ރޯދަމަހު އެސްޓީއޯއިން ވިއްކާ ފިޔާ، ބިސް އަދި އަލުވި ހެޔޮ އަގެއްގައި ލިބެން ހުންނާނެކަމަށް އެ ކުންފުނިން ބުނެފިއެވެ.
މާރޗް މަހުގެ 30 ވަނަ ދުވަހުން ފެށިގެން އެސްޓީއޯއިން ވަނީ ރަމަޟާންމަހަށް ޙާއްސަ އަގުތަކެއްގައި ފިޔާ، ބިސް އަދި އަލުވި ވިއްކަން ފަށާފައެވެ.
ޕީއެސްއެމް ނިއުސްއަށް މައުލޫމާތުދެއްވަމުން އެސްޓީއޯއިން ވިދާޅުވީ، އެންމެ ފުރަތަމަ ރަމަޟާންމަހަށް ޙާއްސަކޮށްގެން އަގު ހެޔޮކޮށްގެން ވިއްކަން ފެށި ސްޓޮކް މިހާރު ހުސްވެފައިވާކަމަށެވެ. ނަމަވެސް ފިޔާ ބިސް އަދި އަލުވީގެ އައު ސްޓޮކެއް މިހާރު ލިބިފައިވާކަމަށާއި މިހާރު އައު ސްޓޮކް އެސްޓީއޯ ސްޕަރމާޓުން ވިއްކަން ފަށާފައިވާކަމަށެވެ.
ރަމާޟާންމަހުގެ ޚާއްސަ އަގުތަކުގެ ތެރެއިން އެސްޓީއޯގެ ފިހާރަތަކުން ރީޓެއިލްކޮށް ފިޔާ ކިލޯއެއް މިހާރު ވިއްކަނީ 9.50 ރުފިޔާއަށެވެ. އަދި އަލުވި ކިލޯއެއް 9 ރުފިޔާއަށް، އަދި ބިހެއް 1.40 ރުފިޔާއަށް އަންނަނީ މިހާރު ވިއްކަމުންނެވެ.
އެސްޓީއޯ ސުޕަމާރޓް ހޯލްސޭލް ސެންޓަރުން ފިޔާ ބަސްތާއެއް މިއަހަރު ވިއްކަނީ 200 ރުފިޔާއަށެވެ. އަލުވި ބަސްތާއެއް 185 ރުފިޔާއަށް ވިއްކާއިރު ބިސް ކޭހެއް 265 ރުފިޔާއަށް ލިބެން ހުންނާނެކަމަށް އެސްޓީއޯއިން މަޢުލޫމާތުދެއެވެ.
އެސްޓީއޯއިން ވިއްކާ ފިޔާ، އަލުވި އަދި ބިސް ގަތުމުގެ ކުރިން މިތަކެތި ޗެކުކުރެވޭނެ އިންތިޒާމުވެސް ވަނީ ހަމަޖައްސާފައެވެ. އެގޮތުން އެސްޓީއޯ ޓްރޭޑް ސެންޓަރުގައި ހުންނަ އެސްޓީއޯ ސުޕަމާޓުން ރީޓެއިލްކޮށް މިތަކެތި ލިބޭނެ އިންތިޒާމް ހަމަޖައްސާފައިވާއިރު، އެސްޓީއޯ ސުޕަމާޓް ހޯލްސޭލް ސެންޓަރުން ހޯލްސޭލްކޮށްވެސް މިތަކެތި ވިއްކާނެކަމަށް އެސްޓީއޯއިން މަޢުލޫމާތުދެއެވެ.
އެސްޓީއޯއިން ބުނީ ހޯލްސޭލްކޮށް ގަންނަ ފަރާތްތަކަށް ފިޔާ ބިސް އަލުވި ވިއްކަމުންދަނީ ހެޔޮ އަގުގައިކަމަށެވެ. މީގެ ސަބަބުން އަތޮޅުތަކަށް މިތަކެތި ގެންދިއުމަށްފަހު މާލެއެކޭ އެއްއަގެއްގައި ވިއްކޭނެކަމަށެވެ. އައްޑޫއާއި ތިނަދޫއަށް މިތަކެތި ގެންދަނީ ސީދާ އިންޑިއާގެ ޓުޓިކޮރިންއިން އަންނަ ކާގޯ ބޯޓުތަކުގައެވެ. މީގެސަބަބުން އެ ސަރަހައްދުގެ ރަށްރަށުންވެސް ފިޔާ ބިސް އަދި އަލުވީގެ އަގު ހެޔޮވެގެންދާނެކަމަށް އެސްޓީއޯއިން ބުނެއެވެ.