ރާއްޖޭގެ މުޅި އިޤްތިޞާދު ބިނާވެފައިވަނީ ފަތުރުވެރިކަމުގެ މައްޗަށެވެ. ނަމަވެސް އިޤްތިޟާދު އެއް ސިނާއަތަކަށް ބަރޯސާވެފައި އޮތުމަކީ އެންމެ އެކަށީގެންވާ ގޮތްނޫންކަމަށް އިޤްތިޞާދީ މާހިރުން ދެކެވަޑައިގަންނަވައެވެ. ޙާއްސަކޮށް ކޯވިޑް19 އާއިއެކު މުޅި ފަތުރުވެރިކަމުގެ ސިނާއަތް އިނދަޖެހުމުގެ ސަބަބުން މިކަމުގެ މުހިންމުކަން ވަރަށް ބޮޑަށް އިހްސާސްކުރެވިގެންދިޔައެވެ. އެހެންކަމުން ޙާއްސަ އިސްކަމެއް ދެއްވައިގެން މި ސަރުކާރުން އަންނަނީ ރާއްޖޭގެ އިޤްތިޟާދު އެއް ސިނާއަތަކަށް ބަރޯސާވެފައި އޮންނަ އޮތުން ނިމުމަކަށްގެނެސް އިޤްތިޟާދުގައި އެހެން ސިނާއަތް ހިއްސާކުރާ މިންވަރު އިތުރުކުރުމަށް މަސައްކަތްކުރަމުންނެވެ.
އިޤްތިޞާދު ސިންދަފާތުކުރުމަށް ކުރާ މަސައްކަތުގެ ދަށުން ސަރުކާރުން ކުރަމުންދާ އެންމެ މުހިއްމު މަސައްކަތަކީ ދަނޑުވެރިކަމަށް ޙާއްސަ ކުންފުންޏެއް އުފެއްދެވުމެވެ.
އެގްރޯ ނޭޝަނަލް ކޯޕަރޭޝަންގެ ނަމުގައި އުފެއްދި މި ކުންފުނީގެ މަސައްކަތް ފަށައިގަނެފައިވަނީ ކޯވިޑް19ގެ އެންމެ އުނދަގޫ ދަނޑިވަޅުގައެވެ. މީގެ ސަބަބުން އެ ކުންފުންޏަށް ގޮންޖެހުންތަކަކާއިވެސް ކުރިމަތިލާން ޖެހުނެވެ. ނަމަވެސް މި ގޮންޖެހުންތަކާއިއެކުވެސް އެ ކުންފުނީގެ މަސައްކަތްތައް ދިޔައީ ކާމިޔާބު ކަމާއެކު ކުރިއަށެވެ.
ދަނޑުވެރިކަމުގެ ސިނާއަތުގައި މަސައްކަތްކުރާ ފަރާތްތަކުގެ އަބަދުވެސް އެންމެ ބޮޑު ޝަކުވާއަކީ އެމީހުން އުފައްދާ އުފެއްދުންތައް މާކެޓް ނުކުރެވި އެ އުފެއްދުންތަކަށް ހަމަ އަގު ލިބިގެން ނުދިއުމެވެ. ނަމަވެސް އެގްރޯ ނެޓުން ވަނީ ދަނޑުވެރިންނަށް މިކަމުގެ ޔަޤީންކަންދީ ދަނޑުވެރިންގެ އަތުގައި ހިފައިގެން ކުރިއަށްގޮސްފައެވެ.
އެގްރޯ ނެޓުން ވަނީ ދަނޑުވެރިންނާއެކު އެއްބަސްވުންތައް ހަދައި "ކޮންޓްރެކްޓް ފާމިންގ"ގެ މަސައްކަތް މިދިޔަ އަހަރުގެ ތެރޭގައި ފަށާފައެވެ. ކޮންޓްރެކްޓް ފާމިންގ މަޝްރޫއުގެ ފޮނި މީރުކަންވެސް މިއަދު މިވަނީ ފެންނަން ފަށާފައެވެ.
ޕީއެސްއެމް ނިއުސްއަށް މައުލޫމާތުދެއްވަމުން އެގްރޯ ނޭޝަނަލް ކޯޕަރޭޝަންގެ ހެޑް އޮފް މާކެޓިންގ އަޙްމަދު ޒަކީ ވިދާޅުވީ، ކޮންޓްރެކްޓް ފާމިންގ މަޝްރޫއުގައި ދަނޑުވެރިން ހެއްދި މޭވާ ފުރަތަމަ ފަހަރަށް މިހާރު ކަނޑާފައިވާކަމަށެވެ. މި މަޝްރޫއުގެ ދަށުން އެންމެ ފުރަތަމަ ކަނޑާފައިވަނީ 185 ކިލޯގެ ރޮކް މެލަންއެވެ. މި ތަކެތި ހޯލްސޭލްކޮށް ވިއްކުމުގެ މަސައްކަތް މިހާރު ކުރަމުންއަންނަކަމަށް ޒަކީ ވިދާޅުވިއެވެ.
"އެގްރޯ ނޭޝަނަލް ކޯޕަރޭޝަނާއި ގުޅިގެން ދަނޑުވެރިކަން ކުރާ ފަރާތްތަކުގެ ތެރެއިން އެގްނޯ ނޭޝަނަލް ކޯޕަރޭޝަންގެ ފުރަތަމަ ހާވެސްޓް މިއީ. ފުރަތަމަ ހާވެސްޓްގައި ލ. އަތޮޅުން އަޅުގަނޑުމެންނާއި ގުޅިގެން ހިންގާ މެލަން ފާމުން އިއްޔެގައި އެކެނޑީ އަލަތު ހާވެސްޓެއްގެ ގޮތުގައި 185 ކިލޯ ރޮކް މެލަން. މިއަންނަ ހަފްތާގައި އަނެއްކާ އެބަކަނޑާ 250 އެއްހައި ކިލޯގެ މެލަން. މިއީ އެގްރޯނެޓަށް ވަރަށް ތާރީހީ ދުވަހެއް. ރަމަޟާންމަހަށް ބާޒާރަށް ބައެއް ބާވަތްތައް ނެރެވޭނެކަމަށް ބަލައިގެން އަޅުގަނޑުމެން މަސައްކަތްކުރީ. އެހެންނަމަވެސް ޝެޑިއުލް އެއަށްވުރެ އަވަސްވީ." އަޙްމަދު ޒަކީ ވިދާޅުވިއެވެ.
އެންމެ ފުރަތަމަ ކަނޑާފައިވާ 185 ކިލޯގެ ރޮކް މެލަންއަކީ އެންމެ ދަނޑުވެރިއަކު ހައްދާފައިވާ ތަކެއްޗެވެ. ލ. އަތޮޅުގެ އިތުރުން އެހެން ބައެއް ރަށްރަށުގައިވެސް ކޮންޓްރެކްޓް ފާމިންގގެ މަސައްކަތް ފަށައިގެން މިހާރު ދަނީ ކުރިއަށެވެ. އެގޮތުން 90 އަށްވުރެ ގިނަ ދަނޑުވެރިން މިހާރު މި މަސައްކަތް ދަނީ ކުރަމުންންނެވެ.
އެގްރޯނެޓް އާއި ގުޅިގެން ހޯލްސޭލްކޮށް ތަކެތި ގަންނަން ބޭނުންވާ ވިޔަފާރިވެރިންނަށް މިހާރު ވަނީ އެ ފުރުސަތު ހުޅުވާލާފައެވެ. ތަކެތި ގަންނަން ބޭނުންވާ ވިޔަފާރިވެރިން ކަސްޓަމަރ ރެޖިސްޓްރޭޝަން ފޯމު ފުރަންޖެހެއެވެ. މި ފޯމު ފުރުމަށް އެ ކުންފުނީގެ ނަންބަރު 3030400 އަށް ގުޅައިގެން ނުވަތަ [email protected] އާއި ގުޅައިގެން އެކަން ކުރެވޭނެއެވެ.
ކޮންޓްރެކްޓް ފާމިންގެ ފުރަތަމަ ފިޔަވަހީގައި ރާއްޖޭ 5 ޒޯނަކަށް ބަހާލައިގެން 43 ރަށެއްގައި 17 ބާވަތެއް ހެއްދުމަށް ވަނީ ހަމަޖެހިފައެވެ. ހައްދާތަކެތި ދަނޑުވެރިންގެ މެދުގައި ބަހާލައި ކޮންމެ ދަނޑުވެރިއަކަށްވެސް މަދުވެގެން 2 ބާވަތް ހެއްދުމަށް ދޭނެއެވެ. މި ބުރު ނިމުމުން މުޅި ރާއްޖެއަށް ހުޅުވާލާނެކަމަށް އެ ކުންފުނިން ބުނެއެވެ.