މޯލްޑިވިއަންއިން، ބަންގްލަދޭޝްގެ ޑާކާއަށް ކުރަމުންއައި ދަތުރުތައް ވަގުތީގޮތުން މެދުކަނޑާލައިފިއެވެ.
ބަންގްލަދޭޝްގައި ކޯވިޑް-19 ފެތުރުން އިތުރުވުމާއެކު އެޤައުމަށް ބައިނަލްއަޤްވާމީ ފްލައިޓްތައް އެތެރެވުމާއި ބޭރުވުން އެ ޤައުމުގެ ސަރުކާރުން ވަނީ މަނާކޮށްފައެވެ. މޯލްޑިވިއަންއިން ވިދާޅުވީ ބަންގްލަދޭޝް ސަރުކާރުގެ މިނިންމުމުގެ ސަބަބުން ބަންގްލަދޭޝްގެ ޑާކާއަށް މޯލްޑިވިއަނުން ކުރުމަށް ހަމަޖެހިފައިވާ ހުރިހައި ދަތުރުތަކެއް މިމަހުގެ 28ގެ ނިޔަލަށް ކެންސަލްކޮށްފައިވާކަމަށެވެ.
ކޯވިޑް-19އަށްފަހު މޯލްޑިވިއަންއިން ކުރަމުންއައި ބައިނަލްއަޤްވާމީ ދަތުރުތައް އެންމެ ފުރަތަމަ ފެށި އެއް މަންޒިލްގެ ތެރޭގައި ބަނގްލަދޭޝްގެ ޑާކާ ހިމެނެއެވެ. މޯލްޑިވިއަންއިން ޑާކާއަށް އަލުން ދަތުރުތައް ފެށީ މިދިޔަ އަހަރުގެ އޮގަސްޓް މަހުގެ ތެރޭގައެވެ. ފަހުންވަނީ ޑާކާއަށް ކުރާ ދަތުރުތައް ހަފްތާއަކު 4 ދަތުރަށް އިތުރުވެސް ކޮށްފައެވެ.
ބަންގްލަދޭޝްގައި މިހާތަނަށް ޖުމަލް 732،000 އަށްވުރެ ގިނަ މީހުންނަށް ކޯވިޑް-19 ވަނީ ޖެހިފައެވެ. އަދި މި ބަލީގައި 10،000އަށްވުރެ ގިނަ މީހުން އެޤައުމުން ވަނީ މަރުވެފައެވެ.