އެސްއެމްއީ ޑިވެލޮޕްމަންޓް ކޯޕަރޭޝަން، އެސްޑީއެފްސީން ދޫކުރާ ލޯނުތަކަށް އެދުމުގެ ފުރުސަތު އަލުން ހުޅުވާލައިފިއެވެ.
އެސްޑީއެފްސީން ބުނީ ލޯނަށް އެދުމުގެ ފުރުސަތު އަލުން ހުޅުވާލުމާއިއެކު ގިނަ ބަޔަކު ލޯނަށް އެދި ހުށައަޅަމުން އަންނަކަމަށެވެ.
ކޯވިޑް19 އާއި ގުޅިގެން އެސްއެސްއީ ބޭންކުން ދޫކުރާ ލޯނުތަކަށް އެދުމުގެ ފުރުސަތު މިދިޔަ އަހަރުގެ ބޮޑުބައިގައި އެ ބޭންކުން ވަނީ މެދުކަނޑާލާފައެވެ. އެސްއެމްއީ ބޭންކުން ދޫކުރަމުން އައި ލޯނުތައް ދޫކުރުން މެދުކަނޑާލާފައި އޮތުމަށްފަހު މި ލޯނުތަކަށް އެދުމުގެ ފުރުސަތު ހުޅުވާލީ މިދިޔަ ސެޕްޓެމްބަރ މަހުގެ ތެރޭގައެވެ. އަދި އަހަރީ ހިސާބުތައް ނިންމުމަށްޓަކައި ޑިސެމްބަރމަހު ލޯނަށް އެދުން މެދުކަނޑާލުމަށްފަހު އަލުން ލޯނަށް ހުޅުވާލާފައިވަނީ މިއަހަރުގެ ފެބްރުއަރީ މަހުގެ ތެރޭގައެވެ.
2020 ވަނަ އަހަރު ގިނައިން ދޫކޮށްފައިވަނީ ސަރުކާރުގެ އިޤްތިޞާދީ ރިކަވަރީ ޕެކޭޖްގެ ދަށުން މިނިސްޓްރީ އޮފް ފިނޭންސް އާއި ގުޅިގެން ކޯވިޑް-19 ވިޔަފާރި އެހީގެ ނަމުގައި ތައާރަފް ކޮށްފައިވާ ލޯނުކަމަށް އެސްއެމްއީ ބޭންކުން ބުނެއެވެ.
އެސްއެމްއީ ބޭންކުން ވިދާޅުވީ، މިއަހަރުގެ ތެރޭގައި އަނެއްކާވެސް ލޯނަށް އެދޭ ފަރާތްތަކުގެ އަދަދު އިތުރުވެފައިވާކަމަށެވެ. އެސްޑީއެފްސީގެ ލޯނު ޕޯޓްފޯލިއޯގެ ދަށުން ހިމެނޭ ލޯނުތަކަށް 2020 ވަނަ އަހަރު އެދިފައިވަނީ 343 ފަރާތަކުންނެވެ. ނަމަވެސް މިއަހަރުގެ މިހާތަނަށް 119 ފަރާތަކުން ލޯނަށް އެދި ހުށައަޅާފައިވާކަމަށް އެ ބޭންކުން ބުނެއެވެ. މީގެތެރޭގައި ގިނަ ފަރާތްތަކުން ލޯނަށް އެދެނީ ފަތުރުވެރިކަމާއި މަސްވެރިކަމުގެ ދާއިރާއަށްކަން އެ ބޭންކުން ފާހަގަކުރެއެވެ.
އެސްއެމްއީ ބޭންކުން ޖުމްލަ 6 ދާއިރާއަކުން އަންނަނީ ލޯނު ދޫކުރަމުންނެވެ. އެއީ ފަށާވިޔަފާރި، ވިޔަފާރި ތަރައްޤީ، ހަރުމުދާ، ދަނޑުވެރި ނަފާ، ވިޔަފާރި އެހީ އަދި ރަށު ފަތުރު ލޯނެވެ. އެސްއެމްއީ ޑިވެލޮޕްމަންޓް ފައިނޭންސް ކޯރޕަރޭޝަނަކީ ކުދި ވިޔަފާރިތަކާއި މެދުފަންތީގެ ވިޔަފާރިތައް ކުރިއެރުވުމަށްޓަކައި މި ސަރުކާރުން އުފައްދާފައިވާ ކުންފުންޏެވެ.
އެސްޑީއެފްސީގެ މައިގަނޑު މަޤްޞަދަކީ ދިވެހިރާއްޖޭގައި އަލަށް އުފައްދާ އަދި ކުރިއަރަމުން އަންނަ ކުދި ވިޔަފާރި އަދި މެދު ފަންތީގެ ވިޔަފާރިތަކަށް ބޭނުންވާނެ މާލީ އެހިތެރިކަން ފޯރުކޮށްދިނުމެވެ. އެގޮތުން ތަފާތު އިޤްތިޞާދީ ދާއިރާތަކަށް އަމާޒުކޮށް ލުއިގޮތަކަށް ލިބޭނޭ ލޯނު ތައާރަފްކޮށް އެމަސައްކަތް ދެމެހެއްޓެނިވި ގޮތެއްގައި ކުރިޔަށް ގެންދިޔުމުގެ މަސައްކަތް އެސްޑީއެފްސީން ދަނީ ކުރަމުންނެވެ.