ވިޔަފާރިކުރުމުގައި މަކަރު ހެދުމާއި މުދަލުގެ އަގުބޮޑުކޮށްގެން ނުވިއްކުމަށް މިއަދުގެ ހުކުރު ޚުޠުބާގައި ގޮވާލައްވައިފިއެވެ. މިއީ މިއަދުގެ މުޖްތަމައުގައި ފެންނަމުންދާ ކަންބޮޑުވާންޖެހޭ ބޮޑު މައްސަލައެއްކަން ފާހަގަކުރައްވައި މިއީ އިސްލާމް ދީނުގައި ބޮޑުވެގެންވާ ފާފާއެއްކަން ޚުޠުބާގައި ވަނީ ހަނދާންކޮށްދެއްވާފައެވެ.
މަކަރާއި ޙީލަތް ހަދައިގެން މީސްތަކުންނަށް އޮޅުވާލައިގެން ވިޔަފާރިކުރުމަކީ އޭގެސަބަބުން ވިޔަފާރިވެރިންގެ މައްޗަށް މީސްތަކުންގެ ހިތްތަކުގައި އޮންނަ އިތުބާރު ކުޑަވެގެންދާނެކަމެއްކަން ޚުތުބާގައިވަނީ ފާހަގަކުރައްވާފައެވެ. ކޮންމެ މީހަކުވެސް ބުރަ މަސައްކަތްކޮށްގެން ހޯދާ ފައިސާއިން ދިރިއުޅުމަށް ބޭނުންވާ ތަކެތި ގަންނަނީ އެތަކެއްޗަކީ ފެންވަރު ރަނގަޅު ތަކެތިކަމަށް ހީކޮށްގެންކަމަށާ، ނަމަވެސް އެތަކެތި ބޭނުންކުރަން ބަލާއިރު އެއީ ބޭނުންކުރެވޭ ވަރަށްވުރެ ފެންވަރުދަށް ނުވަތަ ގެއްލުންހުރި ތަކެއްޗަށްވުމުން އޭގެ ބޭނުން ނުކުރެވި އެކަމަށް ޚަރަދުކުރި ފައިސާ ބޭކާރުވެގެން ދިއުމުގެ އިތުރަށް ބައެއް ފަހަރު އެއިން ޞިއްޙީ ގެއްލުންވެސް ކުރިމަތިލާންޖެހޭ ޙާލަތު އަންނަކަން ޚުޠުބާގައި ވަނީ ފާހަގަކުރައްވާފައެވެ.
ޚުޠުބާގައި ހަނދާންކޮށްދެއްވާފައި ވާގޮތުގައި އިސްލާމްދީނުގައި ރިބާގެ ދޮރުތައް ބަންދުކޮށް ވިޔަފާރީގެ ދޮރުތައް ހުޅުވައިދެއްވާފައިވަނީ ޙަލާލުގޮތުގައި ވިޔަފާރިކޮށްގެން އާމްދަނީ ހޯދުމަށެވެ. އަދި ވިޔަފާރީގެ ނަމުގައި މަކަރާއި ހީލަތް ހަދައިގެން އޮޅުވާލުން ޙަރާމް ކުރައްވާފައިވާކަން ވަނީ ވިޔަފާރިވެރިންނަށް ހަނދާންކޮށްދެއްވާފައެވެ. މީގެއިތުރުން މުޅި ދުނިޔެއަށް ކުރިމަތިވެފައިވާ ބަލިމަޑުކަމެއްގައި ދަތިޙާލުގައި މީސްތަކުން އުޅޭއިރު، އެހީތެރިކަން ފޯރުކޮށްދޭން ޖެހޭ ވަގުތެއްގައި، ތަކެތީގެ އަގު ބޮޑުކުރުމަކީ ނިކަމެތީން އިތުރަށް ނިކަމެތިވެގެން ދާނެ ކަމެއްކަން ޚުޠުބާގައި ވަނީ ފާހަގަކުރައްވާފައެވެ.
"މީސްތަކުންނަށް ތަކެތި ގަތުމަށް ކޮންމެހެން ބޭނުންވާ ޙާލަތްތަކުގައި، މުދަލުގެ އަގު ބޮޑުކޮށްގެން ވިއްކުމަކީ، ވިޔަފާރި ހުއްދަ ކުރެވުނު ޝަރުޢީ މަޞްލަޙަތާ ފުށުއަރާ ކަމެކެވެ. މުޅި ދުނިޔެއަށް ކުރިމަތިވެފައިވާ ބަލިމަޑުކަމެއްގައި ދަތިޙާލުގައި މީސްތަކުން އުޅޭއިރު، އެހީތެރިކަން ފޯރުކޮށްދޭން ޖެހޭ ވަގުތެއްގައި، ތަކެތީގެ އަގު ބޮޑުކުރުމަކީ ނިކަމެތީން އިތުރަށް ނިކަމެތިވެގެން ދާނެ ކަމެކެވެ. ވިޔަފާރި މުދަލުގެ އަގު ކަނޑައެޅުމުގައި، ވިއްކާމީހާއަށް މިނިވަންކަން ލިބިގެންވުމާއި، ވިއްކާ މުދަލުގެ ފައިދާލާނެ ވަކި މިންވަރެއް ކަނޑައެޅިފައެއް ނުވެ އެވެ. ނަމަވެސް އިސްލާމް ދީނުގެ ސަމާޙަތްތެރިކަމާއި ލުއިދިނުން ފަދަ ޝަރްޢީ އަދަބުތަކަށް ރިޢާޔަތް ކުރުމަކީ، ލާޒިމު ކަމެކެވެ. މީސްތަކުންގެ މަޞްލަޙަތު އިސްކުރުމަކީ ވިޔަފާރީގައި ﷲ ބަރަކާތް ލައްވާނޭ ކަމެއް. މުދާ ޠާހިރު ކުރައްވައި އިތުރު ކުރައްވާނެ ކަމެކެވެ." މިއަދުގެ ހުކުރު ޚުޠުބާގައި ވަނީ ވިދާޅުވެފައެވެ.
އިޙްތިކާރު ކޮށްގެން ފައިދާ ހޯދުމަކީ އިސްލާމް ދީނުގައި ހުއްދަ ވެގެންވާ ކަމެއްނޫންކަން ހުރުބާގައި ވަނީ ބުނެފައެވެ. އިޙްތިކާރު ކުރުމަކީ މީސްތަކުންނަށް ބޭނުންޖެހިފައިވާ މުދަލެއް ބާޒާރަށް ނުނެރެ ހިފެހެއްޓުމަށްފަހު އެމުދަލެއްގެ އަގު ބޮޑުވުމުން ބާޒާރަށްނެރެ ބޮޑު އަގުގައި ވިއްކުމެވެ. ވަކިން ޚާއްސަކޮށް ކޮއްތުގެ ގޮތުގައި މީސްތަކުން ބޭނުންކުރާ ބާވަތްތައް އިޙްތިކާރު ކުރުމުގެ ފާފަ ވަކިން ބޮޑުކަން ޚުތުބާގައި ވަނީ ބަޔާންކުރައްވާފައެވެ.