އިންޑިއާގެ އިތުރު އެއަރލައިނަކުން އަންނަމަހު ރާއްޖެއަށް ދަތުރު ފަށަނީ

އިންޑިއާގެ ވިސްތާރާއިން އަންނަމަހު ރާއްޖެއަށް ދަތުރުތައް ފަށާނެކަމަށް އެ އެއަރލައިނުން ހާމަކޮށްފިއެވެ.

އިންޑިއާގެ ވިސްތާރާ އެއަރލައިނުން ރާއްޖެއަށް ދަތުރުތައް ފެށުމަށް ހަމަޖެހިފައިވަނީ އަންނަ މަހުގެ 3 ވަނަ ދުވަހުން ފެށިގެންނެވެ. މި އެއަރލައިންގެ ދަތުރުތައް ރާއްޖެއަށް ކުރާނީ މުމްބާއީން ވެލާނާ އިންޓަނޭޝަނަލް އެއަރޕޯޓަށެވެ.

ވިސްތާރާ އެއަރލައިންގެ ދަތުރުތައް އަންނަ މަހު ރާއްޖެއަށް ފަށާއިރު ހަފްތާއަކު 3 ދަތުރު އެ އެއަރލައިނުން ރާއްޖެއަށް ކުރުމަށް ވަނީ ހަމަޖެހިފައެވެ. ދަތުރުތައް ކުރާނީ ބުދަ، ހޮނިހިރު އަދި އާދިއްތަ ދުވަހުއެވެ.

މި ދަތުރުތަކުގެ އަގު އުޅެނީ 2 ކޮޅު ޓިކެޓް 227 ޑޮލަރަށެވެ. ޓިކެޓް ބުކްކުރުމުގެ ފުރުސަތު އެއަރލައިންގެ ވެބްސައިޓުންނާއި، އޮންލައިން ޓެރެވެލް އެޖެންސީތައް މެދުވެރިކޮށް މިހާރު ވަނީ ހުޅުވާލާފައެވެ.

އިންޑިއާގެ ވިސްތާރާ އެއރަލައިންއިން ރާއްޖެއަށް ދަތުރުފަށަނީ އިންޑިއާއާއި ރާއްޖެއާ ދެމެދު ޤާއިމްކޮށްފައިވާ އެއަރ ޓްރެވެލް ބަބުލްގެ ދަށުންނެވެ. މި ބަބުލްގެ ދަށުން ގިނަ އަދަދެއްގެ އިންޑިއާގެ އެއަރލައިންތަކަކުން މިހާރުވެސް އަންނަނީ ރާއްޖެއަށް ދަތުރުތައް ބާއްވަމުންނެވެ. އޭގެތެރޭގައި އެއަރ އިންޑިއާ، އިންޑިގޯ، ގޯ އެއަރ އަދި ސްޕައިސްޖެޓް ފަދަ އެއަރލައިންތައް ހިމެނެއެވެ.

މިއަހަރުގެ މިހާތަނަށް ރާއްޖެއަށް އެންމެ ގިނަ އަދަދަކަށް ފަތުރުވެރިން އައި 2 ވަނަ ޤައުމަކީ އިންޑިއާއެވެ. އަހަރުގެ މިހާތަނަށް އިންޑިއާއިން ރާއްޖެއަށް ވަނީ 26292 ފަތުރުވެރިން ވަނީ އައިސްފައެވެ. އަދި މިދިޔަ އަހަރު ރާއްޖެއަށް އެންމެ ގިނައިން ފަތުރުވެރިން ޒިޔާރަތްކުރި ޤައުމަކީވެސް އިންޑިއާއެވެ. މިދިޔަ އަހަރު ރާއްޖެ ޒިޔާރަތްކުރި ފަތުރުވެރިންގެ ތެރެއިން 11.3 އިންސައްތަ ހިއްސާކުރަނީ އިންޑިއާ ފަތުރުވެރިންނެވެ. އެއީ 62960 ފަތުރުވެރިންނެވެ.