ޗުއްޓީގައި ހުންނަ ދުވަސްތަކުގައިވެސް މުވައްޒަފުންނަށް ސަރވިސް ޗާޖު ދޭންޖެހޭނެކަމަށް ކަނޑައަޅައި، ސާވިސް ޗާޖާއިބެހޭ ޤަވާއިދު ގެޒެޓްކޮށްފިއެވެ.
ލޭބަރ ރިލޭޝަންސް އޮޓޯރިޓީން އާންމުކޮށްފައިވާ ސަރވިސް ޗާޖާއި ބެހޭ ޤަވައިދު ބުނާގޮތުން ފަތުރުވެރިކަމުގެ ޞިނާޢަތުގައި ހަރަކާތްތެރިވާ ތަންތަނުން ފޯރުކޮށްދޭ ކޮންމެ ޙިދުމަތަކުން %10 އަށްވުރެ މަދު ނޫން އަދަދަކުން ސަރވިސް ޗާޖު ނަގަންވާނެއެވެ. މީގެތެރޭގައި ޓޫރިސްޓް ރިސޯޓްތަކާއި، ޓޫރިސްޓް ގެސްޓްހައުސްތަކާއި، ޓޫރިސްޓް ހޮޓާތަކާއި، ޓްރެއިނިންގ ރިޒޯޓުތަކާއި، ޓްރާންސިޓް ހޮޓާތަކާއި، ސިޓީ ހޮޓާތަކާއި، ޓޫރިސްޓް އުޅަނދުތަކާއި، ޓޫރިސްޓް ރިޒޯޓްތަކާއި، ޔޮޓް ބަނދަރުތަކާއި، އިންޓަގްރޭޓަޑް ޓޫރިސްޓް ރިޒޯޓްތަކާއި، ޕްރައިވެޓް އައިލެންޑްތައް ހިމެނެއެވެ.
މިފަދަ ތަންތަނުގައި ގާއިމްކޮށްފައިވާ ޑައިވިން ސްކޫލްތަކާއި ސެންޓަރުތަކާއި، ސްޕާ، ވޯޓަރ ސްޕޯޓްސް ފެސިލިޓީތައް، އެކްސްކާޝަން ހަރަކާތްތަކުން އަދި ކެފޭ/ރެސްޓޯރެންޓް/ކެންޓީންތަކާއި، އެ ތަންތަނުގައި ހިދުމަތް ދިނުމަށް ގާއިމްކޮށްފައިވާ އެފަދަ އެހެން ތަންތަނުންވެސް ސާވިސް ޗާޖު ނަގަން ޖެހޭނެކަމަށް ގަވައިދު ބުނެއެވެ. އޭގެ ތެރޭގައި، ހިދުމަތް ފޯރުކޮށްދިނުމަށް އައުޓް ސޯސްކޮށްގެން، އެހެން ވިޔަފާރިއެއް މެދުވެރިވެގެން ދޭ ހިދުމަތްތައްވެސް ހިމެނޭނެކަމަށް ބުނެފައިވެއެވެ.
ޤާނޫނީ ގޮތުން ހޯދަންޖެހޭ ހުއްދައެއްނެތި ހިންގާ މިފަދަ ތަންތަނުންވެސް 1 ޖަނަވަރީ 2021 އިން ފެށިގެން މި ޤަވައިދުގައިވާ ގޮތުން ސަރވިސް ޗާޖު ނަގަންޖެހޭނެކަމަށް ޤަވައިދުގައި ވަނީ ކަނޑައަޅާފައެވެ. ވަޒީފާދޭ ފަރާތުން ވިޔަފާރި ހިންގާ ވަކި ތަނެއްގައި އެ ފަރާތުން ހިންގާ ތަފާތު ވިޔަފާރިތަކުން ނަގާ ސަރވިސްޗާޖުގެ ފައިސާ ހިސާބުކޮށް ބަހާންވާނީ އެއްކޮށްކަމަށް ޤަވައިދުގައި ވަނީ ބުނެފައެވެ.
ސަރވިސް ޗާޖު ހިސާބުކުރުމުގައި މުވައްޒަފު ޚިދުމަތްކުރި ދުވަސްތައް ކަނޑައެޅުމުގައި ވަޒީފާއާއިބެހޭ ޤާނޫނުގެ ދަށުން މުސާރަ ލިބޭގޮތަށް މުވައްޒަފަށް ޙައްޤުވާ އެކިއެކި ޗުއްޓީތަކުގެ ދުވަސްތަކާއި އަރާމުކުރުމަށް މުވައްޒަފަށް ހައްޤުވާ ދުވަސްތައް އުނިކޮށްގެން ނުވާނެކަމަށް މި ޤަވައިދުގައި ވަނީ ކަނޑައަޅާފައެވެ.
ސަރވިސްޗާޖުގެ ގޮތުގައި ވަޒީފާ ދޭ ފަރާތަށް ކޮންމެ މަހަކު ލިބޭ ފައިސާގެ ޖުމްލަ އަދަދުގެ ތެރެއިން އިދާރީ ފީއެއްގެ ގޮތުގައި 1 އިންސައްތަ ނެގިދާނެކަމަށް ޤަވައިދުގައި ވަނީ ބުނެފައެވެ. އަދި އެއްވެސް ހާލެއްގައި އެއަށްވުރެ އިތުރު އަދަދެއް ވަޒީފާ ދޭ ފަރާތުން ނަގައިގެން ނުވާނެކަމަށް ޤާނޫނުގައި ވަނީ ބުނެފައެވެ.
މުވައްޒަފުންގެ މެދުގައި ސާވިސް ޗާޖް ބެހުމުގައި، މި ގަވާއިދާ ހިލާފުވެއްޖެނަމަ، ވިޔަފާރީގެ ކުޑަ ބޮޑު މިނަށް ބަލައި، އެއްލައްކަ ރުފިޔާއަށްވުރެ ބޮޑުނޫން އަދަދަކުން ޖޫރިމަނާ ކުރެވޭނެއެވެ. މީގެ އިތުރުން ލޭބަރ ރިލޭޝަންސް އޮތޯރިޓީން އަންގާ އެންގުންތަކާއި ހިލާފުވެއްޖެނަމަ ފުރަތަމަ ފަހަރު 10000 ރުފިޔާއަށް ވުރެ ބޮޑު ނޫން އަދަދަކުން، އަދި ތަކުރާރުވާ ކޮންމެ ފަހަރަކު 50،000 ރުފިޔާއަށް ވުރެ ބޮޑު ނޫން އަދަދަކުން ޖޫރިމަނާ ކުރާނެކަމަށް ޤަވައިދުގައި ވަނީ ކަނޑައަޅާފައެވެ.