ސްޓޭޓް ބޭންކް އޮފް އިންޑިއާގައި ހުޅުވާފައި ހުރި އެއްވެސް މުއާމަލާތެއް ނުކުރާތާ ގިނަ ދުވަސްވެފައިވާ 200 އަށްވުރެ ގިނަ އެކައުންޓް އުވާލަން އެ ބޭންކުން އިޢުލާންކޮށްފިއެވެ.
ދިވެހިރާއްޖޭގެ ބޭންކިންގއާއިބެހޭ ޤާނޫނު ބުނާގޮތުން އެކައުންޓަކުން އެއްވެސް މުއާމަލާތެއް ނުކުރާތާ ނުވަތަ ބޭންކަށް ލިޔުމަކުން އެއްވެސް އެއްޗެއް އަންގާފައިނުވާތާ 5 އަހަރުދުވަސް ވެފައިވާ އެކައުންޓަކީ ޑޯމަންޓް އެކައުންޓެއްގެ ގޮތުގައި ބަލާ އެކައުންޓްތަކެވެ.
އެބްސީއައިއިން ބުނީ އެ ބޭންކުގައި އެއްވެސް މުއާމަލާތެއް ނުކުރާތާ 5 އަހަރަށްވުރެ ގިނަ ދުވަސްވެފައިވާ 253 އެކައުންޓް އެބަހުރި ކަމަށެވެ. އެސްބީއައިއިން ވަނީ އެ ބޭންކުގައި ހުރި ޑޯމަންޓް އެކައުންޓްތަކުގެ ވެރިފަރާތާއި އެމީހުންގެ އެޑްރެސް ޤެޒެޓްގައި އާންމުކޮށްފައެވެ. އަދި ޑޯމަންޓް އެކައުންޓްގެ ތަފްސީލް އެ ކަސްޓަމަރަކު އެ ބޭންކަށް ދީފައިވާ އެޑްރެހަށް ވަކިން އަންގަމުންދާކަމަށްވެސް ބޭންކުން ބުނެއެވެ.
އެސްބީއައިއިން ބުނީ މުޢާމަލާތް ނުކުރާތާ ގިނަ ދުވަސްވެފައިވާ އެކައުންޓްތަކުގެ ވެރިފަރާތުން 1 ޖޫންގެ ކުރިން އެކައުންޓާއި ގުޅޭގޮތުން ގޮތެއް ނުނިންމައިފިނަމަ އެފަދަ އެކައުންޓްތައް ބަންދުކޮށް ބޭންކިންގ ޤާނޫނުގެ 35 ވަނަ މާއްދާގައި ބަޔާންކޮށްފައިވާ ގޮތުގެ މަތިން އެކައުންޓްތަކުގައި ހުރި ފައިސާ އެމްއެމްއެމްއާއި ހަވާލުކުރާނެކަމަށެވެ.
އެސްބީއައިއިން ވަނީ ޑޯމަންޓް އެކައުންޓެއް އެ ބޭންކުގައި އޮތްނަމަ ނުވަތަ އޮތްކަމަށް ޤަބޫލުކުރެވޭނަމަ އެކަން ބޭންކަށް އެންގުމަށް އެދިފައެވެ.