މާލެ ސަރަހައްދުގައި އިއުލާންކޮށްފައިވާ ލޮކްޑައުން އުވާލުމުގެ ސަބަބުން މިދިޔަ އަހަރުގެ ފަހުކުއާޓަރުގައި އިޤްތިޞާދު ކުރިއަރައިގެން ދިޔަކަމަށް އެމްއެމްއޭގެ ރިޕޯޓަކުން ދައްކައިފިއެވެ.
މޯލްޑިވްސް މަނިޓަރީ އޮޓޯރިޓީ، އެމްއެމްއޭއިން އާންމުކޮށްފައިވާ "ކުއަރޓާލީ އިކޮނޮމިކް ބުލެޓިން" ގައި ބުނެފައިވަނީ 2020 ވަނަ އަހަރުގެ 2 ވަނަ އަދި 3 ވަނަ ކުއާޓަރާއި އަޅާބަލާއިރު 4 ވަނަ ކުއާޓަރުގައި އިޤްތިޞާދު ކުރިއަރައިގެން ދިޔަކަމަށެވެ. މީގެ މައިގަނޑު ސަބަބުތަކެއްކަމަށް ރިޕޯޓުގައި ފާހަގަކޮށްފައިވަނީ 2020 ވަނަ އަހަރުގެ ފަހު ކުއާޓަރަކީ ރާއްޖޭގެ ފަތުރުވެރިކަމުގެ ހައި ސީޒަނަށްވެ ފަތުރުވެރިކަން ރަނގަޅުވުމެވެ. މީގެސަބަބުން ފަތުރުވެރިކަމާއި ގުޅުންހުރި އެހެން ބައެއް ދާއިރާތައްކަމަށްވާ ޓްރާންސްޕޯޓާއި، ކޮމިއުނިކޭޝަންއާއި ހޯލްސޭލް އަދި ރީޓެއިލްގެ ސިނާއަތަށް ފައިދާކުރިކަމަށް ރިޕޯޓުގައިވެއެވެ.
އެމްއެމްއޭގެ ރިޕޯޓުގައި ފާހަގަކޮށްފައިވަނީ ކޯވިޑް19ގެ ސަބަބުން މާލެ ސަރަހައްދުގައި އިއުލާންކޮށްފައިވާ ލޮކްޑައުން އުވާލުމަކީވެސް މިދިޔަ އަހަރުގެ ފަހު ކުއާޓަރުގައި އިޤްތިޞާދު ކުރިއަރައިގެން ދިޔަ ސަބަބެއްކަމަށެވެ. ލޮކްޑައުންގެ ސަބަބުން ގިނަ ވިޔަފާރިތަކަށް ދަތިތަކާއި ކުރިމަތިވެ، އެމީހުންގެ ވިޔަފާރި މުޅިންހެން ހުއްޓުމަކަށް އައިސްފައެވެ. ނަމަވެސް ލޮކްޑައުން އުވާލުމުގެ ސަބަބުން އަހަރުގެ ފަހު ކުއާޓަރުގައި ވިޔަފާރިތައް މަޑުމަޑުން ފަށައިގަނެ، އަނެއްކާވެސް ކުރިއަރަން ފެށިކަމަށް ރިޕޯޓުގައިވެއެވެ.
އެމްއެމްއޭގެ ރިޕޯޓުން ދައްކާގޮތުން މިދިޔަ އަހަރުގެ ފަހު ކުއާޓަރުގައި އިންފްލޭޝަން ހުރީ އޭގެކުރީ ކުއާޓަރާއި އެއްވަރެއްގައެވެ. އެއީ މައިނަސް %1.1 ގައެވެ. ހިލޭއެހީ ނުލައި މި ކުއާޓަރުގައި ދައުލަތައް ލިބުނު އާމްދަނީ އޭގެ ކުރީ އަހަރާއި އަޅާބަލާއިރު ވަނީ ދަށްވެފައެވެ. މީގެ މައިގަނޑު ސަބަބަކީ ޓެކްސް އަދި ޓެކްސް ނޫން ގޮތްގޮތުން ދައުލަތަށް ލިބުނު އާމްދަނީ ދަށްވުމެވެ. ދައުލަތުގެ އާމްދަނީ ދަށްވިއިރު ދައުލަތުން ކުރި ހަރަދުތައްވެސް ދަށްކޮށްފައިކަމަށް އެމްއެމްއޭގެ ރިޕޯޓުގައި ވަނީ ފާހަގަކޮށްފައެވެ.