ވިސާ ކާޑު މެދުވެރިކޮށް ރާއްޖޭގައި ހިންގާ ޓްރާންސެކްޝަންތައް ދިވެހި ރުފިޔާއިން ސެޓްލް ކުރަން ފަށަން މަރުކަޒީ ބޭންކް އެންއެމްއޭއިން މިހާރު ވަނީ ނިންމާފައެވެ. މިބަދަލަށް އަމަލު ކުރަން ފަށާނީ އަންނަމަހުގެ 15 ވަނަ ދުވަހުން ފެށިގެންނެވެ. މިއީ ކީއްވެގެން ގެނައި ބަދަލެއް ކަމާއިމެދު ގިނަ ބަޔަކު ސުވާލުކުރިނަމަވެސް، މި ބަދަލުގެ ސަބަބުން ރާއްޖޭގެ އިޤްތިޞާދަށް ހަޤީޤަތުގައި ބޮޑެތި ފައިދާތަކެއް ކުރާނެއެވެ.
ކޯވިޑް19އާ ގުޅިގެން ރާއްޖޭގެ އިޤްތިޞާދަށް ދިމާވި އެންމެ ބޮޑު އެއް މައްސަލައަކީ ރާއްޖެއަށް ޑޮލަރު ލިބޭ އެންމެ ބޮޑު ސިނާއަތްކަމަށްވާ ފަތުރުވެރިކަން ހުއްޓި ރާއްޖެއަށް ލިބޭ ޑޮލަރުގެ މަގު ބަންދުވިއެވެ. މިއާއެކު ރާއްޖޭގައި ޑޮލަރު ހިފެހެއްޓުމަށް ގިނަ މަސައްކަތްތަކެއް އެމްއެމްއޭއިން ފެށިއެވެ.
ޑޮލަރުގެ ތާށިކަން ހައްލުކޮށް، ރާއްޖޭގައި ޑޮލަރު ހިފެހެއްޓުމަށް އަންނަ މަހުގެ 15 ވަނަ ދުވަހުން ފެށިގެން ވިސާ ކާޑު މެދުވެރިކޮށް ރާއްޖޭގައި ހިންގާ ޓްރާންސެކްޝަންތައް ދިވެހި ރުފިޔާއިން ސެޓްލް ކުރަން ފަށަން އެމްއެމްއޭއިން ނިންމި ނިންމުމުގެ މައިގަނޑު ބޭނުމަކީ ރާއްޖޭގައި ހިންގާ ބޭންކަކުން އިޝޫކޮށްފައިވާ ކާޑަކުން ރާއްޖޭގައި ހަދާ ޓްރާންސެކްޝަންތައް ދިވެހި ރުފިޔާއިން ހެދުމަށް ބާރުއެޅުމެވެ.
މިސާލަކަށް ގެސްޓުންނަށް ހިދުމަތްދޭ ފިހާރަތައް، ނުވަތަ ރާއްޖޭގައި ހުންނަ ޕިއްޒާ ހަޓާއި ކޭއެފްސީފަދަ ފްރެންޗައިޒް އައްޓްލެޓްތަކުން ވިޔަފާރިކޮށްފައި ކާޑުން ފައިސާ ދައްކާއިރު، އެތަންތަނުގައި ހުންނަ ޕީއޯއެސް މެޝިންތަކުން ފައިސާ ކަނޑަނީ ޑޮލަރުންނެވެ. މީގެ ސަބަބުން ރާއްޖޭގެ ބެންކުތަކުން އެ ޑޮލަރު ފޯރުކޮށްދޭންޖެހެއެވެ.
އެހެންކަމުން އެމްއެމްއޭއިން ގެނައި ބަދަލުގެ ސަބަބުން ޚިދުމަތް ފޯރުކޮށްދޭ ފަރާތްތަކުގެ މެދުގައި ޓްރާންސެކްޝަންތަކުގެ ސެޓްލްމަންޓް ހެދުމަށް ޑޮލަރަށް ބަރޯސާވާ މިންވަރު ކުޑަކޮށް، ކާޑުގެ ޚިދުމަތްތައް އިތުރަށް ފުޅާކުރުމަށް މަގުފަހިވެގެންދާނެކަމަށް އެމްއެމްއޭއިން ބުނެއެވެ.
މިދިޔަ އަހަރު ތެރޭގައި ވިސާއިން ވަނީ ދިވެހިރާއްޖޭގައި "ނެޝަނަލް ނެޓް ސެޓްލްމަންޓް ސަރވިސް" ތަޢާރަފު ކޮށްފައެވެ. "ނެޝަނަލް ނެޓް ސެޓްލްމަންޓް ސަރވިސް'ގެ ޚިދުމަތް ތައާރަފް ކުރުމުން ރާއްޖޭގައި ހިންގާ ވިސާ ކާޑުގެ ޓްރާންސެކްޝަންތަކުގެ ސެޓްލްމަންޓް ދިވެހި ރުފިޔާއިން ހެދޭނެ އިންތިޒާމް ވަނީ ހަމަޖެހިފައެވެ.
އެމްއެމްއޭއިން ވިދާޅުވީ ވިސާގެ "ނެޝަނަލް ނެޓް ސެޓްލްމަންޓް ސަރވިސް" ތަޢާރަފު ކުރުމުގެ ކުރިން ވިސާ ކާޑު ބޭނުންކޮށްގެން ރާއްޖޭގައި ހިންގާ ޓްރާންސެކްޝަންތައް، އެއީ ދިވެހި ރުފިޔާއިން ހިންގި ޓްރާންސެކްޝަނެއް ކަމުގައި ވީނަމަވެސް، އެ ޓްރާންސެކްޝަންތަކަށް ޚިދުމަތް ދިނުމުގައި ހަރަކާތްތެރިވާ ފަރާތްތަކުގެ މެދުގައި ސެޓްލްމަންޓް ހެދޭނެ ގޮތް ހަމަޖެހިފައިވަނީ އެމެރިކާ ޑޮލަރުންނެވެ.
ނޭޝަނަލް ސެޓް ސެޓްލްމަންޓް ސަރވިސް އަދި ރާއްޖޭގައި ތަޢާރަފްކޮށްފައިވަނީ ވިސާއިންކަމުން މި ނިންމުން މިވަގުތު ހިނގާނީ ހަމައެކަނި ރާއްޖޭގައި ހިންގާ ބޭންކަކުން އިޝޫކޮށްފައިވާ ވިސާ ކާޑެއް ބޭނުންކޮށްގެން ރާއްޖޭގައި ހަދާ ޓްރާންޝެކްޝަންތަކަށް އެކަންޏެވެ. އާންމު ފަރުދުންގެ ޑޮލަރު އެކައުންޓްތަކަށް އަދި އެކައުންޓްތަކުގައި ރައްކާކޮށްފައިވާ ޑޮލަރުތަކަށް މި ނިންމުމާއި ގުޅިގެން އެއްވެސް ބަދަލެއް ނާންނާނެކަމަށް އެމްއެމްއޭއިން ބުނެއެވެ. މީގެއިތުރުން ރާއްޖޭގެ ރިސޯޓްތަކާއި ގެސްޓްހައުސް ފަދަ ތަންތަނަށް ފައިސާ ދެއްކުމަށް ބޭނުންކުރަނީ ރާއްޖޭގައި ހިންގާ ބޭންކަކުން އިޝޫކޮށްފައިވާ ވިސާ ކާޑެއް ކަމުގައިވާނަމަ ދެން އެފައިސާވެސް ބަލައިގަންނަން ޖެހޭނީ ދިވެހި ރުފިޔާއިންނެވެ.
ރާއްޖޭގައި ހިންގާ ބޭންކަކުން އިޝޫކޮށްފައިވާ ވިސާ ކާޑުތައް މެދުވެރިކޮށް ރާއްޖޭގައި ހިންގާ އެންމެހާ ކާޑު ޕޭމަންޓްތައް ބަލައިގަތުމުގައި ދިވެހި ރުފިޔާ ބޭނުން ކުރުމަށް ދިވެހިރާއްޖޭގައި ހިންގާ ހުރިހާ ބޭންކުތަކާއި ކާޑު ޕޭމަންޓް އެކުއަޔަރކުރާ ފަރާތްތަކަށް އެމްއެމްއޭއިން މިހާރު ވަނީ އަންގަވާފައެވެ.
އެމްއެމްއޭއިން ގެނައި މި ބަދަލާއިއެކު ކާޑު ޓްރާންސެކްޝަންތައް ސެޓްލް ކުރުމަށް ބޭންކް ތަކުން ޔޫ.އެސް ޑޮލަރަށް ބަރޯސާވާންޖެހޭ މިންވަރުވެސް ކުޑަ ވެގެންދާނެއެވެ. އަދި ރާއްޖޭގައި ޑޮލަރު ހިފެހެއްޓުމަށް އެހީތެރިވެދޭނެއެވެ.