އެންމެ އަވަހަަށް އޮންނަ އެމްއައިޓީޓީ ފެއަރގައި ރާއްޖޭ އިސްތިހާރުކުރުމަށް އެމްއެމްޕީއާރުސީއާއި އެކު 12 ކުންފުންޏަކުން ބައިވެރިވުމަށް ނިންމައިފިއެވެ. މީ ކޯވިޑްގެ ހާލަތާއި ގުޅިގެން ބޭރުގެ ފެއަރތައް މެދުކެނޑިފައި އޮންނަތާ އަހަރެއް ހާ ދުވަސް ފަހުން ބާއްވާ މިފަދަ ފުރަތަމަ ފެއަރއެވެ.
ރާއްޖެ އިޝްތިހާރުކުރުމަށް ރާއްޖެއިން ބޭރުގައި ބާއްވާ 44 ފެއަރއަކާއި ރޯޑްޝޯއެއްގައި މިއަހަރު ބައިވެރިވާނެކަމަށް އެމްއެމްޕީއާރުސީން ބުނެއެވެ. މި ފެއަރަތަކުގެ ތެރެއިން އެމްއެމްޕީއާރުސީން މިއަހަރު އެންމެ ފުރަތަމަ ބައިވެރިވާނީ މިމަހުގެ 16 އިން 18 އަށް މޮސްކޯގައި އޮންނަ އެމްއައިޓީޓީ ފެއަރގައެވެ. މި ފެއަރގައި އެ ކޯޕަރޭޝަނާއިއެކު ދިވެހި 12 ކުންފުންޏަކުން 23 މެމްބަރުން ބައިވެރިވާނެއެވެ.
އެމްއައިޓީޓީ ފެއަރގެ އިތުރުން މިމަހުގެ 19 އިން 26 އަށް ރަޝިއާގެ ބޮޑެތި ސިޓީތަކުގައި ރާއްޖެ އިޝްތިހާރުކުރުމަށް ރޯޑް ޝޯތަކެއް ބޭއްވުމަށް ވަނީ ނިންމާފައެވެ. މި ރޯޑް ޝޯތަކުގައި އެމްއެމްޕީއާރުސީއާއި އެކު 20 ކުންފުންޏަކުން 34 ބައިވެރިން ބައިވެރިވުމަށް ވަނީ ހަމަޖެހިފައެވެ. މި ރޯޑް ޝޯތަކުގައި މޮސްކޯ، ކަޒާން، ސެއިންޓް ޕީޓަސްބާރގް، އިތުރުން ޔެކެޓަރިންގބާގް ގައި ރާއްޖެ އިޝްތިހާރުކުރުމަށް ހަރަކާތަކެއް ހިންގާނެއެވެ.
އެމްއެމްޕީއާރުސީން މިއަހަރު ބައިވެރިވުމަށް ނިންމާފައިވާ ދުނިޔޭގެ ބައެއް ބޮޑެތި ފެއަރތަކުގެ ތެރޭގައި ސްޕެއިންގައި ކުރިއަށްދާ ފިޓޫރު ފެއަރއާއި، ޑަބްލިއުޓީއެމް ލަންޑަންއާއި، އައިޓީބީ އޭޝިއާ، އަދި އައިޓީބީ ޗައިނާ ހިމެނެއެވެ.
އެމްއެމްޕީއާރުސީން އަންނަނީ ރާއްޖޭގެ ފަތުރުވެރިކަން އިޝްތިހާރުކުރުމަށް ގިނަ މަސައްކަތްތަކެއް ކުރަމުންނެވެ. ކޯވިޑާއި ގުޅިގެން ދަތުރުފަތުރުތައް ހުއްޓުމުން ބައެއް ބޮޑެތި ފެއަރތައް ކެންސަލްކުރި ނަމަވެސް އޮންލައިން ޕެލްޓްފޯމްތަކުގައިވެސް ރާއްޖެ އިސްތިހާރުކުރުމުގެ މަސައްކަތްވެސް އެމްއެމްޕީއާރުސީން އަންނަނީ ހުއްޓާނުލާ ކުރަމުންނެވެ.
ކޯވިޑްގެ އުނދަގޫ ދަތި ދުވަސްތަކުގައިވެސް މިދިޔަ އަހަރުގެ ތެރޭގައި 22 ޓާގެޓް މާކެޓެއްގައި އެމްއެމްޕީއާރުސީން ވަނީ 412 ހަރަކާތެއް ހިންގާފައިއެވެ. މީގެތެރެއިން 314 ހަރަކާތަކީ ކޯވިޑްގެ ތެރޭގައި ރާއްޖެ އިޝްތިހާރުކުރުމަށް ހިންގި ހަރަކާތްތަކެވެ. މި ކެމްޕެއިން ހަރަކާތްތައް މެދުވެރިކޮށް މަދުވެގެން 5.2 ބިލިއަން މީހުންނަށް ރާއްޖޭގެ މައުލޫމާތުތައް ހިއްސާކޮށްފައިވާނޭކަމަށް އެމްއެމްޕީއާރުސީން ބުނެއެވެ.
ކޯވިޑް19 ގެ ސަބަބުން މިދިޔަ އަހަރު ރާއްޖެ އައި ފަތުރުވެރިންގެ އަދަދު ދަށްވިނަމަވެސް ރާއްޖޭގެ ފަތުރުވެރިކަން ކުރިން އޮތް ހާލަތައް މިއަހަރު ގެންދިއުމަށް މި ސިނާއަތުގައި މަސައްކަތް ކުރާ ހުރިހާ ފަރާތްތަކެއް ގުޅިގެން ދަނީ ގިނަ މަސައްކަތްތަކެއް ކުރަމުންނެވެ. އެގޮތުން މިއަހަރު ރާއްޖެއަށް 1.5 މިލިއަން ފަތުރުވެރިން ގެނައުމަށް ވަނީ އަމާޒު ހިފާފައެވެ. މިއަހަރުގެ މިހާތަނަށް ރާއްޖެ ޒިޔާރަތްކުރި ފަތުރުވެރިންގެ އަދަދުވަނީ 198،116 މައްޗަށް އަރާފައެވެ.