ރާއްޖޭގެ ފަތުރުވެރިކަން މިއަދު މިދެކޭ ކާމިޔާބީގެ އަސްލަކީ ސަރުކާރާއި ޕްރައިވެޓް ސެކްޓަރާއި ދޭތެރޭގައި އޮތް ގުޅުންކަމަށް މަޓީގެ ވައިސް ޗެއަރމަން ހުސައިން އަފީފް ވިދާޅުވެއްޖެއެވެ.
އަފީފް މިހެން ވިދާޅުވީ، ރާއްޖޭގެ ފަތުރުވެރިކަމަށް 50 އަހަރު ފުރޭ ރަންޔޫބިލް ހަރަކާތްތަކުގައި ބޭނުންކުރާ ލޯގޯ އިފްތިތާޙުކުރުމަށް ބޭއްވި ހަފްލާގައި ވާހަކަދައްކަވުންނެވެ.
ހުސައިން އަފީފަކީ ރާއްޖޭގެ ރާއްޖޭގެ ފަތުރުވެރިކަމުގެ ބާނީއެކެވެ. ރާއްޖޭގެ ފަތުރުވެރިކަން ފެށުމުގައި އޭނާ ވަނީ ގިނަ މަސައްކަތްތަކެއް ކުރައްވާފައެވެ. އަފީފް ވިދާޅުވީ، ރާއްޖޭގެ ފަތުރުވެރިކަމަށް މިހާރު ވަރަށް ބޮޑު ބަދަލެއް އައިސްފައިވާކަމަށެވެ. އަދި ރާއްޖޭގެ ޓޫރިޒަމް މިހާބޮޑަށް ކާމިޔާބުވެގެންދިޔަ އެންމެ ބޮޑު އެއް ސަބަބަކީ ސަރުކާރާއި ޕްރައިވެޓް ސެކްޓަރާއި ދޭތެރޭގައި އޮތް ގުޅުންކަން އޭނާ ވަނީ ފާހަގަކުރެއްވިއެވެ.
"ޓޫރިޒަމްއަށް ވަރަށް ބޮޑެތި ބަދަލުތައް އައިސްފި. ކުރިއަށްއޮތް ތަނުގައި އިތުރަށް ބަދަލުތައް އަންނާނެ. އަޅުގަނޑު ދަންނަވާނީ ރާއްޖޭގެ ޓޫރިޒަމް މިހާބޮޑަށް ކާމިޔާބުވެގެންމިދިޔަ އެންމެ ބޮޑު އެއް ސަބަބަކީ ސަރުކާރާއި ޕްރައިވެޓް ސެކްޓަރާއި ދޭތެރޭގައި އޮތް ގުޅުމާއި ހެދިގެންނޭ. އެއީ މިގޮތައް ކުރިއަށްދިއުމުގެ ބިންގާ. އަޅުގަނޑުމެންގެ ތެރޭގައި ތަފާތު އުޅޭނެ ދޭތެރެދޭތެރެއިން. އެހެންނަމަވެސް މިއޮތް އޯޕަން މޮނޮޓޮރީ ޕޮލިސީއާއިހެދި ޓޫރިޒަމް މިހާތަނަށް ކުރިއަށްގޮސްމިއޮތީ." އަފީފް ވިދާޅުވިއެވެ.
ރާއްޖޭގެ ފަތުރުވެރިކަމަށް އަންނަ އަހަރު 50 އަހަރު ފުރޭއިރު މި ދާއިރާގައި މަސައްކަތްކޮށްފައިވާ ފަރާތްތަކުގެ ޙާއްސަ އިންޓަވިއުތައްވެސް ޓޫރިޒަމް މިނިސްޓްރީ މިއަހަރު އަންނަނީ ގެނެސްދެމުންނެވެ. އެގޮތުން އަފީފްގެ މެސެޖްގައި ވަނީ ރާއްޖޭގެ ފަތުރުވެރިކަން ފެށުމުގައި ހިއްސާވެވުނީތީ ފަހުރުވެރިވާކަމަށް ވިދާޅުވެފައެވެ. އަދި ރާއްޖޭގެ ފަތުރުވެރިކަމުގެ ރަން އަހަރު ފާހަގަކުރާ އަހަރަކީ އުފާވެރި އަހަރަކަށްވާނެކަމަށް އުންމީދުކުރާކަމަށް އޭނާ ވިދާޅުވިއެވެ.