފެސިލިޓީއަށް ގެންގޮސް އެތަކެތި ރިސޯޓްތަކަށް ސަޕްލައި ކުރުމާއި ހަމައެހެންމެ މާލޭގެ މާކެޓަށް އެތަކެތި ފޮނުވުންކަމަށް އެގްރި ސެންޓަރުން ބުނެއެވެ.
އެގްރި ސެންޓަރުގެ މަސައްކަތް ފަށާއިރު އެ ސެންޓަރުން ގަންނަނީ 17 ބާވަތެކެވެ. އޭގެތެރޭގައި ހިމެނެނީ ކަރާ، ކެޕްސިކަމް، ޓޮމާޓޯ، ކައްޓަލަ، ދަނޑިއަލުވި، ކިޔުކަންބާ، މެލަން، ލެޓިއުސް، ޗައިނީޒް ކެބެޖް، ބީންސް، ބަށި، ބަރަބޯ، ބަޓާނަ، ފަތްކެޔޮ، ގިތެޔޮމިރުސް އަދި ތޮޅިމިރުހެވެ.